Dəhə sə ɓwatanyi
1
1 Ɓwanyar ndə bəzə mafakəu, zər Təl Dauda, nda tə səm təlkur vu Urshalima. 2 Ndər bəzə mafakə tə na, <<Ɓwatanyi, ɓwatanyi, dəhə sə ɓwatanyi.>> 3 Mi sənda ndə kwa uya ku dəhə tlər inda cha məra də dunəya? 4 Nji kwa kuɗa, nja kwa ya alenya nji, kəl ja, duniya nənyi kwa ngya ba'anawa. 5 Pəchi kwa zədi, ya pəchi kwa təɗa ba'a cha ɓəla kusa təra yatə mbwanda cho zədə ti səkəu. 6 Gyang kwa fi təwa vwa tahə holma, ya cho ɓəla yatə mbwanda cha hya'atəti. 7 Ɓiti kwa whi go dəl ya a dəl da kwa nyi wa. Ba'a ɓiti ɓələ ya mbwanda cha biya ti, cha ɓəla hwi go dəl səkəu.8 Dəhə səu, həɗa tanyi nga, nda a ndə da kwa ɓwanya təkəri wa. A li da kwa həɗa na ndzam sə wa, ya a himi da kwa həɗa na ngati wa.
9 Sənda tə ɗa ha'aɗa kwa ɓəla ɗa səkəu, sənda nja ɗaka mər nə nja kwa mər səkəu,
a vanya taɗər sə da ku ngyar dunəya wa.
10 Aa vanya sə da nda vanya ndə kwa nau na, <<La'a jan sə taɗə ya?>> Tang ngə tanyi səngə ɗəɗəməu, tang ngə tanyi təvi biji kəmən.
11 A tsəu nji da kwa ɗənghatə nji'inda ha'aɗa inda wa, ya mada nji'inda pa'a da tang na, a nji'inda kwa da shili hinda da kwa ɗənghatə na nda wa.
Dəma Ɓwa'atanyi
12 Naya maləm, təl ya təkəra Isra'ila a vu Urshalima. 13 Ya hətə biji ɗa ka ya ngwahibiya dəhə sə'inda nja kwa mər a da kiɗa huɗamələm təwa dəma. Ngə ya ngabiya ənda Hyel fəkə nyi tə ɓwaɓwatə ual gagaɗə nə nji! 14 A la'a təya dəhə sə'inda nja kwa mər tə dunəya, dəhə sə ɓwa'atanyi, ngədlə ngyamg tanyi nga.
15 A tsəu njo nau hya'abiya sənda tə nga tanyi wa, ya a da njo nau jiga sənda pa'a da wa.
16 Ya naryi nə kərɗa, <<Ndzama, a hə təya ga tsakə ku dəma ndiya kala ndə nda tə səm təlkur təkəra Urshalima, təvi ya ɗa ka təl, a uya tə ya dəma a na zəndə gagaɗa.>> 17 Ngə ya fiya kərɗa kaya ngabiya dəma ana məlləm ba'a kəkəngkur, kəl ja, ya ngabiya, kərnya ngə ma'a ngədlə ngyang tanyi nga.
18 Aka ma dəma kwa shili, cho shili tsa'a na huɗatla, ma ndə tə tsakə ku zəndi, ɓwaɓwatə nyi tsəu kwa tsaka.