Təɗəhimi təkəra Kasalikur
5
1 Zər ɗa, səzə himi da dəma ɗa, mbəɗiya hima ka ka ngatə sənda yo dlədləɓə nəngha,2 ga ka zəndi ənda ko mər dəhə sə tsatsa'a, ana ɓwanya nghə kwa char ənda kwa zəndə kə səu.
3 Aka ɓwanya mala vanya ndə nda kwa mər kasalikur mwamwa chiɗi, ɓwanya nyi tsəu, kuɓətə wi mal ɓəsa.
4 Kəl ja, atə udyanyi a sə da cho ngyan ni wa kəl ɗəwatəkur, cho dzavə ngha wi na katsakər.
5 Hya cha kwa ma'i kyatə mwar haɗə nji, ma'i nyi kwa təra go hwa.
6 A da cho ɗəngha na lakur pi wa,
a laku da tandar wa,
kəl ja, a da cho zəndə wa.
7 Sakan ja zə ɗa, sədzə himi da ya, ngwa ka da təkə na sənda dəkə wa.
8 Ɗa naɗəu tsa chul mala nga, ngwa da ɗa ləhə dza nyaki wa,
9 tsa dumanghə da wur təkəra alenya nji, ka ba'a tə tsəu kə tlakala ku nji kəla ngatə təhuɗəu.
10 Jiri mihiɓi kwa fa'anda gəna ngha, sənda ka sa ɓwaɓwatə təkəri kwa ɗa ka vanya ndəu.
11 Ko tah, ku ɓwaɓwatə gagaɗa, ahir shilkə tə ɗəbiya ngha,
12 kəl ko na, <<Mya gwa'atə ya ngyar dləu ɓatla? Mya gwa'atə ɗufwa ya tə ngyar ngatə təɗəhimya?
13 Mya gwa'atə a da ya səhimi da ka maləm ɗa wa? Mya gwa'a a da ya səhimi da njir dlədləɓə na'a wa?
14 Jan ya ɗatə ləhə dza tah, nəchana ɗa tə ya ləhə dzər sa sər kuzhi a mar nji.>>
15 Ngatə məsəɗakəkur na mala zhang tanyi, kəl ku dəl nghə tanyi ko sa ɓiti, ɓiti mənakə hya'atə giɗa ngha.
16 Wi ngə a da ko kikilnda ɓiti mənakə təwa shanda ku laku wa, əngə tanyi tsəu ngwa ka da ba'a piya na alenya mahi'i wa.
17 Ngwanda ɗa ka nəngha, a da hyo təkəya kə'i mihiɓi wa.
18 Mala ngha cha ɗa ka sənda kwa shili nanghə hirgyaɗi. Mər hirgyaɗi na mala nda ka hə təkə tlakala.
19 Gumaguma cha gagaɗa ya mənakə ka ndzamə wi malamalar diya, ngyarə 'ua cha nə nghə hirgyaɗi kala biji, tsəu cha hənda jigadəma nghə na nyida nyi.
20 Zər ɗa, kami ko ngyar mala kasalikur kwa hənda jigadəma ngha? Kami ko gaɓə mala vanya nda?
21 Aka Tlakə kwa la'a cha dəhə sənda ndə kwa məra, kwa ndzam cha laku nda ndə nəuwa.
23 Cho tah aka a da kwa nau na a'a wa, jigadəma nə kəkəngkur kwa təɗəkə nyi tah.