Sakədar Karapəu
1
1 Karapəu Solomon, zər Dauda, təl Urshalima,2 aka nja uya dəma ana təɗə himi, nga nja ngabiya ɓwanya inda tə tə hya'atə fwatə ku ɗufəu,
3 Aka nja zəndə ənda nji kwa kina ngya ana chul ngya nda kwa shili na biyama, nda kwa mər sənda tsatsa'a ya jiri.
4 Aka ndə kəla dəma cha uya dəma, tlakala tsəu cha uya zəndi ana ngabiya.
5 Ndər dəma cha səhimi cha tsakətə təkəra dlədləɓə nyi, ndə kwa ngabiya tsəu, cha uya dəma nə dəkə himi nə nji.
6 Aka nja ngabiya karapəu ana ba'ada i'i, ana ɓwanya ndər dəma
7 Ləvər Tlakə nacha ngə tangərmar dəma, kəl ja, nji kəkəng tə həyatə dəma ana dlədləɓa.
8 Zər ɗa səndzi himi da sənda ada ngha kwa dəkə nə ngha,
tsaubar ama ngha ngwa ka da vakənda wa.
9 Dlədləɓə kənda kwa ɓəlatə ngyanghə mənakəu,
cho ɗa ka sər ɓatlə durdur nənghə wi pa'uar zaɗəkəra ka,
ma'a wi sər ha wulea durdur da wuleaka,
aka nda tsakətənghə gugumakur.
10 Zər ɗa, ma njir səpəla'a kwa gwa'a nda shandə kər,
ngwa ka da dləukəri nanda wa.
11 Manda natə ngha, <<Shili mən təra mən ki gwa'a vanya ndə mən tsəya,
mən ma'i məna ki mbuya nji kəla bikə mən ngatə msɗakəkur!
12 Ngwa mən ndasənya nda na pi wi hwa,
məna zhazhinda nda sunghəu wi nda tə təɗa gu ka'au;
13 məno uya gəna pampaməu,
məno nyandə ki kəmən na kwazhalɓi:
14 kəl ka daɓətə kər na ea: Dəhə mən məɗəwa kəmən zhang,
ya məno təkƴa kwaba nda mən həltə məməlləu.
15 Zər ɗa, ngwa ka da ma'i ku laku zhang ka nda wa:
ka ɗa naɗə tsanda.
16 A ndo həɗa na mər ɗimikur wa,
kala biji atə mbadzə nda ka tsa nji.
17 A sakəda da njo nga ləbam
tə lya eayakə nda njo gwa'a ka sə wa.
18 Kəl ja, chul nji wi inga, nə kərnənda ngə ndo nga ləbam
A vanya sə da ndo səya wa, kəl nda pya kərnənda.
19 Fa'a laku nacha ngə sənda kwa tsəya
ndər fa'a laku təkərnyi.
Dəma kwa nga
20 Dəma kwa nga kurakə dzəgam dzəgaməu biya kəra laku,
cha har kuraka cha ku ta mələm,
21 a tə mbwanda nji kwa maka tsəmədzə ɗanghəu cha nga, aku laku gu ta mələm cha pə ɓwanya nyi, cha na,
22 <<Ba'asakamani nahi kəkəng kwa nyida kəkəngkur kə hya? Kəl sakamani nahi njir həyatə Hyel kwa biyama na mər scorn ana njir kəkəng kwa ngyar dəma?
23 Macha naka nda səzə himi da təɗəhimi nda ya mər nə ngha, ta'ir yo nda mbəɗəya nghə ɗufwa ya yo chabiya nghə sənda ku jigadɨma ɗa.
24 Kəl ja, manda a ngya ɗa tə ka ku biji nda ya nga ya a ndə da wumə wa aku biji nda ya lətə cha ya,
25 manda a ngyar təkə dəkədəma nda ya mər tə ngha, a ngyar dləu təɗə himi ɗa,
26 naya tsə yo ngyaɗa ngha ku biji nda ko sa ɓwaɓwatə ti, yo mərtə nghə jalvi ku biji nda asar tə uya ngha.
27 Ma asar tə uya nghə wi storm,
ma ɓwaɓwatə tə zhalƴa ngha wi majugwal,
ma huɗətla ana ɓwaɓwatə tə ɓandə ngha.
28 <<Aku biji ngə ja, ndo nga ɗa ya a da yo wumə wa,
ndo gwa'a ɗa, ya a da ndo uya ɗa wa.
29 Manda a ngyar tə nda zəndi, ya a da tabiya nda ngatə ləvər Tlakə wa,
30 manda a da dləu təɗəhimi ɗa wa, ga vakənda tsə nda ya tsə nda,
31 ndo səm sakədar chul ngya kə nda, ndo nyi na huɗətla.
32 A nji kəkəng kwa kuɗa aka nda ngyar dəma, hirgyaɗi nji kəkəng kwa təɗəkə nda tah,
33 kəl ja, kala ndə nda səhimi da ya kwa ngya yiyinghə a da ndo ləvər vanya sə ɗimi wa.>>