Ənda Njo Fə Chakai Təkəsəu
8
1 Tlakə tə nar nyi nə Musa tsəu, 2 <<Ndər nə Haruna ka nar nyi, <Ma ko ɓatlə mwar hakə təkəsə məɗəfa inga, ka ɓatlətə nyi cha mbələ biyama mbwar hakə inda.> >>3 Ngə Haruna tə mərtə wi nga, cha fiya təkəsə inda kwa ndzamndzə biyama atə sər hakə təkəsə, tang wi nda Tlakə tə nar nyi nə Musa. 4 Janə ənda nja ɓatlə chaka'i təkəsə inda, nja mər na bəjingha, fwatə dəl tsa'a kyo kər. Nja məra tang wi sənda Tlakə tə char nyi nə Musa.
5 Ngə Tlakə tə nar nyi nə Musa 6 Ɗəmbiya njir nyavi Levi ku huda njir Isra'ila, ka dzəviya nda nda chaməu. 7 Janə ənda ko chinda nda, ka uchə kənda ɓiti nda kwa mərtə nda chaməu, ka nar nda nda sənda dəhə shishi nda dzən nda, nda chinda lukutə kənda, təwa ənga ndo ɗa chaməu. 8 Ka nar nda nda shili na zər daləu ana upə zhizhi kuɓutə nda nja zukutə na mal. Nakə tsə'u ka hətə vanya daləu ka hatəmachi nə hənda səpəla'a. 9 Ba'a ka ta'ində njir nyavi Levi biyamar Madləɓa Tsəmdza ana ka tsəmiya dəhə njir Isra'ila. 10 Ma ka tsəmiya njir nyavi Levi biyamar Tlakəu, ba njir Isra'ila fəkə nda chi. 11 Haruna ngə ndə nda kwa ta'ində njir Levi biyamar Tlakə ka sərhatəmachi nə vyalari ku huɗa njir Isra'ila. Ana ənga, tuku nda batliya kərnənda ka mər nə Tlakəu. 12 Mar njir Levi tə pəti cha nda tə kəra gyal tla inda, ka handa təmachi na vanyi aka sərhatəmachi nə səpəla'a nə Tlakəu, vanyi nda tsə'u aka sərhatəmachi chulkə nə nginda, ga nja hənda səpəla'a njir Levi. 13 Ka ta'ində njir Levi a biyamar Haruna kə'i nguli shili nyi, ba'a ka dzəvəya nda aka sərhatəmachi nə vyalari nə Tlakəu. 14 A təwa əngə ngə ko dzəvəya njir Levi ku huɗa njir Isra'ila, aka ənga, njir Levi kwa ɗaka na'a.
15 <<Ahir ma ka chinda njir Levi ga dzəvəya nda aka sərhatəmachi nə vyalari, təwa əngə ngə ndo dzəgwa ɗa aka nji inda kwa nau shili mər tlər kənda ku Madləɓa Tsəmdza. 16 Aka nanda ingə njo na'a dza'a ku huɗa njir Isra'ila, ndo mər tlər na'a, a hətə nda tə ya aka yar tangərma nə kərɗa. 17 Kala yar tangərma ku Isra'ila, ndara ndəu ndara sərshishi, na'a nga. Nda ya kuɗənda yar tangərma vu Masar, ya piya nda aka kərɗa. 18 A hətə tə ya njir Levi ga dzəvəya nyi nə kərɗa aka yar tangərma ku njir Isra'ila. 19 Ku huɗa njir Isra'ila dəhəu, a hətə tə njir Levi ga nə nyi aka ga'a nə Haruna ana nguli shili nyi, aka nda mər tlər na'a ku Madləɓa Tsəmdza təvira njir Isra'ila aka mər mirga, məlna a məwuvə nda kwa shili təkəra njir Isra'ila ma nda shili tanda ləhə dzər mbwa karti wa. 20 Ana ənga, ngə Musa ana Haruna ba'a dəhə njir Isra'ila tə mərtə nyi nə njir Levi tang wi nda Tlakə tə tsau nda bar. 21 Ngə njir Levi tə mərtə kərnənda karti ga chinda dzaki kənda. Ngə Haruna tə dzəvəya aka sərhatəmachi nə vyalari mar Tlakəu ga mər mirga təkəra nda aka chinda nda. 22 Ahir nga, ngə njir Levi tə gwa ghəya mər tlər kənda ku Madləɓa Tsəmdza a da kiɗa gyalkur Haruna kə'i nguli shili nyi. Nda mər tlər kənda tang wi nda Tlakə tə tsau nyi bar nə Musa.
Tlər Njir Levi
23 Ngə Tlakə tə nar nyi nə Musa,
24 <<Janə sə nda təkəra njir Levi, shili nda fa kənda kwa ɗa mətləkumnyi parnya tufu ndara ndiya, nanda ingə kwa shili mər tlər ku Madləɓa Tsəmdza, 25 ya ma fa kənda tə ɗa tufukumnyi, tuku nda fiya tlər nda nda tsəlna məra, ngwa nda tsə'u tsakətə mər tlər wa. 26 Ndo nau vala kuvanənda njir Levi na tlər ku Madləɓa Tsəmdza, kəl ja, ngwa mər tlər na kərnənda wa. Əngə tanyi ja, ənda hyo nəu na tlər njir Levi.