Ayuba 5

1 <<Nga ja Ayuba, macha kwa nau ka, kəl ja ya, wa kwa wumə nə ngha?

Aku pama nji karti ingə ya, wa ngə ko sha ya da cha?

2 Jiri, huɗətla kwa tsəya ndər kəkəngkur, ndahuɗəvi tsə'u kwa tsəya ndə kəla jigadəma. 3 A la'a təya ənda ndə kəkəng kwa nau uya ngya mənakəu, kəl ja, a da kwa hətə biji wa təmachi kwa səya təkəra ki nyi. 4 A nguli shili kənda da kwa uya ngya mənakə wa, a ndər ta'i da tə yanda ku vi nəuma wa. 5 Njir huɓə ngə kwa səmnya sə'inda cha mərya ku fah nyi, dəhə ka ma'a sə'inda tə hə ku lya shikəɗi. Njir kamu'u kwa fa'aya gəna ndə kəkəng. 6 A sə ɗimi da kwa tsə ku hə'i wi chuli wa, əngə tanyi tsəu a ɓwaɓwatə da kwa biya ku hə'i wa. 7 Tang wi ngə kyara hu'u kwa təra sha huɗamələm, əngə tanyi tsəu nja yah ndə aka ɓwaɓwatəu.

8 <<Ayuba, macha naya ngo sa ɓwaɓwatə wii nənghə na, yo nda ya da Hyel, yo wula nənyi. 9 Nacha nda kwa mər sər məngəl inda a da njo nau ngabiya wa, ana səshinshin inda a da njo nau jigabiya wa. 10 Cha kwa shili na par, cho ləɓətə kəra hə'i. 11 Cho nənyi gəna nə ndə ɗaliɗali, nacha nə kwa mbəɗanə nji'inda na huɗətla. 12 Cho wazzənda sənda ndə kwakuna tə ɓatləya, tsa cha da uya biyama ku sənda cho mər wa. 13 Cha kwa ngəya nyi ləbam nə nji kwakuna aku kwakunakur kənda, a sə da ndo uya ku sənda ndo mər wa. 14 Kutla kwa mbuya nda puchi, pəchi talalang ndo tətəɓə wi vu'i. 15 Kəl ja, Hyel kwa mbəndandə nji ɗaliɗali ku nya tah, ətsəu cho dləuya njir gwa'a ku cha nji dlərpəu. 16 Aka ənga, fəkər da tsa nji ɗalɗali, tar jiri tsəu bəgə tə ɗiyu. 17 <<Ndər papa'akur ngə ndə nda Hyel kwa ɓwa, aka ənga, ngwa ka da ɗa tsa ɓu nda Tlakə kwa mər wa. 18 Mada ngə kwa takəsə ndəu, kəl ja, nacha na kərnyi kwa mbanda kətikəti nyi, cho tləndzə nghə bəlatəu ana cha cha, ana cha cha tsəu cho mbandə ngha. 19 Cho mbəɗandə nghə tsa təmachi kwah, a kwah tanyi ma'a wa zhaka məɗəfə cho tsanda bama kə tsa təmachi. 20 Cho mbəɗandə pya kə ku bijir huɓa, cho dləuya nghə ku nya katsakər. 21 Ma nji kwa ngəl ngha, cho ɓəlatə ngha, mada ku bəjir təmachi tə shili a da ko ngatə ləvər wa. 22 Təmachi ana huɓə kwa ɗa sər gyaɗi nə ngha, ya a da ko ngatə ləvər tsa kum takə wa. 23 A da ko ɓə na hangu tə mbwar zwa nghə wa, ya a da ko ɗəngha na kum takə wa. 24 Ko zəndəbiya ənda madləɓa nghə ɓəlaɓəla nyi, ko jigabiya sənda tsaka, ya a mada zhang da kwa sa wa. 25 Ngulisha nghə kwa ɗa ɗang gagaɗa, nyandəla kə tsəu kwa ɗa wi sar təkəra hə'i. 26 Kəl ka hal gagaɗə ko dzəgwa tah, wi ngə kəl ma uhi tə ɗa ka mərə njo ndzəgwa mərəya. 27 <<A ngwahibiya tə ea sə'ingə dəhə, ya əngə cha, aka əngə ja, səndzə himi ka mər tlər ni.