Esta tə Ɗa ka Kwatam
2
1 Ahir nda ɗufwa təl Zazəs tə tatla, cha ɗənghatə na Vashti ana sənda Vashti tə məra, ana nəuma nda cha tlanda nyi nə Vashti. 2 Ngə alenya njir mər tlər nə təl, nji'inda ləhə dzənyi gagaɗə tə na, <<A mən gwa'arə nyi ku'ipəlyakə gumaguma nə təl, ku'ipəlyakə inda pa'a taa ɓə na shili. 3 Ngwa təl ɗəmtsə njirawawa'a ku kala province ka nda shili na ku'ipəlyakə inda ku ki nda təl kwa fə ma'i nyi vu Susa mələm dəgal nə təl. Ka fəkəri Hegai təkəra nda, ndə nda təkəra ma'ingha, cha shili na nda sə'inda kwa mərtə nda gumaguma gagaɗa. 4 Ahir nda ka tabiya kwa nda tə ɗa nəngha, ka mərtə nyi ka kwatam atəvəra kwatam Vashti.>> Sə ngə nda pə ngə ɗa tə nə təl, ngə cha dləukər na ɓwanya kənda.5 Vanya ndər Yahuda da vu Susa, ana tləmənyi Modekai zər Jayir, ku nyavi Benjamin ku nyandəla Kish ana Shimeyi. 6 Modekai ku huɗa nji'inda Nebukaneza tə fa'atə hya'atə vu Urshalima aku biji nda cha pa Urshalima ga hətə təl Jehoyakin hya'atə vu Judah. 7 Kwar zamən nya ada nyi da tsa cha ana tləm nyi Esta, tləmə nyi Hadassah ku nya njir Heleni. Kwa gumaguma cha gagaɗa, Modekai tə hətə wi kwar ta cha ku biji nda ada nya kwa nda ana ama nyi tə kuɗa.
8 Nda ngatə sənda təl tə na, ngə nja shili na ku'ipəlyakə ɗangə shili Susa ga fiya nda da kiɗa Hegai. Ngə nja shili na Esta tsəu ku patla təl ga taɓəu nyi ku cha Hegai, ndə nda təkəra mahi'i təl. 9 Esta tə uya kwambiyakur tə lya Hegai, a da cha ɗə biji wa, cha kusa nənyi sə'inda kwa mərtə dza cha mənakə, ana sərsumə daɗədaɗə nda nja ɓatləya ka cha. Cha nənyi mbwanda tə ndəya na mənakə ku ki nda ga daɓiya nyi ka ku'imahi'i məɗəfa inda kwa mər tlər nənyi.
10 A Esta da dəkar nyi nə madawa ənda Jew cha wa, aka Modekai tə nar nyi, ngwa cha da pə nə madawa wa. 11 Kala pəchi, Modekai kwa maka shili dza ki ma'i təl nda ga cha zəndəbiya ndara aman Esta tə ɗa ana ndara vanya sənda uya nyi.
12 Tuku ku'ipəlyakə nda ngya ku nda nə fa zhang təvi nda gwa mar təl Zazəs. Hya kwa ana mal ba'a mur hya kwa tsəu ana sə'inda kwa shi'uni kwitkwitəu ana sə ɓəsɓəsa. 13 Ya jan ənda kala kwamalakə kwa gwa dzər təl, cho handzə kala sənda cho i. 14 Cho yo patla təl aba akəu, umbudla tsəu cho təra yo vanya ki nda ma'i təl kwa ngya kwa, yada vanya ndə na tləmə nyi Shaashgaz ndə nda na ku'imahi'i inda təl kwa piya ni. A tsəu cho tsakti gwa da təl səkə wa, kəl nda macha ɗufwa təl hətənyi ti, ya cha nga nyi na tləmə nyi.
15 Biji ɗatə ti ka Esta gwa da təl. Esta kwa nda Modekai tə hətə cha ɗa ka kwa nyi nda, kwar zamənya ada nyi Abihel. Esta tə uya kwambiyakur tə lya dəhə ndə nda tə la'a nyi, nda biji nyi tə shili ka cha gwa da təl, ngə cha handzə kəl sənda Hegai ndə nda a kiɗa cha wa, nda təklura ki nda mahi'i təl kwa ngya kwa tə nar nyi cha handzi. 16 Aku məɗəfəkunya fa təkur təl Zazəs, aku hya kuma, hya nə Tebet, nja shili na Esta nə Təl Zazəs aku patla təlkur nyi.
17 Ngə təl tə i Esta matsa alenya mahi'i, ətsəu cha uya kwambiyakur tsa təl matsa alenya mahi'i inda. Aka ənga cha nənyi pahuɗə kər təlkur, ga fiya nyi ka kwatam, atəvəra Vashti. 18 Ngə təl tə ɓatləya ladər aka Esta anə njirawawa'a nyi. Cha nənyi ɓəlsar nə dəhə nji'inda ku mətla təlkur nyi, ga təkə ga'a inda na gəna.
Modekai tə Bəɗandə Pya Təl
19 Nja ɓəla tsəmtə ku'imahi'u inda səkəu, Modekai tsəu a nya nyaki təl aka a mərtə nyi tə nji cha ɗa shang ku pama njirwawa'a. 20 Kəl ja, a Esta da chabiya ndara wa cha wa, wi nda Modekai tə nar nyi, aka tsəu tanyi kwa nəu nya Modekai wi ndara cho sakanda cha zər kushiu.
21 Aku biji nda Modekai tə ngya a nyaki təl, kəl ngə njir ɓəla nyaki təl tləmən nda Bigtana ana Teresh, tə mər huɗətla ga mbatə nya ənda ndo tsəya təl Zazəs. 22 Kəl ja, Modekai tə zəndəbiya sənda ndo haɓa nya ndəla təl, ga nar nyi nə kwatam Esta, nacha tsəu cha nar nyi nə təl, ənda Modekai ngə ngati. 23 Nda nja gwa'abiya ga ngabiya ənda səngə jiri, ngə kukwanda nji mətlə inda gyatə wua. Nja tsəfəu dəhə sə'inga ku likatkatə ka təl ka təl biya mar Təl.