Səlirma Bijinga ana Hu'u Kətsa Kəla Təa
3
1 Təl Nebukadnezzar tə fətəbiya səlirma bijinga dzəgamkur nyi təkə hi dləkumnyi, bangkur nyi tsəu hi dla, ngə gi fiya kyatə digəl Dura ku mətla hə'i Babila. 2 Ngə cha sə nja tsəmtə nyi dəhə njirawawa'a nyi i'i, Gwamna mətla hə'i, gwamna kadzəkukadzəku, njir dəkə dəma, njir gəzi məduwa, njir tla numa, njir mər numa ana dəhə njirawawa'a nda shili dəhəu, aka nda shili ku ladir dzəvə katə bijinga nda təl Nebukadnezzar tə fiya. 3 Kəl ngə dəhə njirawawa'a nyi i'i, Gwamna mətla hə'i, gwamna kadzəkukadzəku, njir dəkə dəma, njir gəzi məduwa, njir tla numa, njir mər numa ana dəhə njirawawa'a tə tsəmtə dzə ka ta'i ka dzəvə səlirma nda təl Nebukadnezzar tə fiya nda. 4 Kəl ngə changhabal tə na na kurakə dzəgaməu, <<Janə tsaubar sənda hyo məra, nji, hə'i i'i ana njir nya pampaməu: 5 Ma saka nda hya ngatə ngatə kuraka tələm, mbalau, gulum, zəmbəl ana aligata ana kala sə tsatsa na dəhə sə mbəɗəmbəɗa, tuku hyo uzhə səya hu'i hyo hətə nyi səli nə səlirma bijinga nə Təl Nebukadnezzar tə fiya na. 6 Dəhə ndə nda da uzhə ka hə səli wa njo bəzəu nyi gu hu'u gəɗəgəɗə dzəgədzəgəu.>> 7 Aka əngha, saka nda nja ngatə kuraka tələm, mbalau, gulum, zəmbəl ana aligata ana kala sə tsatsa na dəhə sə mbəɗəmbəɗa, kəl dəhə nji, hə'i i'i ana njir nya pampaməu tə uzhə ka həsəli nə səlirma katə bijinga nda Təl Nebukadnezzar tə fiya nda. 8 A tə bəji ngha, ngə alənya njir Kaldiya tə yi na wula təkəra njir Yahuda. 9 Nda yi nar nyi Təl Nebukadnezzar, <<Alvari təl, pyaka ngya ba'anawa! 10 A biya tə kə na gadlagadla, Alvari, bra dəhə saka nda nja ngatə kuraka tələm, mbalau, gulum, zəmbəl ana aligata ana kala sə tsatsa na dəhə sə mbəɗəmbəɗa, tuku hyo uzhə səya hu'i hyo hətə nyi səli nə səlirma ndzə nda, 11 təkəra dəhə ndə nda da uzhə ka həsəli wa njo bəzəu nyi gu hu'u gəɗəgəɗə dzəgədzəgəu. 12 Ya kəl jan alənya njir Yahuda nda ka nənda jiri ka nənda alənya mətla hə'i nə Babila, Shadrack, Meshak ana Abednego a da nda ɗəngha na wa, Alvari. A da na həsəli nə hyel ngha ndara nda həsəli nə səlirma bijinga nda ka fiya nda wa.>> 13 Təma ngə Nebuchadnezzar tə hya'atə madɗə na huɗətla ga na nja shili na Shadrach, Meshach, ana abednego. Kəl nja shili na nji inda mar təl, 14 ngə Nebuchadnezzar tə nar nda, <<Shadrach, Meshach, ana Abednengo, vəlvəl ngə ənda hya ngyari uzhi nə katə ɗa, ga ngyar həsəli nə bijinga ngə fətəbiya ga ta'ində ngə ya? 15 Sakan ja, ma hya ngatə kuraka tələm, mbalau, gulum, zəmbəl ana aligata ana kala sə tsatsa na dəhə sə mbəɗəmbəɗa, macha ɓatliya tə hi ga hya uzhi hya həsəli nə sə ngə ya fətəbiya nga, kwa ɗa durdur. Kəl ja, ma'a hya həsəli nənyi wa, njo bəzəu hi ɗəɗəu gwatə hu'u ngə nja dzəkətə nga. Ndara hyel mangə kwa nau dləuya hi ku cha ya?>>16 Ngə Shadrach, Meshach ana Abenego tə ɓəlakənyi nə təl, <<Əja Nebuchanezzar, a da eo gwa'a ka ea dləuya kərnə ea amanghə aku chul nəna sə wa. 17 Macha ɗa nja bəzətə ea gwatə hu'u nga, macha Hyel ngə ea kwa nəu ngha, kwa nau dləuya ea tsari, ba'a cha dləuya ea ku cha ka. 18 kəl ja, ma'a cha mər wa, eo i ka zəndə ja təl, ənda a da eo nəu katə nga ndara ea hesəli nə bijinga ngə ka fətəbiya ga ta'indi ngə wa.>>
19 Kəl ngə huɗa Nebuchadnezzar tə tla na ka Shadrach, Meshach ana Abednego, huɗəmacha tə ndaltə dza. Ngə cha na nja tsakətə dzəgətə hu'u nda kwakwaɗəkur nyi cha ɗa zhaka məɗəfa matsa nda parakəu, 20 cha nar nya nə ləvaləva inda na dunama nda mbiya Shadrach, Meshach ana Abednego nda bəzətə nda gwatə hu'u nda. 21 Ngə nda mbiya nji inda ga bəzəu nda gu hu'u nda, ana daura kənda, pahuɗə mbakər, gyarakən ana alənya dzaki kənda inda dzənda. 22 Ka ngam nda təl, ku huɗətla nyi cha gwa'a nja dzəkətə hu'u, kyara hu'u nda tə dlənda ləvaləva inda aku sakanda nda kwa bəzə nji makər inda gwa kwa. 23 Kəl Shadrach, Meshach, ana Abednego mbambanyi, nda dla gwatə hatləa hu'u nda.
24 Kəl ngə nebuchadnezzar tə hya'ati atə hya cha kwa mər məngəl. Ngə cha jau njir dəkə dəma nənyi, <<A da nji makər nda mən tə mbiya ga vakəu gwatə hu'u ma?
Nda ɓəlakənyi, <<əngə Aləvari>>
25 Ndə cha, <<Ndzama! Ya la'a nji fwaɗə kwa ma'i ku hu'u, pəlpəl nyi ya takasə da ndzənda wa, ndə fwaɗəkunyi nga kwa pabiya zər hyel i.>>
26 Təma ngə Nəbuchadnezzar tə yi ləhə dzər nyavi nda hu'u kwa nda ga na: <<Shadrach, Meshach, ana Abednego, mavi Hyel nda na səli, zəbiya ma! shilma tang na!>>
Kəl ngə Shadrach, Meshach ana Abednego tə zəbiya ku hu'unda. 27 Təma ngə təl inda da kida cha, ka yirima i, gwamna, ana nji dəkə dəma nyi tə shil daɓkənda dza, ngə nda la'a hu'u nda da tə tsəka nda wa. Ma da shishir kəranda da tə ngi wa, dzaki dzanda da tə ngi wa, ya a shi'uni hu'u da dzənda wa.
28 Təma ngə Nebuchadnezzar tə na, <<Fala a ngyatə nə Hyel ka Shadrach, Meshach, ana Abednego, nda tə sətə chamanyi ga mbəndə mavi nyi nda tə dləukəri na cha. Nda ngyari tsaubar təl ga dləukəri na ta, matsa həsəli nə katə kəl nda Hyel kənda. 29 Aka əngha, fiya tə ya gdlagadla dəhə njir hə'i ndara nya tə ɓwanya kəla kər təkəra Hyel Shadrak, Meshak ana Abednego nja tsətsəɗəu nda ana ki kənda nja shanɗə ka huɗəfi, aka a vanya hyel da kwa nau dləuya wi nə wa.>> 30 Kəl ngə təl tə tsakə tə nyi dəgalkur nə Shadrak, Meshak ana Abednego tə mətla hə'i Babila.