Papam Mapi(Silva)
10
1 Ngə Tlakə tə nar nyi nə Musa, 2 <<Dləbiya papam mapi tsa'a mətləu, nacha ko mər tlər aka tsəm nji, ma hyo hya'atə ka ngyar mbwa, ana ma hyo hya'atə ka təra. 3 Ma nja mɓəɗiya tsa'akya'a, dəhə njir mələm kwa tsəmtədzə biyama nghə tə nya Madləɓa Tsəmdza. 4 Macha zhang tanyi nja mbəɗiya, kəl njirawawa'a ka nyavi ka nyavi ngə kwa tsəmtədzə biyama ngha. 5 Ma nja mbəɗiya papam ngə tsa'u tanyi, nyavi nji inda təwa zədərpəchi kwa ghəya təra. 6 ma nja mbəɗiya mətləkunyi, nji inda na ngya təwa holma kwa hya'atə ka təra. Mbəɗə papam ngə ngə kwa ɗa ka muniyar hya'atə ka təra biyama. 7 Ma njo gwa'a tsəmiya nji, nja mbəɗə papam, kəl ja, ana kurakə pam matsa nə hya'a nji ka ngyar mbwa.8 <<Nguli shili Haruna inda pərist ingə kwa mbəɗə papam inga. Tlər kəhi ngə nacha nga ana dəhə nyandəla hi ba'anawa. 9 Ma hyo biya ki dla'a njir dawa inda ɗaməməndza'u na hi ku hə'i kəhi, hya mbəɗiya papam i'i, məlna Hyel Tlakə kwan ɗənghatə na hi ba'a cha dləuya hi tsa njir dawa kəhi. 10 Əngə tanyi tsə'u a tə bəji nda hyo ngatə məsɗakəkur ti, hya mbəɗiya papam i'i ma hyo mər ladər kəhi i'i ana ladər Taɗər Hya, hya mbəɗiya papam i'i təkəra sərhatəmachi nə nginda ana sərhatəmachi daɓəkər, ga cha ɗa ka sər ɗunghatə nə hi a mar Hyel kəhi. Naya ngə Tlakəu, Hyel kəhi.>>
Njir Isra'ila tə Ngyar Mə Sinai
11 Pəshir hya mətlə tə zəbiya hanyi mətləkumnyi ku mətləkunya fa, ngə ləmbəkə nda tə hya'atə təkəra Madləɓa Mbandər nda. 12 Ngə njir Isra'ila tə ngyar Dadil Takə Sinai nda ga ghəya ma'i ka mbwa ka mbwa ba'a tə bəji nda ləmbəkə nda tə shili ta'i vu tə Dadil Takə Paran. 13 Nənnə ngə tangərmar nda nda ghəya ma'i wi nda Tlakə tə tsau nda bar təwa nya Musa. 14 Dzukə Nyandəla Yahuda inga ghəya biya təra ana tatawal kənda biyama, Nashon zər Abinadab ngə gau kənda. 15 Gau nda təkəra dzukə nyavi Isaka, nacha ngə Netanel zər Zuwar. 16 Eliyab zər Helon tsə'u nacha ngə gau nda təkəra dzukə nyavi Zebulon. 17 Ngə nja waziya madəɓa nda, ngə nyandəla Gashon ana Merari, nji inda kwa fa'a madləɓa nda tə go laku. 18 Ngə dzukə Nyandəla Roben tə nəundzə nda mətləkunyi ana tatawal kənda biyama, Elizur zər Shedeyur ngə gau kənda. 19 Gau nda təkəra dzukə nyavi Simiyon, nacha ngə Shelumiyel zər Zurishadai. 20 Eliyasaf zər Diuyel tsə'u nacha ngə gau nda təkəra dzukə nyavi Gad. 21 Ngə nyavi Koha tə nəundzə nda, nda fa'atə kar inda karti, aka təvi ndo yi a kukuya tə nji madləɓa nda. 22 Ngə dzukə myandəla Efərem ngə makərkunya nji inda tə nəundzə nda ana tatawal kənda biyama, Elishama zər Ammihud ngə gau kənda. 23 Gau nda təkəra dzukə nyavi Manasa, nacha ngə Gamaliyel zər Pedazur. 24 Ahidan zər Gideoni tsə'u nacha ngə gau nda təkəra dzukə nyavi Banyami. 25 A tə bata, ngə dzukə nyandəla Dan tə go laku ana tatawal kənda biyama, aka nanda ingə njir tsakəra dəhə dzukə ingə biyahi. Ahiyezer zər Amishadai ngə gau kənda. 26 Gau nda təkəra dzukə nyavi Asha, nacha ngə Pagiyel zər Okran. 27 Ahira zər Enan tsə'u nacha ngə gau nda təkəra dzukə nyavi Naftali. 28 Təwa ingə ngə nja bərdliya ka dzukə ka dzukə njir Isra'ila nda nda biya ka təra.
29 Ngə Musa tə nar nyi nə ghəm nyi Hobab zər Reyuwel sələkənya Musa ndər Midiya, <<Janə eo təra kyatə mbwa nda Tlakə tə nar ea, cho nə ea. Amən təra kə'i ka, ya eo ki charə nghə mənakəkur, aka Tlakə mərtə nyi tə alkawal mənakə nə njir Isra'ila.>> 30 Kəl ja, Reyuwel tə wum ga na, <<A'a, a da yo ma'i wa, yo təra kyatə hə'i ɗa, a ya da njikə ea.>> 31 Ngə Musa tə nar nyi, <<Maki, ngwa ka ngya ea wa. Kwa zəndə kə mbwa nda eo ki ta'i tə tə dadil takəu, eo i ka charə ea laku. 32 Ma məna ma'i kə'i ka, məno ki təkəya dəhə sə mənakə inda Tlakə tə nə ea.>> 33 Ana ənga, ngə nda hya'atə dza mə Tlakə ga ma'i ɓupuchi makərəu, njir hə Gwarara Mbandər tsə'u kwa ma'i biyaman nda hanyi makər nda, ka charə nda mbwa nda ndo ta'i ti. 34 Ləmbəkə Tlakə kwa ma'i ki kəra nda ma ndo ma'i a ba puchi, ma dəhə bəji nda ndo ngyar mbwar tsəmədze kənda ti.
35 Ma dəhə bəji nda njo biya təra na gwarara ti, kəl Musa kwa na,
hya'atə ja Tlakəu!
məlna njir dawa nghə kwa wiɗa
məlna tsə'u njir ɗa tsa kə kwa mə na hwi.
36 Ma dəhə bəji nda njo fiya tsə'u, kəl cho na,
Maki Tlakəu! Ɓəl shili,
ɓəl shili da njir Isra'ila dəbu dəbu
nda pa'a nji kwa nau jigabiya.