Dlar Ninəva
2
1 Jani dla'a kwa shili təkəra hi, Nineva, Piya ma ləvaləva ɓəla kyatə kəra ɓantili, nda ɓəla laku, ka mbadzə ka tsəmtə dunama nghə dəhə. 2 Aka Tlakə kwa ɓəla ndə səli Jakop wi nə Isra'ila, mada ngə njir fa'a kwazhalɓə fa'aya nyi tə ka widə da hi. 3 Ləgə ləvaləva nau pah ɗatə dəzəu, njir pah mbu tə mavəkəu. Pishi nda nda ɓatliya kər nə nda, mas kənda kwa mɓəl wi hu'u kwa tsamətlaɗə na ləvəra. 4 Njir pah tə biya ku yawaraki wi njir məlləm, nda kwa zhuli yi na shili. Ngya kə ngya kənda tə ɗa wi təkisəu, nda kwa ma'i wi vi mbəlmbəla. 5 Nineva tə tsəmətə ləvaləva nyi i'i, dəhə ka əngha tləhi ku laku kənda, nda kusa yadza ɓantili ga nda uya mbwar mbua. 6 Nja wunda nya laku ɓiti ngə patla təl tə wi. 7 Nja təra na mələm Nineva ka mava. Kwatəra i'i kwa sə'ingu wi mbətla, nda kwa dəgə hatla nda. 8 Nineva wi dəl nda ɓiti tə shiu tanyi kwa, <<Ta'i! Ta'i!>> Nda kwa tiwi, kəl ja, a ndə nda sha ka nda wa. 9 Fa'aya ma azurfa! Fa'aya ma bəjingha! Mələm gəna ya nyi tə na gəna. 10 Nineva tə tə, səwatə ga ɗa ka huɗifi! Dəfwa nda tə tə, unɗə nda kwa tsamtladəu! Shilkə sar səya nda ti, huɗəma nda ndalndal nyi! 11 Aman tləl ləvari mbwa nda nja kwa nə nyi sərsum nə shiɗəɗə nyi, mbwa nda shili ka mahi'i kənda ana nguli kənda tə təra kə tə a tsəu sər ləvər da wa? 12 Ləvari səya tə dangə ga tsəya nə nguli kənda, cha tsəya dangəu sənda kwa nji nda, sənda cha tsəya cha kwa nə nyi ka sərsum nə nguli nyi, cha nyanɗə tləl nyi na kwazhəlɓə. 13 Ngwandə Tlakəu, <<Ya kwa mər dawa naka.>> <<Yo ngi nda njir pah ngha ku əar ana katsakir kura ləvari. Yo ngya nyi kəla ngulisha'a tə dunəya. A tsəu hyo tsakə tə ngatə kuraka changhabal wa.