Mələm inda nja nə nyi nə Nyandəla Levi
21
1 Njirawawa'a inda ku nyandəla levi tə həya Eliyazar pərist, Joshuwa zər Nun, ana njirawawa'a nə alenya nyavi inda 2 vu Shilo aku Kan'ana ga nar nda, <<Tlakə tə nar nyi nə Musa, ənda ka nə ea mələm inda eo ngya kwa ana mbwar ɓəla sərshishi.>> 3 Aka ənga, njir Isra'ila tə nə nyi mələm inənnə nə nyandəla Levi ka sərfa'aki kənda, wi nda Tlakə tə na.4 Ɓəlshiu tangərma nacha ngə nə nyandəla Kohat, ka nyavi ka nyavi. Nja nə nyi mələm kwabəmakər nə njir Levi inda ku nyandəla Haruna Pərist, ku mətla hə'i nyandəla Yahuda, Simion ana Banyami. 5 Həyadzər nyandəla Kohat nja nə nda mələm kuma ku mətla hə'i nyavi Ifərem, Dan ana mar nyandəla Manasa.
6 Nja nə nyi mələm kwabəmakər nə nyandəla Gashon, ku mətla hə'i nyandəla Issaka, Asha, Naftali ana mar nyandəla Manasa a vu Bashan.
7 Aku mətla hə'i nyandəla Roben, Gad ana Zebulun, nja nə nyi mələm kwabəmətlə nə nyandəla Merari ka nyavi ka nyavi.
8 Əngə njir Isra'ila tə nə nyi mələm inə nə nyandəla Levi ana mbwar ɓəla sərshishi wi nda Tlakə tə tsau nyi bar nə Musa.
9 Ja inə tləmər mələm inda nja tlabiya ku mətla hə'i nyandəla Yahuda ana Simion 10 (mələm inə ngə nja nə nyi nə nyandəla Haruna inda tə biya ku nyavi Kohat nyavi Levi aka ɓəlshiu tangərma tə ɗa ka nə kənda.
11 Nda nə nda, Kiriyat Arba (nacha ngə Hebron), ana mbwar ɓəla sərshishi inda tə ɓandə mələm nda, ku hə'i dəgəl dəgəl nə Yahuda. (Arba nacha ngə jivalnya Anak). 12 Kəl ja, babal ka mələm shiɗəɗə inda tə ɓandə mələm nda, nda nə nyi nə Kalip zər Jefune ka nənyi na sərfa'aki.
13 Aka ənga nja nə nyi Hebron nə nyandəla Haruna pərist (mələm mbu ka ndə nda tsəya ndəu), ana Libna, 14 Jatir, Eshtemowa, 15 Holon, Debir 16 Ayin, Juta ana Bet Shemesh dəhə ka mbwar ɓəla sərshishi, mələm dləa hya'atə ku nyavi mətlə ina.
17 Aku nyandəla Banyami tsə'u nja nə nda Gibiyon, Geba, 18 Anatot ana Almon, dəhə ka mbwar ɓəla sərshishi, mələm fwaɗəu.
19 Dəhə dəhə mələm nda nja nə nyi nyandəla Haruna pərist, mələm kwabəmakərəu, dəhə ka mbwar ɓəla sərshishi.
20 Həyadzər nyavi Kohat ku nyandəla Levi, nja nə nda mələm ku mətla hə'i Ifərem.
21 Aku mələm dəgəl dəgəl nə Ifərem nja nə nda Shekem (mələm mbua) ana Geza, 22 Kibzayim ana Bet Horon, dəhə ka mbwar ɓəla sərshishi, mələm fwaɗəu.
23 Ətsə'u, ku mətla hə'i nyandəla Dan, nja nə nda Elteke, Gibeton, 24 Aijalon ana Gat Rimmon, dəhə ka mbwar ɓəla sərshshi, mələm fwaɗəu.
25 Aku mətla mar nyandəla Manasa tsəu, nja nə nda Taanak ana Gat Rimmon, dəhə ka mbwar ɓəla sərshishi, mələm mətləu.
26 Dəhə mələm kumə ina, ana mbwar ɓəla sərshishi, nja nə nyi nə həyadzər nyavi Kohat.
27 Nyandəla Levi inda ku nyavi Gashon tsəu, nja nə nda:
mələm ku mətla hə'i mar nyandəla Manasa nanda ingə:
Golan vu Bashan (mələm mbua) ana Be Eshtara, dəhə ka mbwar ɓəla sərshishi, mələm mətləu.
28 Ku mətla hə'i nyandəla Issaka tsəu, nja nə nda: Kishiyon, Daberat, 29 Jarmut ana En Gannim, dəhə ka mbwar ɓəla sərshishi, mələm fwaɗəu,
30 ku mətla hə'i nyandəla Asha tsəu, nja nə nda: Mishal, Abdon, 31 Helkat ana Rehob, dəhə ka mbwar ɓəla sərshishi, mələm fwaɗəu.
32 Ku mətla hə'i nyandəla Naftali tsə'u, nja nə nda: Kedesh vu Galili (mələm mbua), Hammot Dor ana Kartan, dəhə ka mbwar sərshishi, mələm makərəu.
33 Dəhə dəhə mələm nyandəla Gashon mələm kwabəmakərəu, dəhə ka mbwar ɓəla sərshishi.
34 Həyadzər nyandəla Levi, nacha ngə nyandəla Merari nja nə nda:
ku mətla hə'i nyandəla Zebulun, Jokniyim, Karta, 35 Dimna ana Nahalal dəhə ka mbwar ɓəla sərshishi, mələm fwaɗəu,
36 ku mətla hə'i nyandəla Roben tsəu, nja nə nda: Beza, Jahaz, 37 Kedemot ana Mefaat, dəhə ka mbwar ɓəla sərshishi, mələm fwaɗəu.
38 Aku nyavi Gad tsəu, nja nə nda: Ramot vu Giliyad (mələm mbu ka ndə nda tsəya ndəu), Mahanayim,
39 Heshbon ana Jaza, dəhə ka mbwar ɓəla sərshishi, mələm fwaɗəu.
40 Dəhə dəhə mələm kwabəmətlə nja nə nyi nə nyavi Merri həyadzər nyandəla Levi.
41 Mələm nda nja nə nyi nə nyandəla Levi fwaɗəkumnyi parnya chisəu, dəhə ka mbwar ɓəla sərshishi. 42 Kala zhang ku mələm ina ana mbwar ɓəla sərshishi, əngə tə ɗa na dəhə mələm ina.
43 Əngə Tlakə tə nə nyi dəhə hə'i nda nə njir Isra'ila wi nda cha səmfəla cho nə nyi nə ka jival kənda, ngə nda dləuya hə'i nda, ga vaviya mbwar ngya tangnda. 44 Ngə Tlakə tə nə nda ɓəlsar mada təwabari, tang wi nda cha səmfəla nə ka jival kənda. Mada Zhang ku huɗa njir dawa kənda da tə kura nda wa, aka Tlakə tə nə nda dəhə njir dawa kənda. 45 Mada zhang ku huɗa sə mənakə inda Tlakə tə mər alkawal nə njir Isra'ila da kəla cha nyabiya wa.