Hozaya tə Gədi Njir Isra'ila
14
1 Njir Isra'ila, ɓəl ma shili da Tlakəu, Hyel kəhi.Bikə kəhi tə gwa'atə hya tləhi!
2 Ɓəl ma shili da Tlakəu,
hya pətlənya hyo na,
<<Far dəhə bikə kəea
ka dləutsə ea ku ɗanghali ngha,
tsa'aka eo fal nghə na nya ea.
3 Asiriya da kwa nau dləuya ea wa,
a da eo gyatə taku pah wa.
A tsə'u ea kwa tsakətə nar nyi nə katə kəea i'i ənda,
nanda ingə Hyel kəea wa, aka tsa kə ngə nguli mahə kwa uya tuhuɗəu.>>
4 Tlakə tə na <<Yo ɓəlandə nji ɗa shili da ya,
yo nyidatə nda ga'a,
aka huɗatla tsə'u da təkəra nda wa.
5 Yo ɗa wi kuchikəpa nə Isra'ila,
ndo ɗa wi mambəl wua.
Ndo chiya ngilang
wi wu wawa'a nə seda nda vu Lebanon,
6 inda təka dla'a kwa həa.
Gumagumakur nyi kwa ɗa wi wur zaitun, ya kwitəkwitəkura cha wi wur seda nə Lebanon.
7 Nji kwa shili ngya da kiɗa shanguɗa nyi səkəu.
Ndo zwa uhi gagaɗa,
ndo yah wi anapəu,
tləmən nda kwa tiwi mada təwa bari wi ɓitir anap nə Lebanon.
8 Ifərem, mi hyo mər na katə ingə səka?
Yo wum nə hi, yo ɓəlatə hi.
Naya wi wu nda na hyali tlələfəu ya,
sakəda kəhi kwa hya'atə tsa ya.>>
9 Wa na dəma? Cho zəndə sə ina.
Wa ndər himya? Cho ngabiya sə ina.
Lakur Tlakə tsa'atsa'a cha,
ndər mər sə tsa'atsa'a kwa ma'i kwa,
kəl ja, ndər tləmwali kwa tləhi kwa.