Kərapə Saloman
10
1 Ja'inə kərapə Saloman:Zər nda na dəma kwa shili na nyi hirgyaɗi nə ada nyi,
zər kəkəng tsəu, sər huɗətla cha a nə ama nyi.
2 A sakədar gəna nda nja ɓutə ku laku ɗimi da wa,
kəl ja, ngya tsatsa'a kwa mbəɗandə ndə tsa tah.
3 A Tlakə da kwa ngyar ndə tsatsa'a cha ngya na huɓə wa
kəl nda cha kwa wazənda sənda nji pəla'a tə haɓəti.
4 Haɗəwakur kwa shili na ɗali,
kəl ja, chi nda kwa i tləra, kwa shili na gəna.
5 Zər nda na dəma, kwa mərəta səzwazwa bəjir fwakəu,
kəl ja, zər nda kwa njihanyi bəjir fwakəu, sər kuzhi cha.
6 Hyel kwa səkənyi papa'akur nə nji'inda kwa ngya tsatsa'a,
kəl ja, ɓwanya ndə pəla'a kwa mbunda pəla'akur nyi.
7 Njo ɗənghatə na nji mənakə wi papa'akur,
kəl ja, tləmər ndə pəla'a kwa sa.
8 Nji'inda na dəma kwa mər hirgyaɗi ma nja dlədləɓar nda səu,
kəl ja, ndə nda kwa pə ɓwanya kəkəngkur kwa səwa.
9 Nji'inda ngya kənda mənakə kwa ngya yiyinghəu,
kəl ja, Hyel kwa səya nji kəla jiri.
10 Ndə nda kwa ngyar dəkə jiri, kwa shili na ɓwaɓwatəu,
ndər ɓwanya ku kəkəngkur tsəu kwa səwa.
11 Nya ndər mər tsatsa'akur, ɓitir pi nga,
kəl ja, ɓwanya ndə pəla'a kwa mbunda pəla'akur nyi.
12 Hatred kwa gwa'atə njo pah,
2kəl ja, nyida kwa farə na dəhə bikəu.
13 Aku nya ndər ngabiya njo uya dəma,
ndə kəkəng nənyi kəl wuɗa.
14 Ndər dəma kwa gwa'a zəndi,
kəl ja, ɓwanya ndə kəkəng kwa shili təmachi.
15 Ɓangtili ndər gəna nacha ngə gəna nyi,
kəl ja, ɗali, ɓwaɓwatə nga a nə ndə kəla dunama.
16 Zhar ndər mər tsatsa'akur nacha ngə kwa nə nda pi,
kəl ja, sənda ndər mər səpəla'a kwa uya, nacha ngə cha tsakətə mər səpəla'a.
17 Ndə nda tə dləukər na ɓwa kwa uya pi,
kəl ja, dəhə ndə nda tə ngyar dləu ɓatla cho sah.
18 Ma ka mbunda hetred ngnha, ko ɗa ka ndər tlagəzhi,
ngəl alenya nji tsəu kwa mərtə nghə kəkənghəu.
19 Ma ɓwanya tə ɗa ɗanghəu, a da njo har səpəla'a kwa wa,
ndə nda ɓəlatə kyara cha, ndər dəma cha.
20 Ɓwanya nda kwa biya ku nya ndər mər tsatsa'akur wi tsa'amunya azurfa cha,
kəl ja, sakədar ɗufwa ndə pəla'a kushi tanyi.
21 Ɓwanya inda kwa biya ku nya ndər mər tsatsa'akur kwa ɗa na vala nə nji ɗanghəu,
kəl ja, ndə kəkəng kwa tah aka tar jigadəma.
22 Papa'akur Tlakə kwa shili na gəna,
a mər tlər ualual da kwa shili na gəna wa.
23 Ma ndə kəkəng kwa la'a pəla'akur wi tələ nga,
kəl anə ndə nda tə ngabiya, dəma sə mənakə cha.
24 Sənda ndə kəkəng kwa ləvəra nacha ngə kwa uya nyi,
sənda ndər mər tsatsa'akur kwa chimə tsəu, cho uya.
25 Ma madza tə shili, cho marə njir pəla'a,
kəl ja, njir mər tsatsa'akur kwa ngya ba'anawa.
26 Wi sə mwamwalə nə hir ana ear nə li,
əngə haɗəwa anə ndə nda kwa nə nyi tləra.
27 Lvər Tlakə kwa tsakətənyi hanyi nə ndəu,
kəl ja, hanyi ndə pəla'a kwa tashiya dza.
28 Sənda ndər mər tsatsa'akur kwa fəkər da kwa shili na hirgyaɗi,
kəl ja, a sə da sənda ndə pəla'a kwa fəkər da kwa yiyah wa.
29 Tlakə kwa ɓəla njir jiri,
kəl ja, cho kuɗənda nji'inda kwa məe sə ɗimi.
30 A səda kwa tsəkar ndər mər tsatsa'akur wa,
kəl ja, a ndə pəla'a da kwa nau ngya tə hə'i nda wa.
31 Ɓwanya ndər mər tsatsa'akur kwa shili na dəma,
kəl ja, njo hənda kyar nda kwa pə sə ɗimi.
32 Kyara ndər mər tsatsa'akur kwa zəndə cha sənda tə ki,
kəl ja, kyara ndə ɗimi nənyi kəl sə ɗimi.