Ɓwanya nda Ayuba tə Dəka
3 <<Chimə ɗa, nja zhazhinda pishinda nja yah ɗa ti, ana vu'i nda nja na, <a hətə nji huɗə zər sal!>
4 Hyelləu, shandə pəchi nga aka kutla, əngwa tsəu ɗənghatə na pəchi ngə wa, əngwa tsəu pəchi mbəl təkəra cha pa'a wa.
5 Shandə ka pəchir huɗətla ana kutlə gagaɗa, mbuya nyi na ləmbəkəu, ka hənda vimbəlmbəl təkəra cha.
6 Nja həbiya pəchi ngə pa'a aku fah, ngwa nji da ɓəla jiga nyi səkəwa.
7 Aa, vu'i nga cha ɗa ka vu'i a njo tsəu hə huɗə wa, ngwa nji tsakətə mər hirgyaɗi kwa wa.
8 Ngwa nji'inda kwa shi'u pəchi nda shi'unda pəchi nga, aa, nji'inda kwa nau shi'unda sə gagaɗa.
9 Ngwa disha wurvi nyi cha ɗa ka kutla, ngwa nja gwaa'a vicham, nja tari, əngwa nji da la'a wi vu'i kwa wur pa'a wa.
10 Aka a da cha haɗənda mbəlya ama ɗa wa, a da cha mbunda ɗa tsa ɓwaɓwatə dunəya nə wa.
11 <<Mya gwa'atə a da ya tə ku ta ama ɗa wa? Mya gwa'atə a da ya tə pishir nja yah ɗa wa?
12 Mya gwa'atə ama ɗa tə dləutsə ɗa tə undya cha? Mya gwa'atə cha na a 'ua cha?
13 Macha na ya nda tə ku bəji nda ta'ir a ɓəlya təya sar,
14 yo nji hanyi wi təl ana njir təlkur i'i inda tə hərəya patla wawa'a.
15 Ma ənga nda ɗa, ta'ir hanyi nə yo nji wi nguil təl, inda tə nyandə ki kə nda ana bəjingha ana zənariya,
16 ndara yo nji hanyi wi zər nda tə səya tətənyi.
17 A tsəu nji pəla'a do mər pəla'akur ku hu wa,
nji inda tə həɗa tsəu ndo uya ɓəlsar.
18 A hinda, ma'a nji inda ku kwa ngya na pyarɗufəu,
a tsəu da ndo ngatə tsə nda ndər tsakəra jarum kwa mər nənda wa.
19 Dəhə nji hinda, a pam da ku njir gəna ana nji ɗaliɗali hinda wa,
mavi'i tsəu uyatə dimukur kənda.
20 Mya gwa'a njo ngyar ndə ku ɓwaɓwatə na pya?
ana pi anə nji inda na huɗətla?
21 Kami njo nənyi vicha nə kwa səkə tah?
bələya tə ndo i tsa kala məsəɗakəkur.
22 Nanda, a da nda na hirgyaɗi wa,
ya hirgyaɗi kənda kəl ma nda gwa ku hwa.
23 Mya gwa'atə njo nənyi pi nə
pa'a kwa la'a lakwa,
ndə nda Hyel tə ɓandə nya?
24 Aka ngi'i ngə tə ɗa ka sərsumə ɗa,
tiwi ɓwaɓwatə ɗa tsə kwa pə wi ɓiti.
25 Sənda yo ləvər nda na uya ɗa,
sənda kwa ləvərandə ɗa na səya kəraya.
26 A pyarɗufu da tsa ya wa, ya a ɓəlsar da tsa ya wa, kəl nda ɓwaɓwatə tanyi nə ya kwa sa.