Dəma kwa Nga
8
1 Səya himi, jan dəma kwa nga.Ngabiya kwa hya'a kuraka cha.
2 Kyatə dəgəl, ləhə nya laku,
cha ta'itə tanyi ku mətəkər laku.
3 Aku nyaki mələm,
aku nyaki cho nga na kurakə dzəgamdzəgaməu.
4 Nahi shili, nahi ngə yo nga,
ya kwa nga dəhə nji.
5 Nahi nji kla jigadəma, gwa'a ma dəma,
nahi nji kəkəng, gwa'a ngabiya.
6 Sədzə himi da ya aka sə mənakə da yo dəkar ngha
ya dəhə sənda yo dəka, tsatsa'a nga.
7 Nya ya kwa pə jiri,
aka nya ya kwa ɗa tsa pəla'akur,
8 Dəhə ɓwanya nda kwa biya ku nya ya, tsatsa'a,
a gəzhi da ndara sər shakər wa.
9 Dəhə ɓwanya ɗa at babal cha anə ndə nda kwa ngabiya,
tsatsa'a a nə nji inda na zəndi.
10 Dləutsə tsaubar ɗa atəvəra azurfa,
zəndi atəvəra bəjingha daɗədaɗa.
11 Dəma ndəya tə rubies,
ya a vanya sə mənakə da ko nau məməla nə wa.
12 <<Naya dəma, ya kwa ngya tsa'a na kwakunakur,
zəndəbiya ana ngabiya na'a inga.
13 Ləvər Tlakə ngə ɗa tsa sə ɗimi,
a da yo i həkər ana bukər wa,
ətsəu yo ɗa tsa ɓwanya shakər.
14 Ya kwa ɓatləya səu ya yo mərti,
ngabiya ana gyalkur da tsa ya.
15 Təwa ɗa ka təl ka təl kwa mər təlkur,
njir təlkur tsə kwa fə gadlagadla inda mənakəu,
16 Atəwa vala ɗa ngə dəhə nji təl təl kwa mər təlkur,
əngə tsəu ka njirawawa'a.
17 Ya kwa nyida nji'inda kwa nyida ɗa,
ya dəhə nji'inda kwa gwa'a ɗa kwa uya ɗa.
18 Yo nə nghə gəna ana səli,
gəna nda pa'a kwa wura, ana prosperiti.
19 Sənda ko uya tsa ya ndəya tə bəjingha,
vəl sənda tsa ya ndəyatə azurfa daɗədaɗa.
20 Aku lakur tsatsa'akur ya kwa ma'i,
aku lakur nəuma jiri.
21 Yakwa nənyi gəna nə nji'inda kwa nyida ɗa,
gəna kənda kwa kwa ual gagaɗa.
22 Naya ngə tangərma aku sə'inda Tlakə tə məra, təvi cha mər alenya səu.
23 Naya ngə nja ghəya fiya, təvi zamin i'i,
təvi nja mər dunəya.
24 Tangnə ya təvi nja mər ɓiti i'i,
təvi ma'a nja na njo mər tsədzəɗə ɓiti.
25 Tangnə ya təvi nja dəgəl wawa'a i'i,
təvi nja fiya dəgəl tə mbwarngya kənda.
26 Təvi Hyel mər dunəya ana babalnyi,
ndara cha zəbiya na hə'i, tangnə ya.
27 Tangnə ya ku bəji nda Hyel tə ɓatlə huɗamələm,
nda cha tətə ɓələr ndzəɗakəkura ɓiti,
28 nda cha ɓatlətə ləmbəkə kya huɗamələm,
ga fiya tsədzəɗə ɓiti i'i,
29 nda cha fiya ɓəlkər fa'a,
tsa ɓiti da ba'a fəlnda tsaubar nyi,
ana bəji nda cha səya hya dunəya.
30 Naya dəma, tsa'a ya nacha, wi ndər nau ɓatlə sə ɓatləɓatla.
Ngə ya kwa nyi na hirgyaɗi kala pəchi,
ya kwa mər hirgyaɗi tə mbwanda cha ngya,
31 ya kwa mər hirgyaɗi aku dəhə dunəya nyi
ana ngatə məsəkəkur aku sə ndəndəu.
32 Sakan ja nguili ɗa, səya ma himi da ya,
njir papa'akur ingə nji'inda tə mər sənda ya na.
33Səhimi da tsaubar ɗa ka ɗa na dəma,
ngwa ka da ngyarə wa.
34 Ndər papa'akur ndə nda kwa səhimi da ya,
kala bəji cha kwa ta'i nya nyaki ɗa i'i,
ta'i ku laku ɗa.
35 Aka dəhə ndə nda tə uya ɗa, uya tə cha pi
ya uyatə cha kwambiyakur tsa Tlakəu.
36 Kəl ja, dəhə ndə nda pa'a tə uya ɗa, takasəya təcha kərnyi,
dəhə ndə nda kwa ɗa tsa ya, kwa nyida cha tah.>>