Nəuma təkəra Njir ɗa Mədzau na Nji Dalidali
2
1 Sər təhuɗə na nji nda kwa biyama na ɗimikur ana nji nda kwa nga ləbam nya ndəla nji tə sər piya kənda vu'i! A ba mbudla nda kwa zəbiya mər nyi aka papa'akur mər nyi tsa nda. 2 Ma nda ndahuɗə fa ana ki, nda kwa dləuya cha ɗa ka nə kənda. Ya nda kwa chi nda ndə ndo dləuya ki nyi dəhə ma sər fa'a ki nyi. 3 Aka əngha Tlakə tə na, <<Janə yo batləya təmachi təkəra nji ina, nda a ndə da kwa nau dləuya kər nyi wa. A tsəu da hi kwa ma'i gang kər wa, aka bəji kwa ɗa ka ɓəjir təmachi. 4 A ku ɓəji ngə njo ɓwanya na karapə təkəra hi, ndo nar hi miya həyatə vi, nda kwa na, <A wəɗə nda tə ea nji shungəu, Tlakə dləuya tə hə'i ana fa tsa ea, ya cho nə nyi nə nji inda kwa kura ea> >> 5 Aka əngha, a vanya ndə ɗa ku daɓədzər Tlakə nda kwa təkəya təwa tsəshu'u wa.Njir Mətakər Gəzhə
6 <<Tsəu hya ɓwanya mətakər da wa,>>Aka mətakər kənda tə na, <<Ngwa hya da mər mətakər təkəra sə in wa, aka a sər kuzhə da kwa uya ea wa.>> 7 Tsa'atsa'a tanyi ngə nja kwa na, əngə ja njir ki Jakopa, <<Aka ya Mabəl Tlakə na huɗətla ya, aa kwa mər cha chulkə sə wi ngə ya?>> <<Ɓwanya nyi da mənakə nə nji inda kwa nəu nya cha tsa'atsa'a ma? 8 Tə batə nja hya'atə wi njir dawa. Nja kwa səɗə nda daura njir tərabiya na pəyar dəfəu, ma nda kwa ɓəl wi nji nda hya'atə tə mbwar pah. 9 Hya gədlə nda mahi'i nji nda ku ki məsədakə kənda. Ngə hya dləuya papa'akur ɗa tsa ngulisha'a kənda ba'anawa. 10 Hya'atə, ka təra tangə na! Aka a da mbwar ɓəlsar nə wa, aka hidahidakur kə hi, kuɗə kwa səya təkəra hi. 11 Ma ndər gəzhə ana ndər shakər tə shili na, <Ya kwa mər tə hi mətakər nə ɓitir anap ana sər wi na ndəu,> njo ɗa ka ndər mətakər njikə nda ta nyi ngha!
Alkawal Dləuya
12 Vəlvəl ya kwa tsəmtə hə dəhə, Jakopəu, vəlvəl yo daɓəya həyadzər njir huɗəfi Isra'ila. Yo tsəmə tə nda dəhə wi kətəng ku shiɓə wi sərshishi tə mbwar ɓəla, ya njo ɓəla ngatə kuraka nda. 13 Ndə nda tə ɓədzəya bantili cha kwa ɗa gavərma nji, ndo biya təwa nyar gwa mələm ndo biya. Təl kənda kwa ghəya biya tsa nda, Tlakə ngə sərma kənda.>>