6
1 Zər ɗa, ma vanya ndə tə tləya məl tsa bazhi ndara mihiɓi, ya ngə ka hətə salkur ənda ko kinda macha a ndə nda da nau kinda kwaba nda cha dləu nda wa,2 kustanyi ləbam salkur ngə ka hə ngə kwa səya ngha akasənda ka na ko mər na nya ka, wi ləbam cha a nəngha.
3 Aka əngə ja zər ɗa, a wurtə kə ɗa kiɗa gyalkur ndə nga, kəl ja, jan sənda ko mər ka ga həbəya kərngha, kusa ma'i yada cha, ka yi gədi nyi cha wunda ngha.
4 Ngwa da ngyar lya kə nda nji hanyi wa, ndara ka nənyi ɓəlsar nə dza kə wa.
5 Mbəɗandə kərngha, wi ngə eakə kwa dləuya dzə tə ləbam, wi ngə tə biya kwa mbəɗa ku cha ndər ha.
6 Ma'i yada chahu'i, nakəndə kukufəu, ka yi dlədləɓətə dəma ənda njo ngya.
7 A təl da tsa nda drara gau ndara ndər gyalkur wa,
8 dəhə ka ənga, ndo tsəm sərsumə nə kərnənda, ndo ɓatləy ka bijir tləka aka səyar jomən.
9 Haɗəwa, ba'asakami ko piya? Nawa ko dzəgwa hya'atə ku hanya?
10 Hanyi kushu, ndzamhanyi kushu, zər ɓəlsar kushiu,
11 əngə tanyi ɗali kwa shili tsatə ngha wi ngə ndər fa'avi kwa shili, tarə tsəu kwa shili i ndər həl.
12 Zər gyang gyang kwa ma'i cho tla gəzhi. 13 cho məch lya cha, cho cha sə na hya cha, cho har cha cha ga shandə nghə kər, 14 dəhə bəji ndo haɓə sə ɗimi ku ɗufwa nda, nda kwa tlə mwali kala mbwa.
15 Aka ənga təmachi kwa ghahəya nda a da na zəndəkur kənda wa, ndo uya takasə 'ualualəu a lakur mbəɗə da wa.
16 Alenya sə da i'i kwa nda Tlakə kwa ɗa tsari, aa, sə məɗəfə inda cho həɗə tsari. 17 Nnjir ndzam alenya nji hiɗahiɗa, njir tla gəzhi, ana chi inda kwa pənda mashi nji kəla bikəu, 18 ɗufu nda kwa haɓə sə ɗimi, 19 ana matauli gəzhigəzhi, ba'a njir tlə pah ku pama ka zama.
Təɗəhimi təkəra Kasalikur
20 Zər ɗa, ɓəlatə tsaubar ada ngha,
ngwa ka da far na sənda ama nghə tə dlədləɓətə nghə wa.
21 Ka gəzəya nda ku ɗufwa kə na dunama ba'anawa, ka huləya nda tə wulya ka.
22 Ma ko ma'i ndo nəuna ka, ma ko njihanyi ndo ɓəlatə ngha, ma ka hya'atə ndo ndər na ka.
23 Aka tsaubar ina, təkəsə cha, dlədləɓə nə tsəu vimbəlmbəl na, təɗəhimi inə tsəu kwa dəkətə nghə ənda ko ngya,
24 kwa tsanda pama kə tsa mahi'i ɗimi, ana ɓwanya məsəɗakə nda mala vanya ndəu kwa dəka.
25 Ngwa ka da chim ka piya na mala vanya ndə ku ɗufwa kə wa, ndara ka ngya nyi cha təpɗətə jigadəma nghə na lya cha wa.
26 Ka zəndi, ko nau uya zawar ana kwaba kushiu, kəl ja, ma ka piya na mala vanya ndəu, kwa gwa'atə njo tsəya ngha.
27 Kwa nau kə tau hahir ku mbəl hatlakə ya a da kwa ngiya nghə wa ya?
28 Ndə kwa nau ma'i tə hahir kəla hya cha tə tə nginda dzə ya?
29 Əngə tanyi kwa ɗa ndə piya na mala vanya ndəu, a da cho mbəɗə wa.
30 A nji da kwa həyatə ndə nda həl aka huɓə kwa tə nyi wa.
31 Dəhə ka ənga, ma nja səya nyi, tuku kəl nacha ɓlandə sənda zhaka məɗəfa, mada nacha tar dəhə sə'inda ku ki nyi.
32 Kəl ja, ndər piya na mala vanya ndəu nənyi a kəra cha da wa, tsa nda cho tsa kərnyi.
33 Cho sa dəga ana sərkuzhi, ya kuzhi da kwa təkə nacha pa'a wa.
34 Aka səlkəkur kwa hya'abiya huɗətla sal, ya a da cho ngatə təhuɗə ma cho kisəkur wa.
35 A da cho dləu kwaba ka sənda nja mərtə nyi wa, mada aman nja ɗa, a da cho dləu vangula wa.