Joel
1
1 Janə ɓwanya Tlakə nda tə shili təwa Joel zər Petuwel.Təmachi Ndzəkwa
2 Ngatə ma njirawawa'a, dəhə nji nda na ngya tə hə'i na, səya ma himi. Sə wi nənna taa ɗa cha ku bəji kəhi ndara ku bəjir jival kəhi ya? 3 Dəkar nyi ma nə ngulisha'a kəhi ga nda dəkar nyi nə ngulisha'a kənda ana ngulisha'a zamin nda kwa shili biyama. 4 A təkəra ndzəkwa inda tə ɗinya sə zwazwa kəmən inda nə yo ɓwanya. Sə inda həyadzə ku nya ndzəkwa tangərma inda, ngə alenya ndzəkwa tə shili ɗinya. Sə inda tə həyadzə ku nya alenya ndzəkwa inda, ngə jigajiga tə shili ɗinya, sə inda tə həyadzə ku nya jigajiga inda tsəu, ngə alenyi ndzəkwa tə shili udiya. 5 Nahi njir wi na mbadla, hya'atə ma ku hanyi mbadla, hya tiwi! Ləla ma dəhə hi nahi njir sa ɓitir anapəu, ləla ma aka a tsabiya tə nji taɗər ɓitir anapə ku nya hi. 6 Aka ndzəkwa shilitə haɗiya hə'i ɗa wi ləmbəkəu, wi ləvaləva inda na dunama nda, ya ɗang nda gagaɗa, nda a da nja kwa nau jigabiya wa, hira nda wi nə ləvari, wi hira malamalar ləvari. 7 Ngə nda shili səwandə wur anap ɗa ga ɗinya wur kanda ɗa i'i. Ngə nda tləɓənda lilibi dzəri ga uchənda, ga gyari cha nda i'i pərtəu. 8 Mər ma sə'ingu wi kwapələkə nda pəndzə guzhalguzhal sə'ingu, kwa sə'ingu tər vamiya nyi nda cho nda həa. 9 Səuhiuhi ka hatəmachi ana ɓitir anapəu a wurtə ku Mbwa'alə Tlakəu. Pərist i'i, nji inda kwa mər tlər mar Tlakə kwa sə'ingu. 10 A tsə'u sə da tə fa i'i wa, hə'i ulti, səuhiuhi səwati, ɓitir anap ulti, wur zaitun ma'a a ulti. 11 Nahi njir zwa, mər ma huɗatla hya tiwi, njir zwa anapəu, mər ma huɗatla aka alkama ana səuhiuhi nda njo nga bale, aka dəhə fa səwati. 12 Ɓitir anap shi'u ti, wur kanda ulti, wur Pomegranet, wur dəbino, wur apəl ana dəhə wu inda tə fa ulti. Hirgyaɗi nji wurti.
Nga ka Tubi
13 Pərist i'i, handzə ma guzhalguzhal sə'ingu hya sə'ingu, tiwi ma njir mər tlər mar dzəgana. Shili ma hya hanyi ku guzhalguzhal sə'ingu, nahi nji inda kwa mər tlər mar Hyel ɗa, aka a tsə'u sər hatəmachi nə sə uhiuhi ana nə sə sasa da ku ki Hyel wa. 14 Bəziya ma səmdzən, tsəmtə ma njirawawa'a ana dəhə nji inda na ngya tə hə'i na, nda shili ku ki Tlakəu, Hyel kəhi, hya shili tiwi nə Tlakəu. 15 Nəkəhya wurtə pishinda! Aka pichir Tlakə ɗatə ləhəu, kwa shili wi təmachi hya'atə tsa ndər gyalkur. 16 A sə da məna nau mər nda sərsum kəməm tə səwa wa, ya a tsə'u hirgyaɗi da ku ki Hyel wa. 17 Chuli i'i ulti ku hə'i. Tsam i'i səwati, val i'i tsə'u a huhuɓəti, aka sə uhiuhi ulti. 18 Sərshishi kwa ngi'i! Tla i'i witi, aka bəɗakə tsə'u da wa, mada biri kətəng ma'a kwa sa ɓwaɓwatəu. 19 Maki Tlakəu, yo gədi ngha, aka hu'u nginda tə bəɗakə ka wu inda biya kərtakəu. 20 Ma'a kum takə kwa tiwi nə ngha, dlələm ultə ya hu'u nginda tə bəɗakə biya kərtakəu.