Dəma ngə dəgaləu
4
1 Zər ɗa səzə himi da sənda ada nghə kwa dəka, fəu kəraka ka uya ngabiya.2 Sənə ya kwa dlədləɓə nənghə nə mənakəu, aka ənga əngwa da ngyar tsaubar ɗa wa.
3 Sakanda ya zər kushu, aku ki ada ɗa, naya ngə huɗəkər zər ama ɗa, njo nyida gagaɗa,
4 Ada ɗa dlədləɓə na'a ga na, <<Fiya ɓwanya ɗa ina ku ɗufwa ka, ma ka ɓəlatə gadlagadla ɗa, pya ka kwa ɗa pələkəu.
5 Uya dəma, ka uya ngabiya, əngwa far na ɓwanya ɗa ndara ka tyati tsari wa.
6 Əngwa far na dəma wa, nacha tsəu cho gəzəya ngha,
nyida nyi, nacha tsəu cho ɓəla ngha.
7 Sənda tə ndiya dəhəu, nacha ngə ka uya dəma.
mada mi sənda ka uya, uya ngabiya.
8 Maka la'a səli nyi, cho hətə nghə shi, maka gəzəya nyi cho nə nghə səli.
9 Cho ɗa ka dora dəgalkur ku kəraka ana wi pahuɗə mbakər nda na səli.>>
10 Zər ɗa, səya himi, ka dləukər sə nda yo dəka, fa nə pyaka kwa ɗa ɗanghəu.
11 A dəkətə nghə təya aku lakur dəma ana ya nəuna ka ku laku tsatsa'a.
12 Ma ko ma'i. a sə da kwa gəzəya hyakə wa, ma ko hwi, a da ko tləhi wa.
13 Gəzəya dlədləɓə inə mənakəu, ngwa ka da təkə ni wa, ka ɓəlatə nyi mənakəu, aka na ngə pya ka.
14 Əngwa da fə hya ka ku lakur nji pəla'a ndara ka ma'i ku lakur nji pui wa.
15 Tyati nda, ngwa ka da mər ma'i kwa pa'a wa, shanda bama kə tsari, ka mər ma'i ngha.
16 Aka a da ndo njihanyi wa, kəl nanda mər pəla'akur, a da ndo dzamhanyi wa, kəl nanda gwa'atə vanya ndə tə dla.
17 Pəla'akur ngə sərsum kənda tləmwali tsəu, nacha ngə sər sa kənda.
18 Lakur ndər jiri wi zədərpəchi cha, vicham nyi kwa tsaka kəl cha nda həbiya dəhə vimbəlmbəl nyi.
19 Kəl ja, lakur nji pəla'a wi kutlə ɗimiɗi cha, a da ndo zəndə sənda kwa shili na nda tləhi wa.
20 Zər ɗa, fəu kərakə ku sənda ya dəka, sədzə himi da ɓwanya ɗa.
21 Ngwa kə i ka təkə ni wa, chiu nda ku ɗufwa ka,
22 aka pi nda a nə njni'inda tə uya nda ana yiyingkur nə dəhə dza ndəu.
23 Ɓəlatə pyakə ndiya dəhə səu, aka nacha ngə tsədzəɗə pi.
24 Təkəbiya dzə ɓwanya guɗəguɗəu ku nya ka, ətsəu ka təkə na nya mətləu.
25 Ngwa lyakə dzam biyama, təkəra sənda biyama ngha, ngwa kə da sha bangtiti wa.
26 Nəu laku tandarəu, ana ka nəu kəl lakur jiri.
27 Ngwa kə da sha təwa chisəm ndara matsal wa, ɗəmbiya hya kə ku lakur pəla'akur.