1
1 Vanya ndə da tə hə'i Uz ana tləmənyi Ayuba. Ta'ita'inyi cha ya a da njo uya nyi na sər ngələ wa, ləvər Hyel nya ta cha, ya cho ɗa tsa sə ɗimi. 2 Ngulisha'anyi, shili məɗəfa ana kuilmahi'i makərəu. 3 Kətəngnyi dubəu məɗəfa, dləgwam dubəu makərəu, tla zwa gharəu təfəu ana kwara gharəu təfəu, maviˈinyi ɗang gagaɗa. Nachangə tə ndəɗə na dəgalkur aku huɗa nji'inda təwa zədər pəchi.4 Ngulisha'anyi shili, kwa maka bəla bijir mər ladər ku pama kərnənda, ya ndo maka nga kwamənda inda makər inda kanda səmə kə'inda. 5 Ma bijir ladər tə tərabiya, Ayuba kwa handa təmachi aka ngulisha'anyi. Tsəɗakə mbudla cho hatəmachi aka kala ndə ku pamanda, aka cho na, “Nda ngulisha'aɗa mərtə səpəla'a ga gəlnda Hyel ku ɗəfwanda.” Nacha ngə sənda Ayuba kwa maka məra.
Tangərmar dzə nda uya Ayuba
6 Vanya pəchi, chama Hyel i'i tə shili ka chabiya kərnənda huɗə Hyel, ngə Shantan tsəu tə shili kə'inda. 7 Ngə Tlakə tə nar nyi nə Shantan, <<Nakə tsəu ya, tamanə hya'atə ka?>>
Ngə Shantan tə ɓəlakənyi nə Tlakə, <<Ma'i tanyi nə yo ma'i ku dunəya, ya bana shili bana.>> 8 Ngə Tlakə tə narnyi nə Shantan, <<Amana, a la'atəkə Ayuba mava ɗa ya? A vanya ndə da wi nacha tə dunəya wa, ndə kəla bikə cha ya ta'ita'inyi, ndər ləvər Hyel nda kwa ɗa tsa sə ɗimi.>>
9 Shantan tə ɓəlakənyi, <<Ɓwatanyi ngə Ayuba kwa ləvər Hyel ya?>> 10 <<A da ka wur ɓandə nyi, ana ki nyi dəhəu, ana kala sənda tsa cha na ngakə ma? Ka səkənyi papa'akur təkəra sər cha cha, tə ɗa, kətəng nyi ana tal nyi i'i tə nyandə dəhə hə'i. 11 Har cha ka, ka dəgəya kala sənda tsa cha, ka la'a macha a da ngəlnda nghə wa.>>
12 Ngə Tlakə tə nar nyi nə shantan, <<Yau, yo nə nghə dəhə sənda tsa cha ku cha ka, kəl ja, ngwa kə da tsəkar kər nyi wa.>>
Ngə Shantan tə hya'atə mar Tlakəu ga təra.
13 Vanya pəchi nguli shili Ayuba ka ku'inyi kwa səm ladər ku ki zuwala kənda, 14 kəl janə masinja Ayuba tə shili ga nar nyi, <<Sakanda Tla kwa zwa ana sang i kwa səm ləhə dzənda, 15 ngə njir Sabiya tə shili patə ea ga fa'atə nda ga təra ni. Nda tsəya dəhə mavi'i ngha, naya ngə zhang taɗa tə mbəɗa ka ga ya shili nar ngha.!>>
16 Tsəu tanyi kwa ndəra, ngə vanya kadakaliya tə shili, ga na, <<Hu'u hya'atə kya huɗamələm tə səya ga nginda kətəng ana mavi inghə, naya ngə zhang taɗa tə mbəɗa ka ga ya shili nar ngha!>
17 Tsəu nyi kwa ɓwanya, kəl janə vanya kadakaliya tə shili ga na, <<Njir Kaldiya t shli ku dzukə makərəu tə shili ga pa ea, ga fa'atə dəhə dləgwam nghə i'i ga təra ni. Ngə nda dlənda mavi ingha, naya nə zhang taɗa tə həyadza ka ga ya shili nar ngha!
18 Tsəu tanyi kwa ɓwanya, kəl janə vanya changhabal tə shili səkə ga na, <<Ngulisha'a nghə shili ka ku'imahi'i kwa səm ladər ku ki zu'walə ngha, 19 kəl ngə mandza gyang tə shi ku dadil ga huɓənda ngum fwaɗə nə ki. Ngə ki nda dla ga kuɗənda nda dəhəu, naya nə zhang taɗa tə mbəɗa ka ga ya shili nar ngha!>>
20 Təma ngə Ayuba tə hya'atə tə ta'i ga tətanda lukutə dzənyi ga sənda kəra cha. Ngə cha dla səya hu'i ku səli nə Tlakə 21 ga na:
<<Dura'a ya səbiya ku tah Ama ɗa,
ya dura'a yo ɓələu.
Tlakə ngə tə na'a, ya Tlakə ngə tə dləutsi.
Falə ngyatə nə tləmər Tlakə!>>
22 Aku dəhə sə'inga, a Ayuba da mər səpəla'a təwa nənyi bikə nə Hyel wa.