Ngatə məsəɗakəkur ma'a Ɓwa'atanyi
2
1 Ya jiga dəma ku ɗəfwa ya ga na, <<Əngwa fəu ɗəfwa ya ku ngati məsəɗakəkur ga zəndə ndara aman cha.>> Ngə ngabiya ənda ma'a ngəngə tsəu, ɓwa'atanyi. 2 Ngə ngabiya, ənda <<Gyaɗi,>> kəkəngkur nga. A sakədar ngatə məsəɗakəkur da wa. 3 Ya gwa'abiya ənda yo nənyi məsəɗakəkur nə kərɗa ana ɓitir anap, ga gaɓətə kəkəngkur, jigadəma ɗa kwa nəu naya ana dəma. A i tiya ya la'a sənda tsa'aka nji kwa kina məra tə dunəya ku biji nda nda na pi.4 Ya mər tlər wawa'a, ya hərə ki i'i anə kərɗa, zuya fa anap i'i. 5 Ya ɓatlətə nyi mbəta nə kərɗa ana mbwar sa ngyang ga chiya dəhə chul wu nda njo səma kwa. 6 Ya ɓatlətə mbwar tsəm ɓiti ga wu inda uya ɓiti. 7 Ya ɗəlbiya mavi'i, mahi'i ka shili ga uya alenya mavi'i inda nja ya ku ki ɗa. Dangal da i'i tsa ya, nə tla ana kwah, ana kətəng ndəya matsa dəhə nji'inda tə ɗaka ngya vu Urshalima. 8 Ya tsəmiya azurfa ana bənjingha uwaləu gagaɗa, ga tsəmiya gəna uwalə tsa ka təl ka təl ana mələm i'i. Njnir na miya da tsa ya, shili ka mahi'i inda kwa na miya na'a, ana sə'inda kwa mərtə ɗəfwa ndə tosəu, ana mahi'i inda ya fiya ɗanghəu. 9 Dəgalkurɗa ndəɗə tə nə kala ndə nda ngya vu Urshalima təvi ya shili. Dəhə ka ənga a dəma ɗa da təkə na ya wa.
10 A da ya ta ka dəhə sənda lya ya la'a nə kərɗa wa, a da yo ka kərɗa tsa ngatə məsəɗakəkur wa. Ɗufwa ya ngatə məsəɗakəkur na dəhə tlər ɗa, ya nacha zhar nə dəhə tlər ɗa.
11 Dəhə ka ənga, nda ya dzamari dəhə tlər ɗa, ana dəhə sə'inda ya məra ga ya uya sakəda, ngə ya ngabiya ənda dəhə ɓwa'atanyi, ngədlə ngyang tanyi nga, a vanya sər sakəda da tə dunəya pa'a wa.
Ndər Dəma ana Ndə Kəkəng
12 Ngə ya shandə jigadəma ɗa ya təkəra dəma, məlləm ana kəkəngkur. Mi sənda Zər təl nda kwa da ɗa ka təl kwa mərta? A vanya sə da wa, kəl nda sə'inda alenya təl i'i tə məra.
13 Ngə ya la'a ənda, dəma ndəya tə kəkəngkur, tang wi ngə vicha tə ndiya kutla.
14 Lya ndər dəma kyo kəra cha, ndə kəkəng tsəu kwa ma'i ku kutla, kəl ja, ya ngabiya ənda sə zhang ngə kwa səkə nda kya'anda.
15 Ngə ya jigadəma ku ɗufwa ya, <<Sənda tə uya ndə kəkəng kwa uya ɗa tsəu. Mi zhar da ya uya aka ya ɗa ka ndər dəma?>> Ngə ya na ku ɗufwa ya, <<Kərnya ngə ma'a, ɓwa'atanyi.>>
16 Aka a tsəu njo da ɗənghatə ndər dəma ana ndə kəkəng a biyama wa, aku hanyi kwa shili nga njo far na nda. Tang winda ndə kəkəng ka tah, əngə tanyi tsəu, tuku ndər dəma tah.
Tlər tsəu Ɓwa'atanyi
17 Aka ənga, a da ya la'a sakədar pi na'a wa, aka dəhə sənda njo məra, ɓwa'atanyi, ngədlə ngyang tanyi nga. 18 A sakədar dəhə tlər da ya mər tə dunəya nə da na'a wa, aka tuku yo ngyanyi ni nə ndə do da fa'aki ɗa. 19 Ya wa zəndi ndara cho ɗa ka ndər dəma ndara ndə kəkəng ngha? Dəhə ka ənga, cho fa'aki na dəhə sə'inda ya sa ɓwaɓwatər məra ga tsəməti tə dunəya na. Kərnya ngə ma'a ɓwa'atanyi. 20 Aka ənga, ɗəfwa ya tə tsəya dzə təkəra dəhə tlər ɓwaɓwatə nda ya mər tə dunəya na. 21 Ndə kwa mərtə tlər nyi na dəma, zəndi ba'a nawəu, kəl ja, tuku kəl cha ngyganyi ni nə vanya ndə pa'a da sa ɓwaɓwatə təkəri. A sakədar ngə da tsəu wa, ya pəla'akur nga. 22 Mi zhar nda ndə kwa uya aku tlər nyi, ana dəhə chul ɓwaɓwatə nda ndə kwa sa ku tlər nyi nə ngyar dunəya na? 23 Aka dəhə hanyi ndə, ɓwaɓwatə tanyi nga, tlər nyi tsəu huɗətla tanyi nga. Vəl, ma'a vu'i a ɗəfwa cha da kwa piya wa. Ngə ma'a, ɓwa'atanyi.
24 A vanya sə da mənakə nə ndə matsa cha səma, cha sa ana cha ngatə məsəɗakəkur na tlər nyi wa. Ngə la'a ngə ma'a tsa Hyel hya'atə cha, 25 aka ma'a nacha wa ya, wa kwa nau səma kwa ngatə məsəɗakəkura? 26 Hyel kwa nənyi, dəma, zəndi ana hirgyaɗi ana ndə nda tə mər sənda Hyel kwa i. Kəl ja, Hyel kwa ngyanyi ɓwaɓwatər gwa'a ana tsəma anə ndər mər səpəla'a, ga cha nənyi nə ndə nda kwa mər sənda Hyel kwa i. Kərnya ngə tsəu, ɓwa'atanyi, gwa'a sə ngyang tanyi nga.