17
1 Janə hə'i nda nja nə nyi nə nyandəla Manasa nda zə'ualə Yusufu, a nə Makir zə'ualə Manasa. Makir nacha ngə jival nya njir Giliyad, manda nyandəla Makir njir nau pah nda gagaɗa, ngə nja nə nda Giliyad ana Bashan. 2 Ngə nja təkəya nyi hə'i nda təwa təɗərpəchi nə Urdən, nə həyadzər nyandəla Manasa. Nja təkəya nda ka nyavi ka nyavi, nja nə nyi nə nyavi ka Abiyeza, Helek, Asriyel, Shekem, Hefa ana Shemida. Nanda ingə alenya nguli shili Manasa zər Yusufu, ka nyavi ka nyavi.3 A nguli shili da tsa Zelofehad zər Hefa, zər Giliyad, zər Makir, zər Manasa wa, kəl nda ku'imahi'i tləmən nda, Mahla, Nowa, Hogla, Milka ana Tirza. 4 Nda ya da Eliyazar pərist, ana Joshuwa zər Nun ba'a njirawawa'a ga na, <<Tlakə tə tsau nyi bar nə Musa ənda cha nə ea sərfa'aki wi nə ka zamən ea.>> Ngə Joshuwa tə nə nda nəkənda na sərfa'aki wi nda nja nə nyi nə ka zamənya adan nda, wi nda Tlakə tə na. 5 Ana ənga Manasa tə uya mbaɗər hə'i kuma matsa Giliyad ana Bashan nda nja nə nyi nda, 6 manda ku'imahi'i inda ku nyandəla Manasa uya tə nəkənda na sərfa'aki na nda ka zamən nda. Ngə nja nə nyi hə'i Giliyad nə həyadzər nyandəla Manasa.
7 Ɓəlkər mətla hə'i Manasa tə hya'atə vu Asha yi Mikmetat təwa zədərpəchi nə Shekem. Ɓəlkəla hə'i nda, tə təra təwa holma fwatə hinda ga a həu nji inda na ngya vu En Tapuwa.
8 Manasa ngə na hə'i Tapuwa, kəl ja, kərnya mələm Tapuwa ku cha nyandəla Ifərem. 9 Ətsəu, ɓəlkər hə'i nda tə tərabiya təwa holma gwa nya Dəl Kana. Mələm inda təwa holma nə dəl nda, nə Ifərem inga, mada ngə aku mətla Manasa nda, kəl ja, ɓəlkər hə'i Manasa ngə təwa vwa ta'i kwa nya Fa'a Meditereniya. 10 Hə'i nda təwa holma, nə Ifərem nga, hə'i nda təwa vwa tsə'u, nə Manasa nga. Ɓəlkər mətla hə'i Manasa tə ɗa tsa'a nya Fa'a Meditereniya, tə gi fa'a gəl na hə'i Asha təwa vwa, nda fa'a gəl na Isaka tsə'u təwa zədərpəchi.
11 Aku pama hə'i Isaka ana Asha tsəu, Bet Shan, Ibəlim ana njir hə'i Dor, Endo, Taanak ana Megido, tsa'a na hə'i nda tə ɓandə nda, nə nyandəla Manasa nga.
12 Kəl ja, a nyandəla Manasa da nau gədləbiya nji inda na ngya ku mələm ingə wa, aka ənga njir Kana'ana tə ngyata nda ku mələm inga. 13 Kəl ja, nda njir Isra'ila tə ɗa na dunama gagaɗa, nda chiu njir Kan'ana inda ku tlər tuku, kəl nda a nda nda gədləbiya nda pa'apa'a wa.
14 Ngə nyandəla Yusuf tə nar nyi nə Joshuwa, <<Mya gwa'a ka nə ea mbaɗə zhang ka sərfa'aki kəea? Aka nji kəea ɗang gagaɗa, ya Tlakə səkə ea tə papa'akur 'ualəu.>>
15 Ngə Joshuwa tə ɓəlakə nda bəra, <<Macha ɗanghə hi gagaɗa, ya macha hə'i dəgəl dəgəl Ifərem kushiu nəhi, ma'i ma gu lya wua, hya gwa ɓatlətə babal nə kərnəhi aku hə'i njir Perizi ana Refa.>>
16 Ngə nyandəla Yusufu tə na, <<Hə'i dəgəl dəgəl ngə do nji ea wa, ya dəhə njir Kan'ana nda na ngya tə ɓya'ar hə'i, charkaina lyang da tsa nda, inda na ngya vu Bet Shan ana mələm shiɗəɗə inda tə ɓandə nda, ba'a nji inda na ngya tə dadil takə Jezrel.>>
17 Kəl ja, Joshuwa tə nar nyi nə ki Yusufu, nyavi Ifərem ana Manasa, <<Ɗang hi gagaɗa ya dunama tsa hi. A da mbaɗə zhang tanyi njo nə hi wa, 18 kəl ja, takə hə'i dəgəl dəgəl. Kalnda ma, dəhə mbwanda cha ki ɓəlti nəkəhi nga, madangə, charkaina lyang tsa njir Kan'ana, madangə dunama tsa nda, hyo nau gədləbiya nda.>>