Nəuma Tlakə təkəra Njir Isra'ila
6
1 Njir Isra'ila ngatə ma sənda Tlakə kwa na, <<Hya'atə ma, nya gə na nəuma gə tə dəgil, ngwa dəgil nda ngatə kuraka nyi. 2 Ngatə dəgil, tsətsəgwa Tlakəu, sihimi dzəguyar dunəya. Aka nəumar Tlakə ɗa təkəra nji nyi , cha kwa wula njir Isra'ila 3 Mi ya mərtə nyi nə nji ɗa? Amanə ngə ya nə hi ɓwaɓwata? Wum ma na'a. 4 Ya fa'abiya hi zəbiya vu Masar, ya dləya nyi tsa mavakur. Ya sə Musa ka cha ɗa ka gavərma kə hi, ana Haruna ba'a Maryamu. 5 Dəngatə ma sənda Balak təl Mowab tə mbatə nya ndəla nyi ana sənda Balaam zər Beyor tə wum. Hya dəngatə na ma'i kə hi hya'atə vu Shitim yi Gilgal, nda hyo kə na zəndə tsa'atsa'akur tlər Tlakə.>> 6 Mi ya kwa shilinə nə Tlakəa?Chul ga'a mani ya kwa shili nənya?
A mən uzha mar Hyel
ana zər tla fa zhang ka hatəmachi ya?
7 Tlakə kwa ngatə cha məsɗakə na gam dubu,
ana dəl dubu kumma nə mal ya?
A mən kwa nau shili na yar tangərma kəmən ka
hatəmaci nə səpəla'a kəmən ya?
8 Nahi nji, Tlakə wurta natə hi sənda tsatsa'a,
ya nacha ngə sənda cha kwa gwa'a:
ka mər sənda tsatsa'a, ka nyida mər mənakəkur,
ka ma'i na Tlakə ngha ku həyakər.
9 Ngatə ma! Tlakə kwa nga mələm, nda ləvir tləm nyi ana jigadəma nyi, <<Ɓəlatə ma kər nihi tsa ɓu Tlakə ana bəji ɗimi nda kwa shili təkəra hi. 10 A ya kwa far na gəna ɗimikur nda hya tsəmtə təwa səpəla'a wa, ndara ya far na kətasə təkəsə nda nja təkəbiya mətlə wa. 11 Kwa nau ya dləuya ndər təkəsə na dlərvi ndara ndər təkəsə na gəzhi ya? 12 Njir gəna kəhi njir fa'avi, njir hə'i kə nyi tsəu kəl gəzhə ana kyara nda nə shakər. 13 Aka əngə ja, ghəya tə nji kuɗə nyi, yo sha ndə hə'i kəhi ka huɗəfi təkəra səpəla'a kəhi. 14 Hyo səma ya a da hyo nyi wa, ta nyi tsəu tanyi jwajwa'a. Hyo fi məduwa ya səda hyo dəwanda wa, aka sənda hya dəwanda, yo nə nyi ni katsakər. 15 Hyo tləka a da hyo mər wa, hyo ɓichibiya mal zaitun ya a da nahi kwa ɓisə wa, hyo ɓichibiya anap a da nahi kwa sa wa. 16 Aka hya nəu nya Omri ana nəu ki Ahab, hya nəu dəma kənda. Aka ənga yo mər tə nyi ka huɗəfi, yo shaɗə nyi ka sər gwa'a gyaɗə, hyo ɗa ka sər həyatəvi a mar nji.>>