Nja Həbiya Kwatam Vashti ku Təlkur
1
1 Jan sənda tə ɗa ku biji nda Təl Zazəs kwa səm təlkur təkəra hə'i 127 fwatə biya Indiya ta'i vu Kush. 2 Biji nda təl Zazəs tə səm təlkur a mələm Shusha, 3 ya aku makərkunya fa nə təlkur nyi, cha ɓatləya ladər nə dəhə njirawawa'a nyi ana nji'inda na səli. Kə'i gau nə ləvaləva nə mələm Pasha ana Midiya, nguil təl i'i ana nji'inda na səli ku mətla nyi dəhə tangnda.4 Hanyi 180 cha məra cho cha gəna nda ku təlkur nyi ana chul səli nə təlkur. 5 Nda hanyi inga tərabiya, ngə təl tə ɓatləya vanya ladər aka dəhə nji, fwatə tə ndənda kushiu ba'a nə nda dəgaləu inda ku ta mələm Shusha, cha ɓatləya ladər nga ka hanyi məɗəfa, aku mbəta nda ku patla təl. 6 Nja hakəya miɗi linən pərtə ana dzagina zarina, nja mbiya na sə'i linən pətəu, nja mbandzənyi tsəshiu azurfa atə shimbal marbəl. Sər ngya bəjingha ana azurfa da, nja fiya ku ki təl nja ɓatlə na hangu daɗədaɗa pampaməu. 7 Nja shili na ɓitir anap ku ɗeɗika bəjingha pampaməu, nja shili ɓitir anap nə nji təltəl məlməl na gəna nda tsa təl. 8 Nja ngyar kala ndə cha sa dəhə sənda cho i, aka təl wurtə nar nyi nə njir təkə ɓitir anap nda nənyi nə kala ndə sənda cho gwa'a.
9 Kwatam Vashti tsəu, tə ɓatləya nənyi na ladər anə mahi'i inda ku ki təl Zazəs.
10 Pishir məɗukunya hanyi, ɓitir anap gi to kəra təl Zazəs, ngə cha nar nyi nə nji məɗəfə inda a kiɗa da wa inda kwa mər tlər nə nyi, Mehuman, Bizta, Harbona, Bigta, Abagta, Zetar ana Kakas, 11 ənda nda shili na nyi kwatam Vashi, ana pahuɗəkər nə təlkur, ka cha char gumagumakur nyi biya mar njirawawa'a, gumaguma cha gagaɗa. 12 Kəl ja nda nji'inda yi na nyi mafakə təl nə Vashti, ngə Vashti tə ngyar shili. Ngə huɗa təl tə tla gagaɗa.
13 Manda təl tsəltə na gwa'a dəma tsa njir zəndi gadlagadla ana nəuma, ngə cha ɓwanya na njir zəndi inda kwa zəndəbiya biji i'i 14 nji'inda ləhə dza təl gagaɗa, Kashena, Shetar, Admata, Tarshish, Meres, Marsena, Memukan, njirawawa'a məɗəfə inə ngə ləhə dza təl ku Midiya ana Pasha.
15 Təl tə jau nda <<Mi sənda gadlagadla tə na nja mərtə nyi nə Vashta? Aka a da nəu tsaubar təl Zazəs nda nji'inda a kiɗa nda dawa inda yina nyi wa.>>
16 Ngə Munakan tə na biyamar təl ana dəhə njirawawa'a <<Səngə Vashti tə mər ngə da ɗa pa'a wa, a da kəl nə təl tanyi wa, ma'a nə dəhə njirawwa'a ana dəhə nji'inda ku mətla təlkur təl Zazəs. 17 Səngə kwatam tə mər nga, kwa go hima dəhə mahi'i, ndo na <Təl Zazəs ma'a ngatə kwatam Vashti, ya cha ngyar shili,> ana ənga ndo həyatə shili kənda. 18 Ma mahi'i njirawawa'a Pasha ana Midiya tə ngagtə labar chul həyatəvi nda kwatam tə məra, ndo ɓəlakənyi nə shili kənda wi nə kwatam nda. Səngə kwa shili həyatəvi ana tar ngya mənakəu.
19 <<Aka ənga macha a ɗatə nə təl, ba'a cha na nja tsəfətə ku gadlagadla Pasha ana Midiya nda a da nja kwa nau ɓəlandə wa, ənda əngwa tsəu Vashti səgwa mar təl Zazəs pa'a wa. Ətsəu ngwa təl nənyi dəgalkur Vashti nə vanya mala nda tə ndəɗə nyi. 20 Ma təl tə fiya ngəna gadlagadla ku dəhə mətla təlkur nyi, dəhə mahi'i kwa hətənyi səli nə shili kənda, fwatə tə kushinyi ta'i tə dəgal nyi.>>
21 Təl ana njirawawa'a nyi təngatə məsəɗakə na ɓwanya nga, aka ənga təl tə mər tang winda Menukan tə na. 22 Ngə cha təkənda kainau ku dəhə mətla təlkur nyi ku kala mələm ana nji aku nya kənda, nja tsəfəbiya nya nji pampaməu, ənda kala sal cha ɗa ka gau ku ki nyi, cha ɗa ka ndə nda macha ɓwanya njo səhimi da cha.