Mə Tlakəu
4
1 Aku bəji batəbatə kəra mə mbwanda Mbwa'alə Tlakə ti, kwa ndiya na dzəgamkur dəhəu, kwa ndiya dəgəl dzəgamkur, nji hya'atə tə mbwa pampamə kwa maka hwi shili da cha. 2 Njul nji pampamə kwa shili na, <<Shilma, mən təra gyo mə Tlakəu, a gyo ki Hyel nə Jakop. Cho dlədləɓətə mən laku nyi ga məna ma'i kwa.>> Aka dlədləɓə nə Tlakə kwa zəbiya vu Sihiyona, ɓwanya nyi tsəu kwa hya'atə vu Urshalima. 3 Cho shili na nəuma ku pama nji ɗangəu, cho shili ɓatliya kəpal nda ku pama jul njir dunəya. Ndo shili shandə katsakər kənda ka gələu, masə kənda tsəu ka tlaku. A tsəu hə'i da kwa shili təsə katsakər ka vanyi wa, ndara vanya hə'i kwa biya ka ki pah səkə wa. 4 Kala ndə kwa ngya da kiɗa wur anab nyi, ana da kiɗa wur kanda nyi, ya a ndə da kwa ləvərandə nda wa, aka Tlakə ndər gyalkur ngə tə ndəra. 5 Kwa nau ɗa jul nji inda dzənə mən kwa ɗa kəriwa ana həsəli nə katə kənda, kəl ja, namən məno həsəli ana kəriwa nə Tlakə ka ba'anawa. 6 <<Ku ɓəji nda,>> ngwa ndə Tlakəu, <<Yo tsəmtə nji təskən, nji nda ku mavakur ana nji nda ya tləya huɗa nda. 7 Ya kwa mərtə nji təskən ka nji nda həyadza, nji inda nja gədlənda njir hə'i dunama. Tlakə kwa səm təlkur təkəra nda vu Sihiyona ka ba'anawa. 8 Kəl ja, na hə nə kə hə, Jəgəɗə mbwar ɓəla kətəng Sihiyona, təlkur kwa ɓəl shili da ka, təlkur Urushalima.>> 9 Miya gwa'atə ka kwa tiwi na dunama? Ndər dəkə dəma nə ngə tə tə ya? Nacha ngə tə gwa'atə ɓwaɓwatə tə uya ngə wi ɓəlakər yah ya? 10 Sihiyona sər ga waɓəl kər ngə ka ngə'i wi mala na ɓwaɓwatə ɓəlakər yah. Aka go biya ku mələm go təra kətə dadil takəu, go təra yi Babila njo yi dləuya ngha, hinda Tlakə kwa yi dləuya ngə ku cha njir dawa ngha. 11 Sakan hə'i dangə daɓətə tə kər təkəra ka, ndo na, <<Ngwa nja mərtə nda ka sər həɗa, ngwa məna ndzam Sihiyona na li. 12 Kəl ja, a da nda kwa zəndəbiya jigadəma Tlakə wa, a nda nda kwa ngabiya batlər Hyəl wa, aka tsəmtə nda tə nji wi uhi tə lar. 13 <<Sihiyona, hya'atə ga dəkənda! aka yo tsakətə ngə dunama wi gyal ana tələm lyang, ya go huɓəya hə'i dangəu.>> Ya go nə nyi gəna kənda nə Tlakəu, Tlakər dəhə dunəya.