Hozaya
1
1 Ɓwanya Tlakə tə shili nə Hozaya zər Beri ku bəjir təlkur Uziya, Jotam, Ahaz ana Hezekiya, təl i'i nə hə'i Yahuda, ana ku bəjir təlkur Jeroboam zər Jehowash təl Isra'ila.Mala Hozaya ana Nguli Nyi
2 Nda Tlakə tə ghəya ɓwanya təwa Hozaya, cha nar nyi, <<Ma'i, ka ki həbiya zawar ka mala ngha, nda kwa yiyah ngulisha'a təwa kasalikur, aka təwa əngə ngə njir Isra'ila tə go mər kasalikur 'ual'ualəu, ga ngyar nəu nya Tlakəu ga həsəli nə katəu.>> 3 Kəl ngə cha həbiya Gomer kwar Diblayim, ngə cha hətə huɗu ga yiyah nyi zərsal.
4 Ngə Tlakə tə nar nyi nə Hozaya, <<Ka fəndzə nyi tləm Jezrel ja, aka yo ɓu njir ki Jehu, aka mashi nda nja pənda ku dakə Jezrel, yo gwa'atə təlkur Isa'ila kwa wura. 5 Pəshi nda yo ɓəɓəlnda laga njir Israila ku dakə Jezrel.>>
6 Ngə Gomer tə ɓəla hətə huɗəu ga yiyah kwamalakəu. Kəl ngə Tlakə tə nar nyi nə Hozaya, <<Ka fəndzə nyi tləm Loruhama, aka a tsə'u yo char nyi nyida nə ki Isra'ila ndara ya farbikə kənda wa. 7 Kəl ja, tsə'utanyi yo char nyi nyida nə ki Yahuda, yo dləuya nda, ya a da təwa laga, katsakər ndara dla'a wa, ndara təwa taku ana njir dlə taku wa, kəl nda təwa Tlakəu, nda Hyel kənda.>>
8 Ahir cha katə nyi 'ua nə Loruhama, ngə Gomer tə ɓəla yiyah vanya zərsal. 9 Kəl ngə Tlakə tə nar nyi nə Hozaya, <<Fəndzə nyi tləm Lo'ami, aka a tsə'u hi nji ɗa wa, ya a tsə'u ya Hyel kəhi wa.>>
10 <<Dəhə ka ənga, njir Isra'ila kwa yatəkər wi Məshishi'ua nya fa'a, nda a nji do nau ɗəkətə ndara nja jigabiya wa. Aka ənga, Hyel tə nar nda, <A tsə'u hi nji ɗa wa,> kəl ja, bəji kwa shili nda cho nar nda, <Nguli Hyel nda na pi hi.> >> 11 Njir Yahuda ana njir Isra'ila kwa ɓəla daɓtəkər, ndo tabiya gavərma zhang ku pama nda, ndo zəbiya ku hə'i nda, ndo ɗa dəgal tə hə'i nda, aka pəchir Jezrel kwa ɗa pəchi dəgaləu.