Nja Təkəya Hə'i inda Təwa Təɗərpəchi nə Urdən
14
1 Inən nə ngə mbwa inda njir Isra'ila tə dləutsə ka sərfa'aki kənda tə hə'i Kana'ana, nda Eleyazar pərist, Joshuwa zər Nun ana gau ka nyavi ka nyavi nə njir Isra'ila tə təkəya nda. 2 Nja təkəya nyi sərfa'aki nə nyavi dləa ana manyi təwa ɓəlshiu, wi nda Tlakə tə na təwa Musa. 3 Musa wurta nə nyi sərfa'ki nə nyavi mətlə na manyi inda biya təya Urdən, kəl ja, a da cha nə nyi sərfa'aki nə nyandləla Levi wa. 4 Nguli shili Yusufu tə ɗa ka nyavi mətləu, nanda ingə Manasa ana Efərem. A nyandəla Levi da uya hə'i wa, kəlnda mələm mətlə tanyi ka nda ngya kwa, ana mbwa ka ɓəla sərshishi. 5 Ana ənga, njir Isra'ila tə təkəya hə'i nda, tang wi nda Tlakə tə tsau nyi bar nə Musa.Nja nə nyi Hebron nə Kalip
6 Vanya pəchi, njir Yahuda tə yada Joshuwa vu Gilgal, ngə Kalip zər Jefune ndər Kenizi tə nar nyi nə Joshuwa, <<A zəndə tə kə sə nda Tlakə tə nar nyi nə Musa mava Hyel təkəra ma, a vu Kadesh Barniya. 7 Ma Musa mava Tlakə tə sə ɗa hya'atə vu Kadesh Barniya ka gwa'a hya mələm nda, fa ɗa fwaɗəkumnyi. Ya ngə ya shili na nyi labar wi sənda ɗufwa ya tə char ɗa, 8 kəl ja, ka zamə ɗa inda ea ma'i kə'iri tə tau nyi ləvər ku ta nji. Kəl naya na'a ja, ya nəu Hyel Tlakə ɗa ana dəhə ɗufwa ya. 9 Aka ənga, Musa tə səmnda fəla na'a pəshi nda bəra, <Dəhə hə'i nda ka fiya hya kə ti, kwa ɗa ka nənghə na sərfa'aki, nahi ka ngulisha'a nghə ba'anawa, aka a nəu təkə Hyel Tlakə nghə na dəhə ɗufwa ka.>
10 <<Sakan ja, tang wi nda Tlakə tə mər alkawal, jan cha ngya ɗa tə na pi fa fwaɗəkumnyi parnya tufəu, fwatə tə bəji nda cha nar nyi sən nə Musa, ku bəji nda njir Isra'ila kwa zhuli ku dadil takəu. Jan ya tangnə ənya ana fa ɗa chisəkumnyi parnya tufəu. 11 Tsəu tanyi dunama ɗa ku bəji nda Musa tə sə ɗa nda, ya jan tsə'u ta ɗa na ɗufur biya ki pah wi nda ya haaɗa nda. 12 Sakan ja, na'a mələm dəgəl dəgəl nda Tlakə tə mərtə ɗa alkawal nda. Kərnghə zəndəti, ənda njir Anak da hinda ya mələm kənda i'i ku ɓangtili, kəl ja, Tlakə kwa vala ɗa, yo gədləbiya nda tang wi nda cha na.>>
13 Ngə Joshuwa tə səkə nyi papa'akur nə Kalip zər Jefune ga nə nyi Hebron ka nənyi na sərfa'aki. 14 Aka ənga Hebron tə ɗa ka nə Kalip zər Kenizi, fwatə tə bəji nda, aka cha nəu nya Tlakəu, Hyel nə njir Isra'ila ana dəhə ɗufwa cha. 15 (Aku bəji nda njo nga Beron, Kiriat Arba, tləmər vanya ndə ghərətəu ku pama njir Anak.)
Əngə hə'i nda tə ɓəliya sar tsa pah.