Mələm Mbu i'i
20
1 Tlakə tə nar nyi nə Joshuwa, 2 <<Nar nyi nə njir Isra'ila, nda ɗəmtsə mələm mbu i'i wi nda ya nar ngha təwa Musa, 3 tsa'aka, ma ndə nda tə tsəya ndə ya a da na ikur nyi wa, cho nau hwi tanyi yi nda ga cha mbəɗə tsa ndər gwa'a kisəkur.4 <<Macha hwi yo zhang ku huɗa mələm inga, cho yi ta'i nya lakur gu ta mələm nda, cho dəkar nyi sə nda tə ɗa nə njirawawa'a mələm nda. Kəl ndo dləutsə nyi ku mələm kənda ba'a nə nyi mbwar ngya kə'i nda. 5 Ma ndər gwa'a kisəkur nda tə gədlə nyi, a da ndo nə nyi ndə nda cho gwa'a nda wa, aka a da na ikur nyi ndara aka dawa cha tsəya təwul nyi wa. 6 Cho ngya ku mələm nda kəl cha ta'i mar njir tla nəuma ana kəl ma gau pərist nda kwa mər tlər ku bəji nda tə tah. Ahir nga cho ɓəl yo ki nyi aku mələm nda cha hwibiya kwa.>>
7 Ngə nda tabiya Kedesh a vu Galili aku mələm inda tə dəgəl nə Naftali, Shekem aku mələm dəgəl dəgəl nə Ifərem ana Kiriat Arba (nacha ngə Hebron) aku mələm dəgəl dəgəl nə Yahuda. 8 Nda tabiya Bezer a təwa zədərpəchi nə Urdən, nda ləhə dza Jariko ku dadil takəu, kya tə dəgəl ku mətla hə'i nə nyandəla Roben, Ramot vu Giliyad ku mətla hə'i nə nyandəla Gad, ana Golan vu Bashan ku mətla hə'i nə nyandəla Manasa. 9 Kala ndər Isra'ila ndara mihiɓi nda na ngya ku pama nda, nda tə tsəya ndəu, ya a da na ikur nyi wa, kwa nau cha hwi tanyi yo mələm inda nja ɗəmtsi, ya a ndər gwa'a kisəkur da kwa tsəya nyi wa, kəl nacha ta'i mar njir tla nəuma.