Mələm inda həyadzə ka nja kwasa
13
1 Nda Joshuwa tə hala, ya fa nyi ɗa tə 'ualə gagaɗa, ngə Tlakə tə nar nyi, <<A hal tə ka, ya jan tsəutanyi mbwa ɗang inda hyo ki na kwasa.2 Ja inə hə'i inda tə həyadza, dəhə hə'i njir Filisti ana hə'i njir Geshur, 3 fwatə nya Dəl Shilhor təwa zədərpəchi nə Masar, kwa'a nə mətla nə Ekron təwa vwa, dəhə nja jigau nda ku hə'i njir Kan'ana (Mələm ka təl ka təl tufəu nə njir Filisti a vu Gaza, Ashdod, Ashkelon, Gat ana Ekron) 4 fwatə təwa Holma, dəhə hə'i njir Kan'ana, fwatə vu Ara nə njir Sidon, bətə yi Afek, mətla njir Amori. 5 Babal njir Geba, ana dəhə Lebanon təwa zədərpəchi, fwatə vu Baal Gad a səyamar Dəgəl Harmon kwa'a nə Lebo Hamat.
6 <<Dəhə mələm inda ku lya məa, fwatə vu Lebanon ba'a nə Misrefot Mayim, na nda ingə njir Sidon, naya təkərɗa kwa gədlənda nda təvi njir Isra'ila kwa yi. Tuku ka təkəya nyi hə'i ngə nə njir Isra'ila ka sərfa'aki, tang wi nda ya tsau nghə bar. 7 Aka əngə ja, ka təkəya nda hə'i ngə ka sərfa'aki, ku pama nyavi dlə inga ana mar nyandəla Manasa.>>
Hə'i inda Təwa Zədərpəchi nə Dəl Urdən
8 Həyadzər mar nyandəla Manasa ana nyandəla Roben ba'a nyandəla Gad tə uya nəkənda na sərfa'aki nda Musa tə nə nda təwa zədərpəchi nə dəl Urdən, tang wi nda Musa mava Tlakə tə ɗaka tlatsə nda.
9 Mətla hə'i kənda tə hya'ati fwatə vu Arower nda kwa'a nya dəl Arnon, tsa'a ku mələm nda tə ghadar dakə nda. Tə həu dəhə ɓya'ar hə'i Madeba tsa'a vu Dibon, 10 ana dəhə mələm inda da kiɗa Sihon təl njir Amori, nda tə səm təlkur vu Heshbon, biya tsa'a tə ɓəlkər hə'i njir Amon. 11 Ətsəu tə həu Giliyad, Hə'i njir Geshur ana Ma'aka, ana dəhə Dəgəl Harmon ana dəhə Bashan kwa'a nə Saleka, 12 tə həu dəhə mətla təlkur Og a vu Bashan, nda tə səm təlkur vu Ashtarot ana Edrai, zhang ku huɗa njir Refa nda tə həyadzə na pi. Nanda ingə Musa tə ɗaka kura ga dləuya hə'i kənda. 13 Kəl ja, a njir Isra'ila da gədləbiya njir Geshur ana Ma'aka wa, nda ngya kə'i nda ba'a tə bəji na.
14 Kəl ja, a da cha nə nyi hə'i nə nyandəla Levi wa, manda dəhə sə inda nja hatəmachi nə təwa nginda tə dzəgana nə Hyel Tlakəu, Hyel njir Isra'ila, nəkənda inga, tang wi nda cha mərtə nda alkawal.
15 Janə hə'i nda Musa tə nənyi nə nyandəla Roben, ka nyavi ka nyavi:
16 Mətla hə'i kənda tə hya'atə vu Arower a nya dakə Arnon, ana hya'atə ku mələm nda tə ghada dakə nda, ana dəhə ɓya'ar hə'i nda biyamar Madeba 17 kwa'a nə Heshbon ana dəhə mələm nyi inda tə ɓya'ar hə'i, nanda ingə Dibon, Bamot Baal, Bet Baal Meyon, 18 Jahaz, Kedemot, Mefaat, 19 Kiriyatayim, Sibma, Zeret Shahar kyatə dəgəl nda ku dakə nda, 20 Bet Peyor, tsarara Pisgah, ana Bet Jeshimot. 21 Dəhə mələm inda tə ɓya'ar hə'i ana dəhə mələm inda da kiɗa Sihon təl njir Amori, nda tə səm təlkur vu Heshbon. Musa tə kura nyi ana njirawawa'a njir Midiya, nanda ingə Evi, Rekem, Zur, Hur, ana Reba, dəhə nda tə səm təlkur da kiɗa təl Sihon. 22 Matsa nji inda nja kuɗənda ku pah, njir Isra'ila tsə'u tə tsəya ndər tsakəza nda, nacha ngə Bala'am zər Beyor. 23 Ɓəlkər hə'i nyandəla Roben nacha ngə nya dəl Urdən. Mələm inda tangnda, nja nə nyi nə nyandəla Roben ka sərfa'aki kənda, ka nyavi ka nyavi.
24 Janə hə'i nda Musa tə nənyi nə nyandəla Gad, ka nyavi ka nyavi:
25 Mətla hə'i Jazer, dəhə mələm inda ku Giliyad ana mar hə'i Amon yi kwa'a nə Arower ləhə dzər Rabah, 26 ana hya'atə vu Heshbon yi Ramat Mispah ana Betonim, ana hya'atə vu Mahanayim kwa'a nə mətla hə'i Debir, 27 ana ku dakə, Bet Haram, Bet Nimra, Sukot ana Zafon ba'a həyadzər hə'i Sihon təl Heshbon (təwa zədərpəchi Urdən, tsa'a nə ɓəl fa'a Kineret). 28 Mələm wawa'a ina ana mələm shiɗəɗə inda da kiɗa nda ngə sərfa'aki nyandəla Gad, ka nyavi ka nyavi.
29 Janə hə'i nda Musa tə nə nyi nə mar nyandəla Manasa, ka nyavi ka nyavi:
30 Ɓəlkər mətla hə'i nda, tə hya'atə vu Mahanayim ga həu dəhə hə'i Og təl Bashan, dəhə mbwar ngya Jair vu Bashan, mələm kwakumənyi, 31 mar Giliyad, ana Ashtarot ana Edrai (mələm nji təltəl nə Og vu Bashan). Nacha ngə hə'i nda nja nə nyi nə nyandəla Makir zər Manasa, a nə mar nguli shili Makir, ka nyavi ka nyavi.