Nyavi Kohat
4
1 Ngə Tlakə tə nar nyi Musa na Haruna, 2 <<Jigabiya nyavi Kohat inda ku nyandəla Levi ana ki jival kənda i'i. 3 Ka jigabiya dəhə shili inda fwatə tə fa makərkumnyi yatə tufəkumənyi, inda kwa nau mər tlərə madləɓa nə tsəmdza.4 <<Tlər nyandəla Kohat ku madləɓa tsəmdza, nacha ngə nda kar inda na karti i'i. 5 Ma bijir hya'atə kəhi tə ɗa, Haruna kə'i nguli nyi kwa gwa pələya miɗi mbwa karti ndo mbuya gwarara alkawal ni. 6 Ətsəu ndo mbuya nyi chi tla, ndo səkər pa'ua dzarginadzargina, ndo tsə'u zuwa hə nyi.
7 <<Ndo mbuya teɓər nda fərist kwa fiya gwazhilakə nda biyamar Tlakəu ana pa'ua dzarginadzargina kyawa i'i, shala i'i ana giɗa nə sərhatəmachi nə sa sə sasa, tangnda tanyi gwazhilakə nda kwa ngya. 8 Njo səkəri pa'ua dəzə kyatə kəri, njo haɗiya na chi kua, ba'a tsəwu udzəm nyi i'i kwa.
9 <<Nja hətə pa'ua dzarginadzargina ba'a haɗiya chakai təkəsəu, hu'u nyi, mucha hu'u nyi, halbə nyi ana dəhə təm inda nja kwa pə mal kwa. 10 Kəl ba'a nda səkər chi kua təkəri dəhə ka kar nyi. 11 Njo səkər pa'ua dzarginadzargina təkəra dzəgana bəjingha nda, ahir nga nja səkər chi kua təkəri, ba'a nja tsə'u zəwa i'i ka hə nyi. 12 Nda fa'atə kar tlər inda nji kwa mər tlər ni ku Mbwa Karti, nda baɗəu ku pa'ua dzarginadzargina, nja səkər chi kua mənakəu, ba'a nda hakətə gyatə zəwa hə nda. 13 Nda tsəkəbiya pətsəɗə ku dzəgana ndzə nda, ba'a nda səkər pa'ua lipəlalipəla təkəri. 14 Ba'a nda pəkəri dəhə kar mər tlər tə dzəgana nda, nacha ingə kii səlsəu i'i, sər chaku kum i'i, choɓər i'i ana shala waɗə i'i. Ba'a nja səkər chi kua mənakəu, ba'a tsə'u zəwa hə nda i'i ku məngya kənda. 15 Ahir nda Haruna kə'i nguli shili tə wurandə ɓatlətə Mbwa Karti nda ana dəhə kar nyi tsəktsəkəu, ana nda nda ɓatliya ka ndo ngyar mbwa nda, kəl nguli shili Kohat ngə shili hə kar nda, kəl ja, ngwa nda da tsəkar sə karti inda wa, nda da ba'a kuɗa. Tlər nyandəla Kohat ngə hə kar Madləɓa Tsəmdza ma dəhə bəji nda ndo hya'atə ka ma'i ti. 16 Eleyazar zərsal Haruna, nacha ngə pərist, nacha ngə ndə nda kwa tsamartə mal təkəsəu, ɓurdi nda kwa shi'uni kwikwitəu, sə'uhiuhi nda njo hatəmachi nə kala pəchi ana mal dzəvə səu. Nacha ngə ndə nda kwa gəla na dəhə madləɓa nda ana dəhə kar nyi inda kwa, Mbwa Karti ana dəhə kar inda kwa.
17 Ngə Tlakə tə nar nyi ka Musa ana Haruna, 18 <<Ngwa hya da i nja tlabiya nyandəla Kohat ku njikə Levi wa. 19 Ga nda nya na pi məlna a da ndo kuɗə wa, ma dəhə bəji nda nda ndo shili ləhə dzər kar inda ndiya na karti, janə sə nda ko mərtə nda: Haruna kə'i nguli shili nyi kwa ghəya təra gu Mbwa Karti nda, ba'a nda gwa təkəya nyi tlər nə kala ndəu and sə inda kala ndə kwa həa. 20 Kəl ja, ngwa nyandəla Kohat da wuriya gwa ndzamri sə karti inda mada kushə wa, ma nda mər ənga ndo kuɗa.>>
Tlər Nyandəla Gashon
21 Ngə Tlakə tə nar nyi Musa, 22 <<Jigabiya ndandəla Gashon ka chuli ka chuli ana ka ki ka ki. 23 Jigabiya dəhə shili inda fa kənda kwa ɗa makərkumnyi ba'a nə tufəkumnyi, nji inda kular ɗa ka shili mər tlər ku Madləɓa Tsəmdza. 24 Ja inə nəkəndawa tləra ana kar nda ndo fa'a: 25 Madləɓa Tsəmdza, miɗi inda ku ta madləɓa, sə nda nda njo səkəkri, sə nda nja səkəri nda nja ɓatlə na chi kua nda, miɗi nə lakur gwa ku Madləɓa Tsəmdzə nda, 26 miɗi nda nja təti babal madləɓa ana dzəgana nda, miɗi nə lakur gwa, sə'i i'i ana dəhə kar inda nja kwa mər tlər ni ka ɓatlə nyi. Nyandəla Gashon kwa mər dəhə tlər inda nja kwa kina mər ni. 27 Haruna ana nguli shili ingə kwa gəla ndara tləra ndara sə inda njo fa'a nə nyandəla Gashon. Nda dəkar nyi tlər nda ndo kina məra ana sə inda ndo kina fa'a. 28 Sə innə tlər nyandəla Gashon ku Madləɓa Tsəmdza. Itamar pərist zər Haruna ngə kwa dəkar nda sə inda ndo kina məra.
Tlər Nyandəla Merari
29 <<Jigabiya nyandəla Mərari ka chuli ka chuli ana ka ki ka ki. 30 Jigabiya dəhə shili inda fa kənda kwa ɗa makərkumnyi ba'a nə tufəkumnyi, nji inda kular ɗa ka shili mər tlər ku Madləɓa Tsəmdza. 31 Ja inə sə inda ndo məra ma nda shili ka ndo zəba ku Madləɓa Tsəmdza: Nanda ingə njir fa'a udzəm madləɓa, mədlakə nyi i'i ana ndəla nda i'i, 32 dəhə ka udzəm babal madləɓa ana ndəla nda i'i, məkukwa nyi i'i, sə'i i'i, dəhə kar kənda ana sə inda njo mər tlər kənda. Ka char sə nda kala ndə kwa kina fa'a. 33 Sə innə tlər nyandəla Merari ku Madləɓa Tsəmdza. Itamar pərist zər Haruna ngə kwa dəkar nda sə inda ndo kina məra.>>
Nyandəla Levi nda nja Jigabiya
34 Ngə Musa, Haruna ana gau inda nə kala nyandəla Isra'ila tə jigabiya nyandəla Kohat ka chuli ka chuli ana ka ki ka ki. 35 Dəhə shili inda fa kənda kwa ɗa makərkumnyi ba'a nə tufəkumnyi, nji inda kular ɗa ka shili mər tlər ku Madləɓa Tsəmdza, 36 nja jigabiya nda 2,750. 37 Nanda ingə nyandəla Kohat dəhə dəhəu, nji inda kwa shili mər tlər ku Madləɓa Tsəmdza. Musa ana Haruna ngə tə jigabiya nda wi nda Tlakə tə tsau nyi bar nə Musa. 38 Nja jigabiya nyandəla Gashon ka chuli ka chuli ana ka ki ka ki. 39 Dəhə shili inda fa kənda kwa ɗa makərkumnyi ba'a nə tufəkumnyi, nji inda kular ɗa ka shili mər tlər ku Madləɓa Tsəmdza, 40 nja jigabiya na 2,630. 41 Nanda ingə nyandəla Gashon dəhə dəhəu, nji inda kwa shili mər tlər ku Madləɓa Tsəmdza. Musa ana Haruna ngə tə jigabiya nda wi nda Tlakə tə tsau nyi bar nə Musa. 42 Nja jigabiya nyandəla Merari ka chuli ka chuli ana ka ki ka ki. 43 Dəhə shili inda fa kənda kwa ɗa makərkumnyi ba'a nə tufəkumnyi, nji inda kular ɗa ka shili mər tlər ku Madləɓa Tsəmdza, 44 nja jigabiya nda 3,200. 45 Nanda ingə nyandəla Merari dəhə dəhəu, nji inda kwa shili mər tlər ku Madləɓa Tsəmdza. Musa ana Haruna ngə tə jigabiya nda wi nda Tlakə tə tsau nyi bar nə Musa. 46 Ngə Musa, Haruna ana gau inda nə kala nyandəla Isra'ila tə jigabiya nyandəla Levi ka chuli ka chuli ana ka ki ka ki. 47 Dəhə shili inda fa kənda kwa ɗa makərkumnyi ba'a nə tufəkumnyi, nji inda kular ɗa ka shili mər tlər ku Madləɓa Tsəmdza, 48 ɗangkura nda 8,580. 49 Nja jigabiya nda wi nda Tlakə tə tsau nyi bar nə Musa. Ngə nja nə nyi tlər nə kala ndəu ana sə nda cho kina məra.