Dəma kwa Ɓəlatə Nghə tsa Kasalikur
7
1 Zər ɗa, gəzəya ɓwanya ɗa, ka ɗəwanda tsaubar ɗa ku ɗufwa ka.2 Ɓəlatə tsaubar ɗa ko ɗa na pi, gəzəya dlədləɓə ɗa, wi nda ko ɓəla lya ka.
3 Mbiya nda tə cha ka, ka tsəfətə tə təmbəl ɗufwa ka.
4 Nar nyi nə dəma, <<Kwamə ɗa ka.>> ka nar nyi nə ngabiya tsə, <<Bazhi ɗa ka nda ləhə.>>
5 Ndo ɓəlatə nghə tsa mala dləngha sal, a tsa mala vanya ndə nda ɓwanya məsəɗakəu ku ny cha.
6 Vanya bəji da yo ndzam təwa kagap vi ɗa,
7 ngə ya la'a aku pama nji kəla jigadəma, ya la'a vanya tlakala, vanya tlakala nda pa'a na jigadəma,
8 cho ma'i ku laku, ləhə dzər ki mala dləngha sal nda, cha yi təwa ki nyi,
9 ya pəchi təɗə ti, aku kutla.
10 Jan malakə tə zəbiya da cha, cha pədzə dzaki wi nə zawar, nda na ɗufu shakər nə nji.
11 Mala chuchuɗə cha gagaɗa, kala bəji cho nəu kəra laku.
12 Vanya pəchi njo la'a nyi təkəra laku, alenya bəji tsəu ku ta mələm, cho səkə shili.
13 Cha gəzəya zər tlakala ga gaɓətə nyi cho sa nya cha, cha ndzam gyo lya zər nda ga na,
14 <<Ənya na, ya handa təmachi, ya tsəu tanyi kum hatəmachi tsa ya.
15 Nakə ya zəbiya gwa'a. A i tiya ya uya ngha ya janə kə tangna.
16 A sətə tiya pa'ua linə nda na kala pampamə hya'atə vu Masar tə ngangər ɗa.
17 A wurtə ya ɓəsətə sənda kwa shi'uni kwitkwit nə mur ana aloyes tə ngangər ɗa.
18 Andə ma dləngha dzə vu'ivu'i, mo ngatə məsəɗa ku cha kərnəma.
19 Aka a sal ɗa da ku ki wa, cha məe ma'i naɗəu.
20 Cha hətə kwaba ualəu gagaɗa, a da cho shili wa kəl ghadar hya.>>
21 A ɓwanya məsəɗakə ɗanghəu cha təɗətə jigadəma zər nda, ana nya nənəm cha gwa'atə cha dləkəri.
22 Atə kusa'a cha nəu nyi, wi tla nda njo ma'i nə kyatə mbwar tlawulya, wi deer nda kwa fələ yi nya ləbam,
23 mbwanda masə kwa tahəya ɗufwa cha. A sə da təkə nda na eakə nda kwa kusa gwa ku ləbam wa, a da cha zəndə wa, cho tea.
24 Aka əngə ja zər ɗa, sədzə himi daya, fəu kəra kə ku ɓwanya nda yo dəka.
25 Ngwa kə ngyar chul mala nə təɗətə jigadəma nghə yo chul laku nyi wa,ngwa ka da nəu laku nyi.
26 ɗang tanyi nji'inda cha səwandə ngya kənda,, a da njo nau jigabiya nji inda tə kuɗə ku cha cha wa.
27 Ki nyi ngə ma'i kyakə njikə mambəl, nda kwa ma'i səya ku hwa.