Alkawal Təl kwa Hya'atə vu Baitalami
5
1 Tsəmtə ləvaləva ngha, aka njir dawa ɓandə mən ti. Ndo dəgəya gau Israila na zəuwa ku judla cha. 2 Kəl nda nakə ja Baitalami Efərata, mada ngə nakə kushiu kə ku nyavi Yahuda, aku ka vanya ndə kwa zəbiya aka ya, ndə nda kwa səm təlkur təkəra njir Israila, ndə nda haɗa a da cha, nacha zhinyi. 3 Aka ənga Tlakə kwa ngyar njir Israila nə njir dawa kənda ka nda kura nda kəl bəji nda mala nda kwa ɓəlakər yah nda tə yah zər nyi. Saka ngə ja, njir Israila nda tə təra ki mər mavakur ku cha njir dawa kənda kwa ɓəla shili daɓiya dzə ka njikə nda. 4 Ma cha shili, cho shili ɓəla kətəng nyi aku dunamar Tlakəu, ana aku səlir tləmər Hyel Tlakəu. 5 Ya cho shili na pyarɗəfu. Ma njir Asiriya tə shili na mən pah ga huɓuya ɓangtili kəmən, məno sətə nda njir ɓəla məɗəfa ana ka gau chisəu ka nda kura nda. 6 Kəl nda kwa səm təlkur təkəra Asiriya ana katsakər, hə'i Nimrod tsəu ana katsakər təsitəsa, Cha kwa dləuya mən tsa njir Asiriya, ma nda shili dla'a hə'i kəmən ana səgwa tə gəl hə'i kəmən. 7 Həyadzər nya nya ndəla Jakop nda tə huɗəfi kwa ɗa ku pama nji dangəu, wi kuchikəpa hya'atə tsa Tlakəu, wi shishafər par təkəra sar nda pa'a kwa səkə ndə ndara shivi wa. 8 Həyadzər nya nya ndəla Jakop nda tə huɗəfi kwa ɗa ku pama nji dangəu, wi ləvari ku pama kum takə ku lya wua, wi zər ləvari ku pama ɓəla kətəng, nda cha kwa daɓə na nda cho wəɗə na nda, ya ndər nau tsəmtə nda da wa. 9 Njo nənghə dunama kura njir dawa ngha, ana hyo kuɗə na nda dəhə nda. 10 <<Ku ɓəji nda,>> ngwa ndə Tlakəu, <<Yo kuɗə nda taku ana charkaina taku kəhi. 11 Ya yo kuɗə nda hə'i mələm kəhi ana ya kwa tətah nda mbwar mbu kəhi. 12 Yo kuɗə nda tsa kəzə a tsəu hyo uya njir tsa kəzə wa. 13 Yo dlədla nda silma kəhi a tsəu hyo uzhə nə sər cha nyi wa. 14 Yo təsənda katə Ashera ku pama hi, ya yo dla nda mələm kəhi. 15 Ya yo kisəkur ku huɗətla təkəra hə'i inda pa'a kwa hə səli na'a.>>