Mətla Hə'i inda tə Həyadza
18
1 Ahir nda njir Isra'ila tə kwasə hə'i nda, ngə dəhə nda tə tsəmətədzə vu Shilo, ga latə Madləɓa Tsəmdzə nə Tlakə tangnda, 2 kəl ja, tsəutanyi nyavi Isra'ila məɗəfə inda pa'a taa uya nəkənda na sərfa'aki.3 Ngə Joshuwa tə nar nyi nə njir Isra'ila, <<Ba'a sakaman hyo da dzəgwa dləu hə'i nda Tlakəu, Hyel nə kə'i jival kəhi tə nə hya? 4 Ɗəmtsə ma nji makər ku kala nyavi. Naya tsə'u yo sə nda nda ki tultə hə'i nda, nda tsəfətə ənda cha, məlməl na kala nyavi, ahir ənga, nda ɓəl shili da ya. 5 Hyo təkəbiya hə'i ngə məɗəfa. Nyandəla Yahuda kwa ngya ku ɓəlkər hə'i nda təwa holma, njir ki Yusufu tsə'u kwa ngya ku ɓəlkər hə'i nda təwa vwa. 6 Ahir hya tsəfətə ənda hə'i məɗəfa inga, hya shili nə tangnə na'a, yo ɓəlshiu təkəri nə hi a huɗər Tlakəu. Hyel kəmən. 7 Kəl ja, a nyandəla Levi da kwa uya sərfa'aki ku pama hi wa, aka tlər pəristkur mar Hyel ngə sərfa'aki kənda. Nyandəla Gad, Roben ana mar nyndəla Manasa wurtə uya nəkənda na sərfa'aki biyatəya Urdən, nda Musa mava Tlakə tə nə nda.>>
8 Ngə nji inda hya'atə ga təra ki dəkə hə'i nda, ahir nda Joshuwa tə tsau nda bar bəra, <<Ma'i ma hya ki tultə dəhə hə'i nda, hya dəkətə, hya tsəfəbiya ənda cha, hya ɓəl shili da ya. Ahir nga, yo ɓəlshi'u nə hi huɗər Tlakə tangna vu Shilo.>> 9 Ngə nji inda tə təra ga ki tultə dəhə hə'i nda. Nda tsəfəbiya ənda cha a ku likatkatə pəɗəpəɗa, ka mələm ka mələm məɗəfa, ga ɓəl shili da Joshuwa vu Shilo. 10 Ngə Joshuwa tə ɓəlshiu nə nda a vu Shilo, a huɗər Tlakəu, tangnda cha təkəya nyi hə'i nda nə njir Isra'ila wi nda tə nyavi kənda i'i.
Hə'i nda Nja Nə nyi nə Nyandəla Banyami
11 Ɓəlshiu tangərma nacha ngə nə nyandəla Banyami, məlməl na nyavi kənda i'i. Hə'i kənda tə ɗa ku pama hə'i nyandəla Yahuda ana Yusufu.
12 Ɓəlkər hə'i kənda təwa vwa, tə hya'atə vu Urdən, ga tərabiya tsarara təwa vwa nə Jariko, ga təra təwa holma go hə'i dəgəl dəgəl, ga zəbiya təwa dadil takə Bet Aven. 13 Fwatə tangnda, ɓəlkər hə'i nda tə təra səya təwa tsarara təwa holma nə Luz, nacha ngə Betel, ngə a təra təwa Atarot Addar, ga nəu təwa dəgəl nda təwa holma a ku dakə Bet Horon.
14 Fwatə kyo dəgəl nda kwa ndzam Bet Horon təwa holma, ɓəlkər hə'i nda tə sha təwa holma tsa'a vu Kiriyat Baal nda njo nga Kiriyat Jayirim təwa təɗərpəchi, mələm njir Yahuda. Nacha ngə hə'i inda təwa təɗərpəchi.
15 Ɓəlkər hə'i nda təwa holma tsəu, tə ghəya biya nyachira Kiriyat Jiyarim təwa təɗərpəchi, ɓəlkənyi tə zəbiya tə tsədzəɗər ɓiti Neftowa. 16 Ngə tə təra təwa sara dəgəl nda kwa ndzam dakə Ben Hinnom, təwa vwa nə dakə Refayim. Ngə tə təra səya təwa dakə Hinnom tahə holma nə mələm njir Jebusi, ga təra yi En Rogel. 17 Ngə tə pyar dzə təwa vwa, ga təra yi En Shemesh, ga təra yi Gelilot, nda kwa ndzam lakur gwa Adummin, ga təra səya təwa Hangu Bohan, zər Roben. 18 Ngə tə təra təwa vwa nə tsarara Bet Araba, ga təra səya Araba. 19 Ahir nga, tə təra səya Bet Hoglah ga zəbiya nya Fa'a Wuna, a nya Urdən təwa holma. Nacha ɓəlkər hə'i nda təwa holma.
20 Urdən ngə ɓəlkər hə'i nda təwa zədəpəchi.
Nənnə ngə ɓəlkər hə'i nda nyandəla Banyami tə uya ka sərfa'aki kənda.
21 Mələm inda tə ɗa ka nə nyandəla Banyami ka nyavi ka nyavi nanda ingə,
Jariko, Bet Hoglah, Emek Keziz,
22 Bet Araba, Zemarayim, Betel,
23 Avim, Parah, Ofrah, 24 Kefar, Ammoni, Ofəni ana Geba, mələm kwabemətləu ana mələm shiɗəɗə inda tə ɓandə nda.
25 Gibiyon, Ramah, Beyarot,
26 Mispa, Kifirah, Mozah,
27 Rekem, Irpil, Taralah, 28 Zelah, Halef, mələm Jebusi (nacha ngə Urshalima), Gibiya ana Kiriyat, mələm kwabəfwaɗəu ana mələm shiɗəɗə inda tə ɓandə nda.
Nənnə ngə sərfa'aki nyandəla Banyami ka nyavi ka nyavi.