Nja Huhuni ngə Tlakə tə Pəkə Nda Hu'u
11
1 Nda nji tə ghəya huhuni nə Tlakə təkəra ɓwaɓwatə nda nda gwa kwa, ngə huhuni nda tə tsafətə ɗufwa Tlakəu. Ngə hu'u Tlakə tə siya kwa gəɗə ku huɗa nda, ga nginda alenyi nji biya tə nyachira mbwar tsəmdzə kənda nda. 2 Nda nji tə tiwi nə Musa, ngə cha pətlənya nə Tlakəu, təma ngə hu'u nda tə tah. 3 Ngə nda nga tləmər mbwa nda Tabera, aka hu'u Tlakə tə gədə ku huɗa nda.Tlakə tə Pətə nda Takulashiu
4 Ngə alenyi nji shilishili inda ku huɗa nda tə ghəya chi alenya sərsuma, əngə tanyi tsə'u njir Isra'ila tə ghəya ləla, ndo na, <<Zhindar kum kwa tə ea! 5 Eo ɗənghatə na kalfi inda ea kwa səm ga'a vu Masar, janə ma'a kə'i chil, wadla, gambiɗəku, atəm ana atəm shan. 6 Kəl ja, janə sakana kəl yugwa'a yugwa'akura mən. Atsə'u vanya sərsum da wa kəl manna na.>> 7 Manna wi mali cha, ibizəribizər cha tsə'u wi dəmal. 8 Njo biya ki tsəma, ba'a nja ha'agwa tə bəra, ma'a əngə wa njo tassiya ku ndzur. Ndo nau tagu ku təm, ma'a əngə njo səltə wi waina. Ma ka ɗari mehiməhi wi sə nda nja ta na mal zaitun. 9 Manna kwa pəpə siya kya huɗamələm tsa'a na kuchikəpa a ba vu'i. 10 Musa tə ngatə ənda nji kwa huhuni ku ki kənda i'i, kala ndə kwa huhuni tə nya madləɓa nyi. Səsə nyi tə gwa'atə huɗa Tlakə tə tsafə gagaɗa, ngə səsə nyi tə wendə Musa ma'a nacha. 11 Ngə Musa tə nar nyi nə Tlakəu, <<Mya gwa'atə ka həkə nyi chul təmachi nə nə mava ngha? Mi sə nda ya tliya huɗa kə ni, janə ka fəkə ɗa ti dəhə nji ina? 12 Naya na hə huɗə dəhə nji inə ya? Aa naya na yah nda ya? Mya gwa'atə ka na ya fa'atə nda mar ta ya, wi ngə mala zər kwa hə zər, kyatə hə'i nda ka mərtə nyi alkawal təwa səmfəla nə kə'i jival kəndaa? 13 A man yo uya nyi kum nə dəhə nji ina? Aka tiwi tanyi nə ndo tiwi tə kəra ya, a bəra, <<Nə ea kum ka eo ɗəa.>> 14 A da yo nau həkəri dəhə zəmər nji inə tə kəra ya wa, aka tədəɓəkura nda ndəɗətə dunama ɗa. 15 Macha ənə tanyi ko mər na'a, tsəya ɗa sakana, macha uyatə ya kwambiyakur tə lya ka, aka a da yo i ya udə ku na'awa huɗatla wa.
16 Ngə Tlakə tə nar nyi Musa, <<Ɗəmətsə njirawawa'a məɗəfkumnyi ku huɗa nji Isra'ila, nji inda gau i'i ana njir gəla nji nda ka zəndə ku nji. Ba'a ka nar nda nda shili ku Madləɓa Tsəmədza, nda shili ta'i kə'i kə ku nda. 17 Naya Tlakə yo səya ɓwanya nakə ku nda, ba'a ya tatsə ku Shanguɗə nda ku ka, ba'a ya pəu nda Shanguɗə ku dza nda. Ndo vala nghə na hə ɓwaɓwatər nji inga, məlna a tsə'u ko həkəri zhangta nghə wa. 18 <<Ka nar nyi nə nji inda, <Chinda ma kərnəhi hya Ɓatliya aka zəkəu, hya kwa ɗə kum. Aka Tlakə ngatə tə tiwi nda hya tiwi nda, bəra, <<Wa kwa nə ea kum ɗə ja? Aka bəliya nda ea vu Masar!>> Aka ənga, Tlakə kwa nə hi kum, hyo ɗəa. 19 Hyo ɗə kum a da aka hanyi zhang, ndara hanyi mətləu, ndara hanyi tufəu, ndara kuma, ndara mətləkumnyi, 20 kəl ja aka tsakətlar hya, kəl nacha nda diya hi kər, hyo həɗə tsari, aka a ngyar tə hi Tlakəu, nda na ngya aku huɗa hi, aka hya tiwi huɗə nyi ga na, <<Zəm ya, mya gwa'atə məna ngyar Masara.>> > >>
21 Kəl ja, Musa tə na, <<Shili 600,000 ya kə'iri, ya ko na, <Yo nə hi ku hyo ɗə hya patlu!> 22 Njo uya kətəng kə'i tla indo nji ka njo tla kənda wulya ja? Ma nja təmbiya dəhə kalfi inda ku fa'a ja, kwa nyandə cha nji ina?
23 Ngə Tlakə tə nar nyi nə Musa, <<Gyalkur Tlakə kwa təutə cha ya? Yau, tsə'u ko la'a ndara sə ngə ya na ngə kwa nyabiyadza ndara a da wa.>>
24 Ngə Musa tə təra biya ga biya dəkar nda sə nda Tlakə tə na. Cha ngabiya njirawawa'a kənda məɗəfəkumnyi ga nar nda nda mbandə madləɓa nda kala ndə tə ta'i. 25 Əngə ngə Tlakə tə səya ku ləmbəkə ga səya ɓwanya nə nyi, ngə Tlakə tə uyatsə Shanguɗə nda na dunama ku Musa ga pəkə nyi nə njirawawa'a məɗəfəkumnyi inda. Nda Shanguɗə nda tə səya təkəra nda, ngə nda takər, kəl ja, a da nda zhaka nau takər ahir nacha nda wa.
26 Madangə nji mətlə nda, vanya ndə da na tləm nyi Eldad ana vanya ndəu tləm nyi Medad, nda biyama na ngya ku mbwar tsəmdzə nda. Nja jigau nda ku huɗa njirawawa'a inda, kəl ja, a da nda biya ga yi ku madləɓa nda wa. Dəhəka ənga, Shanguɗə nda səya tə təkəra nda, ngə nda takər ku huɗa nji tə mbwar tsəmdzə nda.
27 Ngə vanya zər duwal tə hwi ga biya nar nə Musa bəra, <<Ka Eldad ana Medad kwa takər ku huɗa nji.>>
28 Ngə Joshuwa zər Nun, ndə nda tsə'u cha zər kwa vala Musa, tə har kurakə ga na, <<Tlakə ɗa, Musa, ta'ində nda nji.>>
29 Kəl ja, Musa tə ɓəlakə, <<Ko ngatə shishi kənda tə dəbar ɗa ya? Chim ɗa nacha ngə dəhə njikə Tlakə kwa ɗa ka njir mətakər məlna Tlakəu kwa pəkə nda Shanguɗə nyi!>> 30 Ngə Musa ana njirawawa'a Isra'ila inda tə ɓəl yatə mbwar tsəmdzə nda.
31 Kəl janə gyang hya'atə tsa Tlakəu tə gədlətə takulashu hya'atə təwa fa'a nda. Ngyang nda tə wiɗiya takulash inda, dumkura cha kwa ɗa mətlətəchi ga mbandə mbwar tsəmdzə nda, tə ɓandə mbwar tsəmdzə nda kwa ɗa ma'i ɓupuchi zhang mada təwabari.