Ɓwaɓwatə Njir Isra'ila
7
1 Na'a wurtə, aka a ɗa tə ya wi fa nda nja məriya fwakəu, wi ɓəji nda nja wurandə vaɗə fa anap tə, a tsəu sə da nji kwa uya ka səm wa, ya a yayar kanda nda dəfu ya kwa i da ta'a dla'a wa. 2 A tsəu njir dəfər Hyəl da tə hədzə tə dunəya wa, ya tsəu nji dur da wa. Aka dəhə nji mbuya tə mwaɓu ka pənda mashi, mada wa kwa gwa'a pya zamə nyi na ləbam. 3 Cha nda tsatsau ga mər sə ɗimi, təl ka njirawawa'a kwa dləu ga'a, njir nəuma kwa dləu vangula, njir gəna tsəu kwa ɓwanyar sənda nda kwa i, təwa ənga a tsəu dəhə kwa ma'i təɗəɗə wa. 4 Ndə mənakə kənda wi shigəɗə, ndər jiri kənda tsəu wi ngagə nda ja patə na shigəɗə. Pishi nda hya fiya ndər ɓla, pishinda ngə Hyəl kwa səya da hi. Sakan ngə ɓəjir wi kə hi. 5 Ngwa ka da dləukər na təwul wa, ngwa da fəkər da bazhe wa. Ka mbiya nya ka tsa mala ngə nda hyo piya hyo gaɓədzə ni. 6 A nə ngulisha'a nda kəla kwa hə səli nə adan nda, ana ku'imahi'i nda kwa tlə mwalə təkəra aman nda, ana tsəu kuimahi'i ɗuɗu nda na mwali ku pama nda kə'i səlikə kənda, njir dawa shili njir ki kənda. 7 Kəl ja, naya na'a, ya kwa ndzam na fəkər nə Tlakəu, ya ya kwa səkə Hyel ndər dləuya ɗa, Hyel ɗa kwa ngatə ɗa.Hyel kwa Dləuya Njir Isra'ila
8 Ngwa njir dawa ɗa da mər hərgyatə wa! Mada ngə a dla tə ya, kəl ja, ya kwa hya'atə, mada ngə a tə ngya ya ku sə sasa, Tlakə kwa ɗa ka vi mbəlmbəl ɗa. 9 Aka mər tə ya bəkəu, a dləukər tə ya na huɗətla nyi, kəl sakanda cha ngatə gədə ɗa ga tla nda ɗa nəuma. Kəl cho zəbiya na ya tə vi mbəlmbəla, ya yo la'a tsa'atsa'akur nyi. 10 Ya kəl njir dawa ɗa kwa la'a, ya kuzhə kwa mbuya nda, nji nda tə nar ɗa, <<Ama'a Thakə ngə Hyela?>> Lya ya kwa la'a dla kənda, mada'a sakana njo dərɓə na nda na hə wi tsaɓə ku yawara ki. 11 Ɓəjir hər ɓantili kə hi kwa shili, sakanda ngə nja kwa tsakə tə hi gəl. 12 A ku ɓəji ngə ngə nji kwa shili ɗa hi hya'atə vu Asiriya ana hə'i Masar, fwatə vu Masar ba'a nə Yufəretis, fa'a yatə fa'a ana dəgil yatə dəgil. 13 Dunəya kwa ɗa huɗəfi jwajwa'a aka sənda nji tə məra.
Təhuɗə Tlakə təkəra Isra'ila
14 Tlakə sər ka ɓəla nji ngə ana tamba ngha, kətəng sər fa'a ki ngha nda na ngya zhang tanyi ku lya wua, tə ghadar hə'i nda na papa'akur. Ngwa nda biyama na ɓəla ku Bashan ana Gileyad wi hanyi nda haɗa tə tərabiya nda. 15 <<Məlməl na wi ɓəji nda hya zəbiya vu Masar nda, yo char sər məngəl i'i. 16 Hə'i i'i kwa la'a, kuzhər dunama kənda kwa səya nda. Ndo mbu chanda ku nya nda ya ndo ɗa dadahimy. 17 Ətsəu nda kwa naɗə hə'i wi pwaɓu, wi sər təɗəna ta hu'i. Ndo zəbiya na tsamətladə tə mbwar mbu kənda, aka əngə ndo ɓəl ya da Hyel Tlakə ku ləvir ana ndo ɗa na ləvir ngha. 18 Wangə Tlakə pabiya ɗaka, ndə nda kwa far bəkə səpəla'a nə njir fa'a ki nyi nda tə həya dza? A huɗətla ngə da kwa ngya ba'anawa wa, kəl nda hərgyaɗə kwa char təhuɗəu. 19 Aka go ɓəla ngatə təhuɗə kə ea, go chinda səpəla'a kə ea tə kiɗa hyaka, go vakəu dəhə səpəla'a kə ea gu ndzəɗakur fa'a. 20 Ya ka kwa ɗa na jiri nə Jakop, ana char ndzəɗakur nyida ngə nə Ibrahim wi nda ka semfəla nə jival kə ea ɗəɗəməu.