Nya ndəla Njir Levi
3
1 Nənnə ngə nya ndəla ka Haruna ana Musa wi nda cha ku biji nda Tlakə tə ndər na Musa kyatə Mə Sinai: 2 Tləmər nguil Haruna nanda ingə Nadab zər tangərma ana Abihu, Eleyazar ba'a Itlamar. 3 Na nda ingə guil Haruna inda nja dzəvəya ka mər tlər fərist. 4 Kəl ja, ka Nadab na Abihu tə kuɗə mar Tlakə ku dadil Sinai aku biji nda nda ha təmachi na hu'u nda pa'a Tlakə kwa i. A nguilsha'a da tsanda wa, aka ənga ka Eliyazar na Itlamar tə mər tlər fərist aku bijir Haruna adanə nda.5 Tlakə tə nar nyi nə Musa, 6 <<Shilina nya ndəla Levi nə Haruna, ka nda ɗa ka njir vala nyi. 7 Ndo mər tlər nəngha, ana anə dəhə daɓədzər njir Israila aku madləɓa tsəmndza, təwa mər tlləra aku madləɓa. 8 Ndo ɓəla kar tlər inda ku madlləɓa tsəmdza, ndo mər tlər nə dəhə njir Israila aku madləɓa tsəmdza. 9 Ka nənyi dəhə nya ndəla Levi nə Haruna ka nguilinyi nda ɗa ka njir vala nda. 10 Ka fiya ka nduili ka fərist i'i. Kəl ja, ma vanya ndə pamə tə shili ləhə dzər bwa karti, tuku nja tsəya tlakənyi.>>
11 Ngə Tlakə tə narnyi nə Musa, 12 <<A tabiya yiya nya ndəla Levi atəvəra dəhə nguil tangərma nə kala malakə avu Isra'ila, ka nda ɗa ka na'a. 13 Aka dəhə nguil tangərma, na'a inga. Aku biji nda ya kuɗənda nguil tangərma nə njir Masar, ngə ya fiya nguil tangərma njir Israila aka kərɗa, ndara ndəu ndara sərshishi. Na'a inga, naya ngə Tlakəu.>>
Jiga nya ndəla Njir Levi
14 Ngə Tlakə tə ndər na Musa aku dadil Sinai, 15 <<Jigabiya nya ndəla Levi wi nda nda ku nyavi kənda. Ka jigabiya kala zərsal hya zhang ndara ndiya.>> 16 Ngə Musa jigabiya nda, tang wi sənda Tlakə tə narnyi.
17 Janə tləmər nguil Levi:
Gashon, Kohat ba'a Merari
18 Tləmər nguil Gashon:
Libni ana Shime.
19 Nguil Kohat:
Amram, Izhar, Hebron ba'a Uzziyel.
20 Nguil Merari:
Mali ana Mushi.
Inənə ngə nya ndəla Levi winda nda ku nyavi kənda.
21 Nji'inda ku nyavi Gashon nanda ingə nji'inda ku nya ndəla ka Libni ba'a Shimeyi. 22 Dəhədəhə ku nyavi mətlə inga, shili 7,500, shili inda pa'a da səya mar hya shang na yah. 23 Nja nar nda ənda nda latə madləɓa kənda təwa vwa madləɓa tsəmdza. 24 Gau nə nya ndəla Gashon nacha ngə Eliyasaf zər Layel. 25 Aku madləɓa tsəmdzə nda, nyandəla Gashon ngə kwa tsə terbanacle ana madləɓa, sə'inda nja mbuya ni, miɗi nə lakur gwa ku madləlɓa tsəmdza, 26 miɗi nə babal madləɓa, miɗi nə lakur gwa ku madləɓa nda tə ɓandə tabanakəl ana dzəgana, ba'a sə'i i'i ana dəhə sə'inda njo mər tlər ni.
27 Nyadnəla Kohat tsə'u nanda ingə ka nyavi njir, Amram, Izha, Hebron ana Uzz, nanda innə ka nyavi ka nyavi Kohat. 28 Shili inda uya hya zhang ndara tə ndiya, dəhə dəhəu shili, 8,600. Nyadnəla Kohat ngə nji'inda kwa tskə sangchəwari. 29 Mbwar tsəmdzə kənda təwa təɗər pəchi nə madləɓa. 30 Elizafan zər Uzziel ngə gau təkəra ka nyavi ka nyavi inda ku nyandəla Kohat. 31 Tlər kənda nacha ngə nda kəkəɗənda Gwarara, tyaɓər, chaka'itəkəsəu, dzəgana i'i, alenya sə'inda njo mər tlər ni ku sangchəwari, miɗi, ana kala sənda njo mər tlər ni ku nda. 32 Eliyazar zər Haruna fərist, nacha ngə gau təkəra nyadnəla Levi. Nja fəkənyi təkəra nji'inda kwa mər tlər ku sangchəwari.
33 Nyavi inda ku nyandəla Merari, nanda ingə Mali ana Mushi. 34 Dəhədəhə shili, inda tə mər hya zhang ndara tə ndiya inda nja jigabiya 6,200. 35 Gau təkəra nyavi inda ku nyandəla Merari nacha ngə Zuriyel zər Abihel, mbwar ngya kənda təwa vwa nə tabanakəl. 36 Tlər nda nja nə nyi nə nguil merari nacha ngə, nda ɓəlatə frem tabanakəl, udzəm nyi, ana shimbal nyi, ana mbwanda cho ngya ti ana alenya kar inda ku nda. Nanda ingə kwa nəuna dəhə zəba inda njo mər na sə'inga. 37 Ana ma'a dəhə udzəm nə babal nda tə ɓandə nyi, mbwarnya kənda, ana sə'i kənda.
38 Moses ana Haruna ba'a nguil Haruna kwa ngya təwa zədər pəchi nə madləɓa, a biyanya mbwar tsəmdza. Nda nda ingə njir mər tlər ku sangchuwari tə dəɓar njir Isra'ila. Ma vanya ndə pamə tə ya dzər sangchuwari nda, njo tsəya nyi.
39 Nda Musa na Haruna tə jigabiya nyandəla Levi, nja uya shili inda uya hya zhang ana inda ndəɗə hya zhang dəhə dəhəu 22,000.
40 Ngə Tlakə tə nar nyi nə Musa, <<Jigabiya dəhə shili yar tangərma inda tə hya zhang na yah, ndara inda tə ndəya, ka tsəfəbiya tləmən nda. 41 Ka fiya ɗa nyandəla Levi, nda ɗa təvəra dəhə yar tangərma nə Isra'ila a na'a, ətsəu, dəhə sərshishi kənda təvəra yar tangərmar sərshishi njir Isra'ila. Naya mgə Tlakəu.>>
42 Aka ənga Musa tə jigabiya dəhə yar tangərma nə nnjir Isra'ila, tang wi nda Tlakə tə nar nyi. 43 Dəhə yar tangərma, hya zhang biyama, inda nja jigabiya nda ana tləm, 22,273.
44 Ngə Tlakə tə nar nyi nə Musa, 45 <<Fiya nyandəla Levi təvəra dəhə yar tangərma nə njir Isra'ila ana sərshishi nyandəla Levi təvəra sərshishi njir Isra'ila. Nyandəla Levi kwa ɗa ka na'a. Naya ngə Tlakəu. 46 Manə, yartangərma nə njir Isra'ila ndəɗətə nyandəla Levi ana nji 273, tuku kəl nja pələya nji'inga gi təkəri inga. 47 Ko dləutsə shekel tufu təkəra kala ndə zhang, məlməl na tədəɓəkura shekel nə sangchuwari nda tədəɓəkura cha kwa ɗa gera məlukumənyi. 48 Ka hətə kwaba nda ka dləutsə təkəra njir Isra'ila 273 inda ka nənyi nə Haruna ka nguili nyi.>>