6
1 Ngə Ayuba tə wumə ga nar nyi Elifaz, 2 <<Ma cha njo dəkətə tədəɓəkura ɓwaɓwatə ɗa ana huɗətla ɗa, 3 cho nda ndəɗə mishishiuwa dəl na tədəɓəkur, aka ənga, ngwa ka da mər məngəl ana ɓwanya ɗa wa. 4 Ndər gyalkur ngə həya ɗa na hafa. Tsəka'a kura ɗuya nə na kəlpəu, sər ləvərə hya'atə tsa Tlakə tə ɓandə ɗa, wi ngə tə ləvaləva a nya pah. 5 Ka taa ngati kwara kwa tiwi ana sar ku nya cha ya? Əngə tanyi tsəu ma tla uya chiva cho bəgu. 6 Wa kwa nau səmə sərsumə kəla wuna? Aa ɓitir hihi kwa shi'uni cha kwitkwitə ya? 7 A da ya kwa chim səmə chul ngəna sərsumə wa, chul sərsumə ngə kwa shili na ɗa shilika. 8 Mya gwa'atə a Hyel da ngatə gəɗi wa? Kami cha katə ɗa sənda yo gwa'a? 9 A cha nda tsəya ɗa wa! ndara cha ngyar gyalkur nyi hənda pya ya. 10 Yo nda uya fəɗufəu, ya mər hirgyaɗi madangə ku ɓwaɓwatə ya, manda a zənbiya tə ya ənda a da ya kəpal ɓwanya Ndə Karti wa. 11 A tsəu dunama da tsa ya ka ya ngya ka səkə wa, ka mi yo susu'u yazəndəbiya təya ənda tə naya? 12 Ana hangu nja mər ɗa? ana bronze nja ɓatlə dza ya ya? 13 A tsə gyalkur da tsa ya ka ya vala kərɗa wa, a hənda tə nji dəhə dunama ɗa. 14 <<Ma ndə ku ɓwaɓwatəu, ka bazhinyi ingə kwa kina fətə nyi ɗufu, mada nacha shar nyi yi nə Ndər Gyalkur. 15 Kəl ja, nahi ka bazhi ɗa shandə ɗa təhi kər, wi dəl nda kwa nyi vuya ba'a shi'u hyapəchi. 16 Nahi wi dəl hi nda tə haɗiya dzə na ice, nda kwa whi ma ice nda tə melt. 17 A tsəu nda cho whi hyapəchi wa, ma vi kwakwaɗə tə ɗa ndo sa ta nda. 18 Njir ma'i tə dləgwam kwa sa tsa laku tə vir gwa'a ɓiti, ndo ma'i ku dadil takə ba'a kuɗa aka a ɓiti da wa. 19 Njir ma'i inda tə gwa'a ɓiti aka a zəndə tə nda ndo uya ɓiti. 20 Kəl ja, a da nda uya wa, aka ənga nda mər huɗətla. 21 Nahi ma'a char ɗa tə hi, ənda a sənda hyo nau mər wa, nda hya la'a sə ɗimi nda tə ɗa naya, ləvəra səya hi. 22 Səda ya taa gədi tsa hi ya? Aa ta ya nar hi hya diya vangula tə nyaɗa ya? 23 Taa ya gədi hya dləuya ɗa cha ndər dawa ndara ndə pui ya? 24 Yau dlədəɓar ɗa ma ja, ga ya zəndə mbwanda bikə ɗa ti, yo bəgə ɗiyu. 25 Ɓwanya jiri kwa tə gagaɗa. Kəl ja ya, mi sənda tsə kwa shili na? 26 Hyo i hya kəpal ɓwanya ɗa ya? Kami ya fiya ɓwaya ndə nda ku ɓwaɓwatə ka sə ɓwa'atanya? 27 Jiri hyo nau ɓəl shiu ma'a təkəra nguli maha, ya hyo ɗəlnda bazhi kəhi. 28 <<Kəl ja, ndzam ma huɗuma ya aku təhuɗəu. A da hyo tləya hi gəzhi wa. 29 Ngwa hya da tlanda ɗa nəuma ku tar jiri wa, hya zəndəbiya ənda, atə jiri ta'i ya. 30 Ma hyo la'a ya wi gəzhi nə ya kwa tla ya? Hyo la'a wi a da yo nau təkəbiya jiri ana gəzhi wa ya?