Nja Gughə Njirawawa'a ana Njir Mətakər
3
1 Kəl ngə ya na, <<Səndzə ma himi, njirawawa'a ki Jakopəu, nji təl təl nə ki Isra'ila, hyo ki na zəndə tsa'atsa'akur, 2 na hə nda tə ngyar jiri ka i səpəla'a, nji inda tə tanda chi nji ana ɗəhə kum dzən nda, 3 nji inda tə ɗənya kumur nji, hya nənanda chi kənda ana huhuɓəya ɗəhə kənda kucidkucidəu, hya ɗənya nda wi kum tə ki səlsəu, wi kum ku təm?>> 4 Nda kwa tiwi nə Tlakə, ya a Tlakə da kwa sihimi ɗa nda wa. A ku ɓəji nda Tlakə tə ɗəwanda huɗəmacha cha nda aka səpəla'a na nda məra. 5 Nacha ngə sənda Tlakə tə na, <<Njir mətakər nda tə nəu na nji ɗa ku laku ɗimi, ma nja nə nda sərsuma, nda kwa na piyar ɗəfəu ba'anawa, ma nda tari ba'a nda tləya pah. 6 Kəl ja, vu'i kwa səya hi kəla mətakər, ana kutləu kəla kəzəu. Pichi kwa səɗə tə kəra njir mətakər i'i, ya pichi pichi nyi kwa ɗa dzau təkəra nda. 7 Njir ɓəla ana njir ha kəzə kwa ngatə kuzhə, ndo haɗəya huɗəma nda aka a Hyel da kwa wum nə nda wa.>> 8 Naya na'a a nyaɗə ɗa tə cha na gyalkur mabəl Karti Hyel, tsa'atsa'akur ana dəgalkur, ka ga cha chabiya nə Jakop njir səpəla nyi təwa ɓəkər Isra'ila. 9 Ngatə ma, njirawawa'a nə ki Jakopəu, na hi njirawawa'a nə ki Isra'ila, nji inda tə ngyar nəu jiri ka wəɗə nda dəhə jiri, 10 nji inda kwa hər Sihiyona ana mashi, Urushalima tsəu ana ɗimikur. 11 Njirawawa 'a kwa numa təwa dləu vangula, fərist kwa dlədləɓə nə nji təkəra wazəba, ya njir mətakər kwa ɓwanya ka gəna. Dəhə ka əngha, nda ndəhədzə kərnənda dza Tlakə nda kwa na, <<A Tlakə da ku pamamən ma, təwa bari ngə kuɗə kwa shili ku pamamən na?>> 12 Aka əngə ja, njo zuwa nda Sihiyona wi fa, Urushalima tsəu kwa ɗa ka dzəgə huɗəfi, dəgil mbwa'alə kwa ɗa ka lya wua.