Mika 1

1 Bwanya Tlakə tə shili nə Mika ndər Moreshet ku ɓəjir təlkur Jotam, Ahaz ana Hezekiya, təl Yahuza i'i, cha uya takər təkəra Samariya ana Urushalima.

Sə'ingu təkəra Samariya ana Urushalima

2 Ngatə ma nji, dəhə hi hya səya ma himiya hi, dunəya ana dəhə sənda kwa, ngwa Tlakə cha ɗa ka tauli təkəra hi, Tlakə ku mbwa'alə karti nyi. 3 La'a! Tlakə kwa shili hya'atə tə mbwar ngya nyi, cho shili chinda dəgil wawa'a i'i nə dunəya. 4 Wawa'ar dəgil kwa lu'a ana dagə i'i kwa təkbiya dza wi dəmal ku hu'u, wi ɓiti nda kwa whi səya kyatə dəgil. 5 Dəhə sə'ingə a təkəra səpəla'a Jakop ana bəkər ki Isra'ila ngani. Mi ngə səpəla'a Jakopa a da Samariya ma? Mbwar ngya tsəkəɗə nə Yahuda ya, a da Urushalima ma? 6 Aka əngha, yo mərtə Samariya kwa ɗa ka dzəkə huɗəfi, mbwa nda chi fa wur anap, ya kwa pənda mangu i'i gwa ku guləng, ya yo landa dzəgu hya vi i'i. 7 Dəhə katə kənda kwa huhuɓu kuchiɗəkuchiɗəu, dəhə ga'a nə mbwa'alə kwa ngi na hu'u, ya kwa səwaɗə silma i'i. Aka cha tsəmətə ga'a nyi i'i təwa laku zawarkur, təwa lakur zawarkur tsəu ndo mər tlər ni.

Tiwi ana Sə'ingu

8 Aka ənga, ya kwa mər huɗətla ana tiwi, ya yo ma'i dura'a. Yo tiwi wi gakəu yo na sə wi shatəli. 9 Aka mbəlkə Samariya da nə wur wa, ya a shili tə təkəra Yahuda. Ya a həya tə nya ki nji ɗa njir Urushalima. 10 Ngwa hya nar nyi nə Gat wa, aa, ngwa nji da ba'a tiwi wa. A vu Bet Ofəra nja takəl ku dzəugwaɓəu. 11 Tərabiya ma dura'a ana kuzhə nji nda na ngya ku Shafir. Njir Zaanan ngwa hya biya wa. Njir Betezel kwa tiwi a da hyo uya vala tsa nda wa. 12 Nji nda ngya vu Marot kwa fə kər da danhali, kəl ja, təmachi tanyi ngə a nya nya vi Urushalima hya'atə tsa Tlakəu. 13 Nji nda na ngya tə hə'i Lakish, mbatə ma sərdi (daɗari) tə ya taku hya whi aka na nyi ngə tə ghəya mər səpəla'a ku Sihiyona, ngə hya gwa'atə Isra'ila tə gwa ku bəkəu. 14 Aka əngha, hya nar nyi nə njir Moreshet ŋda hyo ngyar mələm, Njir ki Akzib ndo shadə nyi kər nə njir Isra'ila. 15 Kəl ja, yo shili na njir kura nyi nda na ngya vu Moreshet. Na nda nda na səli matsa Isra'ila kwa shili vu Adullam. 16 Sər nya sənda kər nə sə'ingu təkəra ngulisha'a kə hə nda hyo ngatə məsədakə ni, hya sənda kəra hə kwaratlə wi kwadəga, aka ndo təra ki mər mavakur.