Dəma ana Kəkəngkur
9
1 Dəma tə hərəya ki nyi,ga chiya shimbal məɗəfə inda kwa gəzə ki nda.
2 Cha na nja tsəya sərshishi i'i aka ladər, ga tagu mbadla,
cha ɓatləya ladər.
3 Cha sə kwatəra nyi i'i biya, cho nga
kyatə mbwanda tə ndəya na dzəm ku mələm nda.
4 <<Nahi nji kəla jigadəma, anda ma.>>
Anə nji kəla kər tsəu cha na,
5 <<Andə hya səm sərsumə ɗa
hya sa mbadlə nda ya ɓatləya.
6 Təkəbiya ma dzə na tar jigadəma, hya uya pi,
mər ma ma'i ku lakur ngabiya.
7 Dəhə ndə nda tə tsə ndə həyatəvi, ngəl nda cho gwa'a nə kərnyi,
dəhə ndə nda tə tsə ndə pəla'a cho uya ngəla.
8 Ngwaka da tsə ndər həyatəvi, pa'a əngə wa cho ɗa tsa ka,
təɗə himya ndər dəma cho nyida ngha.
9 Dəkətə nyi səu nə ndər dəma, cho tsakətə ɗa na dəma,
dlədləɓətənyi sə nə ndə tsatsa'a cho tsaktə dlədləɓa.
10 Ləvər Tlakə ngə hya uya dəma,
ngabiya tsəu, nacha ngə zəndəbiya Ndə Karti.
11 Atəwa ɗa, hanyi nghə kwa ɗa ɗanghəu,
ətsəu njo tsakətənyi fa nə pya ka.
12 Macha ndər dəma ka, dəma nghə kwa nənghə zhar,
macha ndər ɗa tsa dəma kə tsəu, nakə sunghə ngə sa ɓwaɓwatə.>>
13 Kəkəngkur wi mala nyanyakər cha,
a kuzhi da tə lya cha wa, ya a səda cho zəndə wa.
14 Cho zəbiya ngya ta nyi anya nyanki nyi,
atə səngya nda ndəya na dzəgamkur ku mələm nda,
15 cho nga njir tərabiya,
inda kwa ki mər tlər kənda, cho na,
16 <<Nahi nji kəla ngabiya, anda ma!>>
Cho na nə nji kəla jigadəma tsəu,
17 <<Wingə tə ɓiti həlhəl məsəɗakəu, gwazhilak nda ka ɓanghə tə ɗəwa tsə məsəɗakə gagaɗa, ənga tanyi maka piya na mala pa'a ka həbiya.>>
18 Kəl ja,a njir gwa dzə nyi zəndi ənda tə kunda wa,
a da nda zəndi ənda nji'inda tə gwa da cha, təra səyo hu wa.