Ladər Dləngəlnda
9
1 Aku tangərmar hya nə mətləkunya fa, ahir nda njir Isra'aila tə zəbiya vu Masar, Tlakə tə ndər na Musa aku Dadil takə Sinai, ga na, 2 <<Nar nyi nə njir Isra'ila nda səm ladər dləngəla, atə bəji nda nja fiya. 3 Pishir hanyi kwabəfwaɗəu nə hya na, aba akəu, məlməl na tsaubar ana gadlagadla nda nja nə hi.>>4 Ngə Musa nar nyi nə njir Isra'ila nda ɓəlatə Ladər nə Dləgəlnda, 5 kəl ngə nda ɓəlatə Ladər Dləgəlnda nda tə Dadil Takə Sinai tə pəshir hya zhang tə zəbiya hanyi kwabəfwaɗəu abakəu. Njir Isra'ila tə mərtə kala səu tang wi sə nda Tlakə tə tsau nyi bar nə Musa.
6 Kəl ja, alenya nji tə səm Ladər Dləgəlnda nda pəshi nda wa aka nda tsəkar ndə tətah, nga mərtə nda hiɗahiɗa. Ana ənga nda təra ya mar Musa ana Haruna 7 ga nar nyi nə Musa, <<A ɗatə ea hiɗahiɗa aka ea tsəkar dza ndə tətah, kəl ja, mya gwa'atə njo katə ea tsa shili na ga'a mar Tlakəu na ea ka kuvanəea njir Isra'ila?>>
8 Ngə Musa tə nar nda, <<Səkar ɗa ma, məlna yo jaubiya tsaubar nda tə kəra hi tsa Tlakəu.>>
9 Ngə Tlakə tə nar nyi nə Musa, 10 <<Nar nyi nə njir Isra'ila, <Ma kala ndə zhang kəhi ndara nyandəla hi tə ɗa hiɗahiɗa təwa tsəkar dza ndə tətah ndara ma'i tə hənda nyi, ndo nau səm Ladər Dləgəlnda Tlakəu. 11 Nda mər nəkənda tə hya mətlə kwa zəbiya hanyi kwabəfwaɗəu abakəu. Nda ɗə zər gam nda, ana gwazhilakə kəla tləlam ba'a heli ɗəwatəu. 12 Ngwa nda ngyar mada kushə cha hanyi wa, ya ngwa nda da ɓəliya ɗəhi nyi wa. Hya ɓəlatə dəhə tsaubar Ladər Dləgəlnda. 13 Kəl ja, ma ndə nda da hiɗahiɗa wa, ya a ma'i da hənda nyi wa, ya ngə cha ngyar səm Ladər Dləgəlnda, nja həbiya nda na ndə ku huɗa njikə nda aka a da cha shili na ga'a nyi nə Tlakəu atə bəji tsa'atsa'a wa. Səpəla'a ndə wi ngə kwa ngyatə kəra kərnyi.
14 << <Ndə shilishili nda na ngya ku huɗa ndo i cha səm Ladər Dləgəlnda Tlakəu, tuku cha ɓəlatə tsaubar ana gadlagadla inda təkəri. A pam da ku gadlagadla təkəra ndə shilishili ana ndə nda ujəl wa.> >>
Ləmbəkə Kyatə Kəra Madləɓa
15 Peshi nda nja kukuya madləɓa nda, nacha ngə Madləɓa Mbandəra, ləmbəkə tə səya haɗiya. Fwatə akəu ba'a nə mbudla, ma njo la'a madləɓa nda wi hu'u kaɓəkaɓa. 16 Əngə tanyi tə ɗa wa'atanyi, ləmbəkə a ba puchi, abakəu ma njo la'a wi hu'u. 17 Ma dəhə sakanda ləmbəkə nda əngwa təkəra madləɓa nda, kəl njir Isra'ila kwa ngyar mbwa nda. Ma mbwa nda ləmbəkə nda tə ki ta'i tə tsəu, ba'a nda ngya tangnda. 18 Ma Tlakə tə na nda ngyar mbwa, ba'a nda ngyari, ma cha na tsə'u nda ngyatə mbwa, ba'a nda ngya. Matə wur ɗa ləmbəkə da kyatə kəra madləɓa nda, tangnda ndo ngya. 19 Mada na ləmbəkə nda tə bəji 'ual kyatə kəra madləɓa, əngə tanyi ndo nəu nya Tlakəu, a da ndo ngyar mbwa nda wa. 20 Alenya bəji, ləmbəkə nda kwa ngya hanyi yiɗau tanyi kyatə kəra madləɓa nda, wi sə nda Tlakə kwa i, ndo ngya tə mbwa nda, ma Tlakə tə tsau nda bar tsəu, ba'a nda ngyar mbwa nda. 21 Alenya bəji ləmbəkə nda kwa ta'i fwatə akəu ba'a nə mbudla tanyi, ma nja hənda a ba mbudla, ba'a nda ngyar mbwa nda. Mada a ba puchi ndara a ba vu'i, ma nja hənda ləmbəkə nda, ba'a nda təra. 22 Mada ləmbəkə ta'i təkəra madləɓa nda nə hanyi mətləu, ndara a hya zhang, ndara fa zhang, əngə tanyi njir Isra'ila kwa ngyatə mbwa nda, a da ndo hya'atə wa, kəl ja, ma nja wur hənda, ba'a nda ngyar mbwa nda. 23 Ma Tlakə tə tsau nda bar, ba'a nda ngya, ma Tlakə tə tsau nda bar, ba'a nda hya'ati. Nda nəu gadlagadla Tlakəu, wi sə nda cha tsau nda bar təwa Musa.