2
1 <<Aka ənga, ka nar nyi nə kə'i zamə ngha, <Nji ɗa,> ana kə'i kwamə nghə tsə'u, <Nji inda yo nyida.>Nja Ɓu Njir Isra'ila ga Ɓəlandə nda
2 <<Ndər ma nə aman hi, ndər ma nə nyi,
aka a da cha mala ɗa wa,
ya naya tsə'u a da ya sal nyi wa.
Cha ngyar zawarkur nyi
ana cha təkə na njir ndaɓə 'ua cha inga.
3 Ma'a əngə wa yo səɗənda nyi dura'a,
ba'a ngya nyi wi nda amanya yah nyi,
yo mərtə nyi wi dadil takəu,
yo ngya nyi wi hə'i hamhama,
ba'a tsəya nyi na hili.
4 A tsə'u yo char nyi nyida nə nguli nyi wa,
aka ngulisha'a kasalikur nda.
5 Aka aman nda kwatəkətachi cha,
cha hə huɗəu kənda ku lakur kuzhi.
Aka cha na, <Yo nəu shili inda kwa nyida ɗa,
inda kwa na'a sərsuma ana ɓiti,
pa'uwa ana lilin, mal ana ɓitir anapəu.>
6 Aka ənga yo datə laku nyi ana shikəɗi,
yo tsau nyi ku ɓangtili tsa cha da uya lakur biya.
7 Cho nəu shili, ya a da cho həya nda wa,
cho gwa'a nda, ya a da cho la'a nda wa.
Kəl cho na,
<Yo ɓəl ya da sal ɗa nda tangərma nda,
aka ngya ɗa nda haaɗa nda ndiya tə nə ya kwa sakanə na.>
8 Aka a da cha zəndəbiya ənda naya ngə
ndə nda tə nə nyi uhi, tadər ɓitir anap ana mal,
ga pəndzə nyi azurfa ana bəjingha
inda nda mər tlər nə katə Baal kənda nə wa.
9 <<Aka ənga, yo katə nyi uhi ɗa ku bəjir mər uhi,
ana ɓitir anap ɗa ku bəji nda cha nə ti.
Yo katə nyi pa'ua ɗa ana lilin ɗa,
nda nja mər ka ɗəuwanda dura'akur nyi.
10 Kəl yo səɗənda nyi dura'a
a tə lya njir nyida nyi,
ndə da kwa dləuya nyi ku cha ya wa.
11 Yo ta'inda dəhə ladər nyi,
ladər nyi nə ka fa ka fa, nə taɗər hya,
nə Pəchir Ngyaməngya nyi i'i ana dəhə ladər nyi i'i.
12 Yo səwandə anap nyi ana wur kanda nyi i'i,
inda cha na bəra nanda ingə wazəba nda njir nyida nyi tə kinda nyi,
yo mərtə cho ɗa ka kubu, ya sərshishi takə kwa ɗənya.
13 Yo ɓu nyi aka hanyi ɗanghə
inda cha hatəmachi nə Baal,
cha ɓatlətə ɓatlə nə kərnyi na tsəshiu ana sər ɓatlə i'i,
ga biya ki nəu shili, kəl ja,
cha far naya,>>
Ənghwandə Tlakəu.
14 <<Aka ənga, yo pətəya nyi,
yo təra nacha gwatə dadil takəu,
ku nda yo gwa par nyi ɓwanya ndo pinda ɗufwa cha.>>
15 Tangnda yo gwa ɓəlandə nyi fa anap nyi,
yo shandə dakə Akor ka mbwar uya fəkər.
Tangnda cho na miya wi nə bəjir kwapələkur nyi,
wi pəshir cha zəbiya vu Masar nda.
16 Tlakə tə na, <<Pəshi nda,
ko nga ɗa <Sal ɗa,>
a tsə'u ko tsakətə nga ɗa <tlakə ɗa wa.>
17 Yo həbiya tləmər Baal i'i ku nya cha,
a tsə'u njo tsakətə nga tləmən nda wa.
18 Pəshinda yo mbandər kə'i nda
sərshishi takəu ana eakə nda biya huɗamələm
ana səpipi inda kwa ma'i təkəra hə'i.
Yo katə laga, katsakər ana pah,
ku hə'i nda,
tsa'aka dəhə nji kwa piya a da na ləvər wa.
19 Yo həbiya nghə ka mala ɗa ba'anawa,
Yo nəu nghə na tsa'atsa'akur ana jiri,
a ku nyida ana təhuɗəu.
20 Yo nyabiya alkawal ɗa ku jirikur,
təwa ənga ko zəndəbiya ənda naya ngə Tlakəu.
21 <<Pəshinda yo wuma,>>
ənghwandə Tlakəu
<<Yo wum nə huɗamələm,
ya ndo wum nə hə'i,
22 ya hə'i kwa wum nə sə uhiuhi,
ɓitir anap ana mal,
ya ndo wum nə Jezrel.
23 Yo chiya nyi ka kərɗa ku hə'i nda,
Yo char nyi nyida nə ndə nda ya na <A da yo nyida nghə wa.>
Yo nar nyi nə nji inda nja na, <A da hi nji ɗa wa,>
ya ndo na, <Nakə ngə Hyel kəea.> >>