Dlədləɓə Daniel vu tə Hə'i Babila
1
1 Aku makərkuya fa Jehoyakim ku dzəga təlkur Yahuda, ngə Nebukkanizar təl Babila tə shili ɓandi Urushalima na pah. 2 Ngə Tlakə tə nə nyi Jehoyakim təl Yahuda ku cha cha, ana tsəu dəhə ka alənya sər mbwa'ala Hyel. Dəhə sə nda cha fa'aya cha təra nə yo vi katə nə njir Babila ga yi pəu gu məduwa vi katəu. 3 Ngə Təl tə nə nyi gyalkur nə Ashipenaz, sərma vi nəuma, cha shili na alənya njir Isra'ila nyavi təl təl ana njir səli, 4 tlakala inda pa'a na vər tyakəm, gumaguma, nda na həkər kala dlədləɓə mada təwabari, ana ngabiya, nda na zəndəbiya kusəkusəu, ətsəu batləbatlənyi ka mər tlər tə patla təl. Ga cha dlədləɓə tə nda nya ana kəratsən nə njir Babila. 5 Ngə təl tə na təku njo nə nda sərsum ana ɓitir anap hya'atə tə təmbəl təl. Ndo dləɗləɓə nə fa makərəu, a hir ənga ndo dzəgwa gwa ku tlər tə patla təl. 6 Aku pama nda janə alənya njir Yahuda: Daniyel, Hananiya, Mishayel ana Azariya. 7 Ngə Sərma njirawawa'a nda tə fəndzə nda taɗər tləm: Daniyel nja fədzən Belteshazzar, Hananiya tsəu, ngə cha fəndzə nyi Shadrak, Mishayel tsəu, nja fəndzə nyi Meshak ana Azariya ngə nja fəndzə nyi Abednego. 8 Kəl ja, Daniyel da i səwandə kərnyi na sərsum ana ɓitir anap nə ki təl wa, ngə cha gədi sərma njirawawa'a təl cha cha da səwandə kərnyi ku chulkə na laku. 9 Sakana Hyel mərtə tə Ashipenaz ga cha char nyi mənakkur ana təhuɗə nə Daniyel. 10 Kəl ngə Ashipenaz tə nar nyi nə Daniyel, <<Yo ləvər tsa tlakə ɗa təl nda tə fəkə ɗa təkəra sərsum ana ɓiti. Miya gwa'atə təl kwa la'a ngə pam ma tsa alenya tlakala shili nə məlkər ngha? Təl kwa tlanda kəra ya.>> 11 Ngə Daniyel tə nar nyi ndə nda nja fəya ka tsa kəra kə'i Daniye, Hananiya, Mishayel da Azariya. 12 <<Maki dzar mavi'i nə hanyi kuma: Ngwa ka da nə ea vanya wa kəl hyali tsamunyi ana ɓiti hərkəu. 13 Ahir nga ka ndzamar huɗəma ea ana alenya tlakala inda kwa səm sərsum tə patla təl, ya kəl ba ka mər na mavi'i ngə tsa'atsa'a wi sənda lyakə tə la'a.>> 14 Kəl ngə Ashipenaz gavərma njirawawa'a patla təl nda tə dləukər na ɓwanya kə'i Daniyel ngə biyama na dzar nda nə hanyi kuma. 15 Pishir hanyi kumkunyi kwalang ana dzanda mənakə matsa nə alenya tlakala shili inda tə səm sərsum patla təl inda. 16 Ngə ndər tsa kəranda nda tə ngyar nənda sərsum patla təl nda ga biyama na nənda sə hyalihyali. 17 A nə tlakala fwadə ingə Hyel tə nənda zəndəbiya dəhə alenya likatkatə ana dlədləɓa. Daniyel tsəu kwa ngabiya takər ana shi'uni dəhə. 18 A tə bata, nda bijir shili t na nada nə təl tə ɗa, ngə gavərma tlər tə shili na nda huɗə Nebukkadnezzar. 19 Ngə təl tə mbwanya kə'i nda, a cha uya məlməl na Daniyel, Hananiya, Mishayel ana azariya wa, ngə nda gwa ku tlər patla təl. 20 A ku dəhə jigadəma ana zəndə sə inda təl tə jawu nda, cha uya nda zhaka kuma ndiya njir bushin ana njir hakəzi inda dəhə ku hə'i nyi. 21 Ngə Daniyel tə biyama na ngya tə Patla tə ba'a shili ku fa tangərma nda təl Sayirus tə gyatə təlkur.