Tsaubar Təkəra Ndə nda Nazərit
6
1 Ngə Tlakə tə nar nyi nə Musa, 2 <<Ɓwanya na njir Isra'ila, ka nar nda, <Kala sal ndara mala nda kwa gwa'a hə salkur nə Tlakəu, salkur ka cha ɗa ka ndə nda nja dzəvəya, nacha ngə Nazərit. 3 Tuku cha təkəbiyadzə na mbadla ana kala sənda kwa nau wendə ndəu, a da cho sa kala sənda nja mər na yayar anap wa. 4 Kəd ga cha ɗa tsə'utanyi dzəvədzəvənyi, a da cho səm kala sənda nja mər anap wa, mada məlaməlanyi, ndara dagərya cha.5 << < Aku dəhə hanyi nda cha hətə salkur nə təkəbiyadza, a pyaɗakə da kwa tsəkar kəra cha wa. Tuku cho ngya chichinyi ku dəhə hanyi nja dzəvəyanyi ka Tlakə tə wura, tuku cho ngyar shishir kəra cha hə dzəgaməu. 6 Aku dəhə hanyi inda nja dzəvəya nyi kari, a da cho yi ləhə dzər ndə tətə wa. 7 Mada ada nyi, ndara ama nyi, ndara zamə nyi ndara kwamə nyi ngə tə tah, ngwa cha da ba'a dyaɓəndə kərnyi təwa yi ləhə ndzənda wa, aka a wurtə cha hətə salkur ənda cho təkəbiya dzə ka nji aka Tlakəu. 8 Aku dəhə hanyi nda cha təkəbiya dzə ka nji cho ɗa chichinyi nə Tlakəu.
9 << <Ma gəɗə tanyi ngə vanya ndə tə tətanyi ləhə dzə nyi, a mərtə tə shishi nyi nda cha dzəvəya hiɗahiɗa, tuku kəl nacha sənda shishir kəra cha pəshi nda cho ɗa chamə ti, pəshir hanyi məɗəfəkunyi ngə cho sənda. 10 Pəshir hanyi chisəkunyi, cho shili na mbətla mətləu au ngulinguli mbətla masar tsa'a mətləu nə pərist nda tə lakur gwa ku Madləɓa Tsəmdza. 11 Pərist nda kwa handa təmachi zhang ka sərhatəmachi nə səpəla'a anda zhang ka sərhatəmachi nə nginda ka hənda səpəla'a nda cha məra aka ndə nda tə ləhə dzə nyi nda. Tə pəchi nda tanyi cho ɓəla dzəvəya kəra cha. 12 Cho ɓəla dzəvəya kərnyi nə Tlakəu ku bəji nda cho ɗa ka Nazərit. A tsə'u njo jiga hanyi inda təra yahi inda wa, aka dzəvə nyi nda dzəvə nyi nda ɗatə hiɗahiɗa. Tuku kəl cha shili na zər gam fa zhang aka sərhatəmachi nə bikəu.
13 << <Janə tsaubar nda tə kəra ndə Nazərit ma bəji nda cha wur na ngyar təkəbiyadza. Cho yada pərist nda tə lakur gwa ku Madləɓa Tsəmdza, 14 a hinda cho lə ga'a nyi nə Tlakəu, zər gam nda pa'a zəzənyi fa zhang aka sərhatəmachi nə ginda, bal'ua nda pa'a zəzənyi fa zhang aka sərhatəmachi nə səpəla'a, gam zhang nda pa'a zəzənyi aka sərhatəmachi nə daɓƙər, 15 gyapə na ga'a kənda nə sə uhiuhi ana sə sasa, ana tsəla zhang chaɓə na gwazhilakə kəla tləlam, waina nda nja mər na upə zhizhi nda nja zukutə na mal, ana masa nda nja zhizhivəkər mal.
16 << <Pərist nda kwa shili ni mar Tlakəu ba'a cha handa təmachi nə səpəpla'a ana nə nginda. 17 Cho shili na gwazhilakə kəla tləlam nda mar Tlakəu ba'a cha handa təmachi na gam nda ak sərhatəmachi nə daɓkər nə Tlakəu, əngə tanyi tsə'u cho mər ga'a nə sə uhiuhi ana ga'a nə sə sasa nda. 18 Ndə nda Nazərit nda sal ndara mala, kwa sənda kəra cha tə lakur gwa ku Madləɓa Tsəmdzə nda ba'a cha pəu shishishishi nyi gu hu'u nda nda sərhatəmachi nə daɓkər kwa ngitə nda.
19 << <Ahir ma Nazərit nda tə sənda shishir kəra cha nda cha dzəvəya nda, kəl pərist kwa hətə patləka gam nda nja ɓagu, ana gwazhilakə kəla tləlam zhang ku tsəla nda, ana masa kəla tləlam nda zhang, ba'a fitə nyi təkəra Nazərit nda. 20 Saka ngə ja, pərist nda kwa vyalari mar Tlakəu aka ga'a nə vyalari, a ɗatə karti, ya a ɗatə ka mbaɗə pərist, kya'a na tsadləma ana ea gam nda nja fiya mar Tlakə nda, ahir ngə ja, Nazərit nda kwa nau satsi ɓitir anapəu.
21 << <Nanda ingə tsaubar ndə nda hətə salkur ka cho ɗa ka Nazərit, ga'a nyi nə Tlakəu kwa məlməl na sənda cha hətə salkur təkəri, a matsa kala vanya sə nda cho nau mərti.>> >
Papa'akur Chulkə nə Pərist
22 Tlakə tə ndər nə Musa, 23 <<Nar nyi nə Haruna dəhə ka nguli shili nyi, <Jan ənda hyo səkə nyi papa'akur nə njir Isra'ila. Nar nda: 24 <<Ga Tlakəa səkə hi papa'akur cha ɓəlatə hi; 25 ga Tlakə cha mərtə huɗəma cha a mbəl təkəra ka cha ɗa na ɗanghali nə ngha; 26 ga Tlakə cha shabiya huɗəma cha ya kəra ka, cha nə nghə piyarɗufəu.>> >
27 <<Təwa ənga, ndo fəkənyi tləm nə njir Isra'ila, ya yo səkə nda papa'akur.>>