Tangəmar Shuini Nebukadnezzar
2
1 A ku mətləkunya far Nebukadnezzar cha shi'uni, ngə dəfwa cha tə ɗa na ɓwaɓwatə nda a tsəu cha kwa nau nji hanyi wa. 2 Kəl ngə təl tə sə nja tsəmə tə dəhə njir sə shinshin, njir ha kəza, njir kuzəkəu ana nji inda tə fiya tləmən nda na nəu katəu ga nda shili dəkari nyi sənda shi'uni nyi nda təkəri. Nda nda shili ta'i mar təl, 3 kəl ngə təl tə nar nda, <<Ya shi'uni nda kwa na'a ɓwaɓwatəu, yo i hya dəkar nda sənda cha təkəri.>> 4 Kəl ngə nji inda ngatə na kuzəkə tə na, <<Alvari, pya ka ɗa dəgaləu! Nar nyi shi'uni ngə nə mavan ngs, ya eo dəkəbiya sənda cha təkəri.>> 5 Ngə təl tə wum ne njir kuzəkə inda, <<Janə sənda ya tlanda ku ɗəfwa ya: Ma aka nar ɗa shi'uni ɗa ka dəkar ɗa sənda cha təkəri wa, njo tlətlau ɗa hi kuchiɗəkuchiɗə njo shanɗə ki kəhə ka huɗəfi. 6 Mahya dəkar ɗa shi'uni ɗa nga, ka dəkbiya ɗa sənda cha təkəri, ga'a da nda yo nə nga ana səli dəgaləu, aka ənga dəkar ɗa shi'uni ɗa nga ana sənda cha təkəri.>> 7 Ngə nda ɓəla wum ga na, <<Ngwa təl nar nyi nə mavi'i nyi shi'uni nda cha shi'uni ga ea dəkar nyi sənda cha təkəri.>> 8 Kəl ngə təl tə wum nə nda ga na, <<Təkəɗə a zəndə tə ya hyao gwa'a hya uya biji ngha, aka a zəndə hə təkəɗər sənda ya hətə salkur nyi: 9 Ma'a a hya dəkar ɗa sənda shi'uni ɗa ngə təkəri wa, ɓwaɓwatə zhang tanyi ngə kwa uya hi. Ma hya daɓətə kər ga pəa ɓwanya gizhə ana sə ɗimi i'i, hyo hari ənda sə kwa ɓlatə dza. Sakana, dəkar ɗa ma shi'uni ɗa nga, tsaka yo zəndə ənda hyo dəkar sənda cha təkəri.>> 10 Ngə njir zəndə kuzəkə inda tə wum nə təl ga na, <<A vanya ndə da ku dunəya na kwa nau mərtə səngə təl kwa jau nə wa! Alvari, a vanya ndə ndə nyi da wa, aka ənga a vanya ndər səli ndara gyalkur da ta jau njir kuzikəu ndara kəzə chulkə ngə na sə wa. 11 Sə ni təl kwa jau innə dzau. a ndər nau dəkəbiya sə nə təl wa kəl nda hyel i'i, ya a nda na ngya ku pama nji wa.>> 12 Ngə na sə tə tləya huɗa təl ngə cha na nja nja kuɗə nda njir zəndə ku Babila. 13 Aka ənga ngə cha fiya gadlagadla nja kuɗə na nda, ngə sə nja ki gwa'a Daniyel na nda kə'i bazhinyi inda nja kuɗə na nda. 14 Nda Ariyok dəgal njir tsakəra tə shili ka cha kuɗə nda Daniyel ka bazhinyi inda, kəl ngə daniyel tə wum nə Ariyok ku kəriwa ana dəma, ga na, 15 <<Miya gwa'atə njo kusa na tsaubar əna? Kəl ngə Ariyok tə nənyi labar sənda tə ɗa nə Daniyel. 16 Kəl ngə Daniyel tə ya da təl ga yi gədi təl cha nə nyi bəji, tsa'aka cha dəkəbiya shi'uni təl ana sənda shi'uni nda tə kəri. 17 Ngə Daniyel tə ɓəl kyo ki ga ki nar nyi nə Hananiya, Mishayel ana Azariya bazhinyi i'i. 18 Aka ənga Daniyel tə tsə dəfu nənda nda gədi təhuɗə tsa Hyel nda kihuɗamələm təkəra məngəl wi na, a tsa nacha kə'i bazhinya nja da ba'a kuɗə na nda kə'i njir zəndə nə Babila. 19 Aku vu'i ngə Daniyel tə uya takər təkəra sər məngəl nda, ngə hətə nyi səli nə Hyəl huɗa mələm 20 ga na: <<Səli nə tləmər Hyel ba'anawa, dəma ana gyalkur ngyatə nə nyi. 21 Cha kwa bəlatə bəji ana saka, cha kwa fiya təl ga piya nda. Cha kwa nə nyi dəma nə njir zəndə ana zəndəbiya sə pampam. 22 Cha kwa mɓədəya sənda ndzədakəu ana sənda dəwadəwa nyi i'i, ana zəndə cha sənda tə dəwa ku kutla, vimbəlmbəl tsa'a na cha. 23 Yo usaku ana hətən səli, yawa Hyel adan ea. Aka ka na'a dəma ana gyalkur, ka chabiya ɗa tə babal sənda ea gədi tsaka, ka chabiya ea shi'uni təl.>>Daniyel tə Dəkəbiya Shu'uni ana ba'adar Shu'uni nda təkəri
24 Daniyel tə ya ɗa Ariyok, ndə nda təl tə tsakənyi kuɗə nda njir zəndə Babila nda, ngə cha nar nyi, <<Ngwa ka da kuɗə nda njir zəndə Babila wa. Ma'i naya gwa da təl, yo gwa dəkari nyi sənda shi'uni nyi tə kəri.>> 25 Kəl ngə Ariyok tə gwa na Daniyel nə təl ga nar nyi, <<Jani ya uya tə ndə ku pama nji shilishili ku nayavi Yahuda nda kwa nau dəkari nyi təl sənda ba'adar shi'uni tə kəri.>> 26 Kəl ngə təl tə jau Daniyel (nda nja kwa nga nyi Belteshazzar), <<Nakə go nau nar ɗa nda ya shi'uni ya ko dəkar ɗa sənda cha tə kəri?>> 27 Ngə Daniyel tə wum ga na, <<Aa ndər dəma, ndər zəndə, bushin, kuzəkəu ndara yagə ha kəzə da kwa nau dəkari sə təkəra sə in təl tə jau inə wa, 28 kəl ndara ndara Hyel nda ki hudamələm ngə kwa na dəkəbiya sə səshinshin. Nda tə dəkari nyi nə təl Nebukkadənəzzar sənda kwa ɗa ku hanyi ingə kwa shili ngha. Shi'uni ana takər nda tə gwa ku dəfwa ka ku sakanda ka tə sər piya ngha: 29 <<Nda ka tə piya ngha, Tələu, ngə jigadəma tə sha yi təkəra kwa shili, ndər gyalkur chabiya sənda kwa ɗa tə chabiya ngə səinda kwa ɗa biyama. 30 Ba naya na'a, sər muniya ngə chabiya ɗa tə nji ba'ada nyi, a da ga zəndə ɗa tə ndiya nə alənya nji wa, kəl nda aka təl zəndəbiya ba'ada ana ngabiya səinda tə ma'i ku dəfwa ka. 31 Aləvari təl ku shi'uni nhga, <<Ka la'a silərma Ndzə dəgaləu, kwa mbəla, ana sər ləvər ta'i huɗə ngha. 32 Kəra silərma nda nja mər na ndza, hatla cha ana chacha nja mər na azurfa, tacha ana eah cha nja mər na bəjingha, 33 hyacha lyang ana makərmanyi nyingha tsatsa. 34 Manda go ndzam nyi, kəl jan nja tlanda vava, a da na cha ndə wa. Kəl ngə vava nda tə siya huhumə nda hya silərma nda na lyang ana nyingha nda kuchiɗəkuchiɗəu. 35 Kəl ngə lyang nda, bəjingha nda, azurfa nda ana ndzə nda tə huhuɓu kuchədəkuchiɗə ku bəji zhang ga ɗa wi ɓabiya dəkə tə lar. Gyang kwa tsəkə nda a da cho mada mə tang nda wa. Aka vava nda tə dəkə silərma nda tə ɗa dəgal nya məa ga nyandə dəhə dunəya. 36 Nənə ngə shi'uni təl nda, ya eo dəkəbiya nyi sənda cha təkəra. 37 Nakə alvari, təl nə təl i'i, Hyel nda ki huɗa mələm nə ngə tə papa'akur, gyalkur ana səli; 38 ku chakə nja tsau nda, sərshishi nda biya tə babal, eakə inda biya huɗa mələm. Mada aman nda na ngya, nake ngə təl təkra nda dəhə. Nakə ngə kəra ndza. 39 "A hi ngha vanya təl kwa shili hya'ati, kushi cha matsa ka. Vanyi, makərkunya hə'i, zhang bəjingha, cho səm təlkur təkəra dəhə dunəya. 40 Batəbatə nyi, fwakunya təl kwa ɗa na gyalkur wi lyang, aka lyang kwa huɓiya kwa həhagwa sə dəhəu, ya lyang kwa kukuchədiya ya cho wazənda ana təkəbiya dəhə alənyi. 41 Tang wi ngə ka la'a mar hya cha ana ku'ir hya cha nyigha tsatsa manyi tsəu lyang, əngə sənda ngə təlkur kwa təka; dəhə ka əngha alənyi kwa ɗa na dunama wi lyang, mada ngə ka la'a lyang ana nyingha dabdabə nyi. 42 Wi ngə ku'ir hya cha manyi lyang ana vanya manyi nda tsəu nyingha, aka əgha təlkur ngə manyi kwa ɗa na dunama manyi tsəu kəla dunama. 43 Kəl ja, wi ngə ka la'a lyang dabdabə nyi na hə'i tsatsa, engə tanyi tsəu nji kwa gwatə dza a tsəu ndo ɗa na dabəkər wa, tang wi ngə a lyang na nyingha da kwa dabə wa. 44 Kəl nda ja, ku bəjir təl ingha, Hyel huɗa mələm kwa hya'andə vanya təl nda a njo nau tsəya ndara vanya ndə kura nyi wa. Cho kura alənya təl ya cho ɓəlnda təlkur kənda, kəl cho ngya ba'anawa. 45 Nacha ngə ba'adar shi'uni nja tlabiya vava ku məa ya a da na cha ndə wa, vava nda tə huɓiya lyang, ndzə nda, nyingha nda, azurfa ana bəjingha kuchiɗəkuchiɗə inda. <<Hyel təkərnyi tə chabiya nyi nə təl sə nda kwa shili biyama. Shi'uni ngə vəlvəl ya ba'adanyi ngə tsəu jiri jiri ngha.>> 46 Kəl ngə təl Nebukadnezzar tə səya tsəpu mar Daniyel ana hə səli, ngə cha na nja shili na nyi hatəmachi kətkətəu nə daniyel. 47 Ngə təl tə nar nyi Daniyel, <<Təkəɗəu Hyel ngə Hyel nya hyel i'i ana Tlakə nə təl i'i, ndər dəkəbiya sə shinshin i'i, aka ka nau dəkəbiya sə nda tə duwa. 48 Ngə təl tə nə nyi dəgalkur nə Daniyel ana ga'a 'ual'ualəu. Ngə cha mərtə gavərma təkəra dəhə njir zəndə nə Babila. 49 Matsa ngə ma, təkəra gədi Daniyel təl tə nyi dəgalkur nə Shadrak, Meshak ana Abednego nə nəu na nji ku Babila, Daniyel nə nyi cha biyama na ngya ku vi numa təl.