Huɗatla Tlakə Təkəra Njir Irsa'ila
13
1 Ma Ifərem tə ndəra, njo tsamətladəu,nja hətə nyi səli nə Isra'ila.
Kəl ja, cha mər səpəla'a təwa həsəli nə katə Baal ga tah.
2 Ngə nda biyama na mər səpəla'a a tə vanyi a tə vanyi,
nda ɓatlətə katə azurfa
nda ɓatlətə nyi ɓatlə mənakə nə səlirma i'i təwa dəma kənda,
dəhə tlər njir tlər chi inga.
Njo na təkəra chul nji inə bəra,
<<Ndo hatəmachi na ndəu, ndo gaɓə katə i'i nə daləu.>>
3 Aka əngə ndo ɗa wi kuchikəpa mbudla,
nda kwa pə wi kuchikəpa,
wi chachang nya lar,
wi ear nda kwa biya təwa kagapəu.
4 Kəl ja, naya ngə Tlakəu, Hyel kəhi
nda tə fa'abiya hi zəbiya vu Masar.
A da hyo həsəli nə vanya hyel wa kəl nda naya,
vanya Ndər Dləuya da wa kəl naya.
5 Ya ɓəlatə hi tə dadil takəu,
a tə hə'i dədadəda.
6 Nda ya nə nda sərsuma, dəhə nda tə nyi,
ma nda nda nyi, ngə nda go jalvi,
ga far naya.
7 Aka ənga, yo shili təkəra nda wi levari,
yo mbuya nda laku wi mapəla'u.
8 Wi kəlikəndza'u nda nja fa'aya nguli nyi,
yo pah nda yo kutlanda nda yo ɗinya nda wi ləvari,
kum takə kwa tətau nda kuchiɗəkuchiɗəu.
9 <<Yo kuɗənda Isra'ila,
aka hya mər dawa naya nda ndər vala hi.
10 Aman təl kəhi nda kwa dləuya hya?
Aman njirawawa'a dəhə mələm kəhi inga?
Nda hya gədi tsa ya ga na bəra,
<Nə ea təl ana yirəma inda>?
11 Ku huɗatla ɗa ya fiya hi təl
ana tsə'u ku huɗatla ɗimiɗimi ɗa, ya hənda nyi.>>
12 Aka a fiya tə nji səpəla'a Ifərem ku məɗəwa,
tsəfəyatə nji bikə kənda.
13 Ɓwaɓwatə kwa shili təkəra nda wi bəlakər yah,
kəl ja, wi zər kəla dəma cha,
nda tə ngyar nja yiya nyi tə bəjir yah nyi
ga ngyata nyi ku mbəl yah.
14 <<Yo pəliya nda tsa gyalkur hwa,
yo mbəɗandə nda tsa tah.
Tah, aman təmachi ngha?
Hwaa, aman takasə ngha?>>
<<A da yo ɗa na tuhuɗə təkəra hi wa,>>
15 madangə kəl yah tanyi Isra'ila kwa yah wi sar,
gyang zədərpəchi nə Tlakə kwa shili,
kwa fi təwa dadil takəu,
tsədzəɗə ɓiti kənda kwa ta'i,
ka'ur ɓiti kənda tsə'u kwa shi'ua.
Gyang ngə kwa fa'abiya sə inda ku məɗəwa kənda,
dəhə gəna kənda kwa wura.
16 Tuku njir Samariya kwa həkər bikə kənda,
aka nda tləmwali nə Hyel kənda.
Njo kuɗənda nda na katsakər,
ngulisha'a shiɗəɗə kənda kwa kuɗa,
mahi'i huɗə kənda tsə'u njo tiya ta nda.