Elifaz tə Ɓəlakənyi nə Ayuba
4
1 Ngə Elifaz zər Teman tə nar nyi nə Ayuba,2 <<Ayuba, ma ya ɓwanya nənghə ya, ko mər huɗətla ya?
Kək ja ya, wa ngə kwa nau da'atanya?
3 Ka ɗənghatə ənda ka ɗaka dlədləɓə nə alenya nji,
ənda ka tsakətənyi dunama nə nji kəla dunama.
4 Ɓwanya nghə i'i tə hagwanyi chi nə nji inda tə tləhi,
ka nənyi dunama tsəu anə undi nda tə həɗa.
5 Kəl ja, jan nda ka gu ɓwaɓwatə ka sənda kər da pi,
nda ɓwaɓwata tsəka ngha ka ndaltə huɗəma ka.
6 A hə tə kə səli nə Hyel, ya a sər ngələ da ku ngya nghə wa,
aka ənga ko kina uya tsəɗufəu ana fəkər.
7 Jigar dəma ja ka la'a, vanya ndə kəla da nja taa tsəya ya?
Aa vanya ndər jiri da nja taa tsəya ya?
8 Aku ənda ya ndzama, nji inda kwa zwa fa pəla'akur,
ga tləkəya pəla'akur, ndo mərəya pəla'akur.
9 Hyel kwa kuɗənda nda wi ngə gyang par kwa məra,
ma huɗa cha tə tla ndo kuɗa.
10 Ndə pəla'a kwa nau ɗa hərtə wi ləvari,
dəhə ka ənga a ɓəlnda tə nji hira ləvari.
11 Ləvari nda na dunama kwa tah macha a da cha uya sərsumə wa,
nguil nyi tsə kwa wiɗəta nda.
12 Wanya pəchi da nja shili na ɗa ɓwanya tə ɗəwa,
ya dzaudzau hima ya tə ngat sənda nja dəka.
13 Ɓwanya nga, aku shi'uni ngə cha shili na'a vu'i
biji nda nji gwatə ku hanyi laɓlaɓəu,
14 ləvər tə səya ɗa gagaɗa,
tə gwa'atə dəhə ɗihi ɗa kwa dzədzi.
15 Ngə chu vanya gyang tə təranda huɗəma ya,
ngə shishir dza ya tə hya'atə.
16 Sənda tə ta'i,
kəl ja, a da yo nau dəkar ndara sər mingə wa.
Ya la'a vanya sə tanyi biyama ɗa,
ngə ya ngatə kurakə kwa na,
17 <Ndə kwa nau ɗa na tsatsa'akur matsa Hyel ya?
Ndə kwa ɗa chichinyi ndiya ndə nda ɓatlə nyi ya?
18 Janə a Hyel da tə dləukər na mavi'i nyi wa,
ətsəu cha uya chma nyi i'i na bikəu,
19 aman kwa ɗa na nji inda kwa ngya ku ki nyingha,
inda hyavi kənda ku bərbəra,
nji inda njo yirɓənda wi hwa'amia?
20 Ndə kwa nau ɗa na pi mbudla, akə tsə cha tah
a tsəu njo la'a nyi wa, a tsəu njo ɗanghatə na cha pa'a wa.
21 Sə kushi tanyi ngə kwa tləu sə'inda kwa gəzə pya cha,
ndo tah aku tar dəma.