Nebukadnezzar tə Shi'uni na Wua
4
1 Hya'atə tsa Təl Nebukadnezzar, ya da nji, hə'i i'i ana dəhə njir nya pampaməu, nda na ngya tə dəhə dunəya: Piyar dəfu cha ngya tsa na hi! 2 A ku hirgyaɗə ya kwa i dəkar hi sərmuniya ana sər məngəl nda Hyel Ndər Gyalkur tə mərtə na'a. 3 Ba'adar muniya nghe dəgal cha ya sər məngəl nghe tsəu 'ual cha! Hə'i nyi hə'i nda ba'anawa; gəlkur nyi ngyatə jival biyamar jival. 4 Naya, Nebukadnezzar, Məsadakur da ku kiɗa ana gəna 'ual'ual tsəu. 5 Ya shi'uni nda tə na ləvəra. Nda ya tə piya tə gadəu ɗa, səlirma ana shi'uni tə ma'i ku jiga dəma ɗa tə ləvər na ɗa. 6 Ngə ya sə nja tsəmtə ɗa dəhə njir zəndi nda ku Babila nda shili maɗa ka nda shili dəkar da ba'adar shi'uni nda ya shi'uni. 7 Manda dəhə njir dəhə njir sə shinshin, njir ha kəza, njir kuzəkəu ana nji inda tə fiya tləmən nda na nəu katəu tə shili, ngə ya nar nda shi'ini nda, a da nda nau dəkəbiya ɗa ba'ada nyi wa. 8 A tə bata, Daniyel tə shili mada ngə ya nar nyi shi'uni nda. (njo nganyi Belteshazzar, məlməl na tləmer katə ɗa ana mambəl tlakə hyel i'i təkəra cha.) 9 Ngə Təl Nebukadnezzar tə nar nyi nə Daniel, <<Belteshazzar, dəgalər njir sə shunishuni, a zəndi tə ya mambəl tlakə hyel i'i təkəra ka, a vanya sə da kwa ɗa dəwadəwa nyi nda dzau nə ngə wa. Jani shi'uni ɗa; dəkar ɗa ba'ada nyi. 10 Jani shi'uni nda ya shi'uni nda ya tə piya tə sər piya: Ya ndzama a mada tə ghadar hə'i ngə la'a wu dzəgam gagada ta'iu. 11 Wu nda tə he dəgaləu ya ana dunama ana kəra cha tə tsəkar huɗamələm; dəhə dunəya ko təwabari kwa la'a. 12 Hyali nyi tsəu gumaguma, yahyah nyi tsəu nja ngyari kala ndə kwa səma ana sərsum a nə dəhə səu. a da kida cha dəhə sərshishi kwa uya shaguɗa, ana eak inda biya huɗamələm tsəu kwa ngya tə cha cha, a ku cha dəhə səpipi kwa səma. 13 Aku shi'uni nda ya tə gadu ɗa, ya la'a changhabal karti a huɗə ɗa səya kya huɗa mələm. 14 Ngə cha nga na kurakə dzəgam: 'Gəganda wu nga ka tsauya chacha, ka tsatənda hyali nyi ana kwa wədinda yahyah nyi. Ngwa sərshishi huibiya tə kidə ana eak i'i nda biya hui tsa chacha. 15 Kəl ja, tugətlə nyi ana ngəlangha cha mbambanyi na lyang ana bəjingha, nja ngya nyi tə babal ana ku sar tə takəu. << <Cha ləɓu kuchafə na kuchikpa səya ki huɗa mələm, kəl cho ngya ka kə'i sərshishi ku lya wu tə dunəya. 16 Ngwa dəman nya nə ndə cha bəlatə dzə nja nə nyi nə sərshishi, cho biyama na chulkə ngə na ngya nə fa məɗəfa. 17 << <Chulkə ngə na mafakə numa tə ma'i ko təwa bari təwa changabal, nji'inda karti tə tlanda tsa'aka nji nda na pi kwa zəndə Ndər Gyalkur ana gyalkur cha tə kəra təlkur ndəu, ya kwa nau cha nə nyi nəe ndə cha kwa i, kwa cha nə nyi mada nə ndə tuta.> 18 <<janə shi'uni nda ya shi'uni nay, təl Nebukadnezzar tə məra. Sakana, Belteshazzar, dəkar ɗa sənda cha tə kəri, aka a zhang ku huɗa njir zəndə nə hí ɗa tə nau dəkəbiya ɗa wa. Kəl ja, nakə go nau, aka mabəl hyel tlakə təkəra ka.>>Daniyel tə Dəkəbiya Ba'adar Shi'uni Nda
19 Kəl Daniyel (nda nji kwa nga nyi Belteshazzar) tə gwa ku jigadəma 'ual'ual nə bəji kushiu, ya jigadəma nyi kwa ləvər nda nyi. Kəl təl tə na, <<Belteshazzar, ngwa shi'uni ngə ndara ba'adan da ba'a widən ngə wa.>> Ngə Beltəshazzar tə wum ga na, <<Tlakə ɗa, ba'adar shi'uni na cha ɗa tə kəra njir dawa ngha! 20 Wu nə ka shi'uni nə na, nda hə 'ualəu ya ana dunama, kəra cha kwa tsəkar huɗmələm, dəhə dunəya kwa la'a, 21 ana hyali nyi gumaguma ana yayah nyi bwaɓu, kwa nə nyi sərsuma nə nji dəhəu, shanguɗa nə sərshishi ana chacha vər la ki nə eak inda biya huɗamələm. 22 Alvari tələu, nakə ngə wu nga! Ka ɗa na səli 'ualəu, səli ngə tə həa ga həya huɗamələm, mtla ngə tə mbədə ko təwabari nə dunəya. 23 <<Alvari tələu, ka la'a chama karti, tə səya kya huɗamələm cha kwa na, <Gəga nda wu nga hya təkutlə nyi, mbamba nyi dzəra lyang ana bəjingha, ku sar nda tə babal, kəl nda ngəlangha cha tsəu tanyi ku hə'i. Cho ləb na kuchikəpa səya ki huɗamələm ngya nyi kwa ɗa wi sərshishi, kəl fa məɗəfa tə tərabiya.> 24 Alvari tələu, əngə ngə sənda ba'adar shi'uni ngə təkəri ya əngə sənda tlakə tə na təkəra tlakə ɗa təl: 25 Njo təkəbiya ngə na nji go ki ngya kə'i kum takə; go ɗə sar wi tla, dza kə kwa ləbə na kuchikəpa huɗamələm. Kəl fa məɗəfa kwa tərabiya kəl ka zəndə Tlakə ndər gyalkur cha təkəra təlkur ndə ya cho nə nyi nə dəhə ndə nda cho i cha nə nyi. 26 Ba'adar ngyar tugutlə nə wu nga ana ngilangha cha, njo ɓəladə ngə təlkur ngha maka zəndəbiya təlkur huɗamələm. 27 Aka ənga, alvari tələu, maki ngatə jigadəma ɗa: Ka ngyar mər səpəla'a ga mər sə nda tsa'atsa'a, ka ngyar mər ɗimikur ka mər mənakur nə nji nda tutu. Tsa'aka ndara go biyama. 28 Sə ingə tə ɗa na Təl Nebukadnezzar. 29 Ahir hya kwabəmətləu, təl kwa zuli kyatə kəra vi nda kyatə kəra patla vu Babila, 30 ngə cha na, <<A da Babila nda ya hərtə ka patla təwa gyalkur ɗa ana səlir səli ɗa nə ma?>> 31 Ma tsəu cha kwa ɓwanya kəl kurakə tə səya kya huɗamələm, <<Janə sə nda nja batliya ka ka, Təl Nebukadnezzar: Dləuya tə nji təlkur ngha. 32 Njo gədlə nda ngə tsa nji go ki ngya kə'i sərshishi takəu; go ɗə sar wi nda tla kwa ɗəa, Kəl fa məɗəfa kwa tərabiya kəl ka zəndə Tlakə ndər gyalkur cha təkəra təlkur ndə ya cho nə nyi nə dəhə ndə nda cho i cha nə nyi.>> 33 Tanda təma ngə sə nda nja na tə kəra Nebukadnezzar tə nyabiya dzəa, Ngə nja gədləbiya tsa pama nji, ngə cha ki ghəya na ɗə sar wi tla. Kəl dza cha tə ləɓə na kuchikəpa, shishir nyi tə hə wi babəga dukəu ana pəla cha tsəu wi nə eakəu. 34 Ahir bəji inda tə tərabiya, Naya Nebukadnezzar, ngə hya'adə huɗumaya shi huɗamələm, kəl ngə jigadəma ɗa tə ɓəl shili dzə ɗa. Kəl ngə ya hətə nyi səli nə ndər gyalkur, ngə ya fal nyi ga na həyakər nacha na pi ba'anawa. Aka təlkur ba'anawa ya təlkur nyi ngyatə zamin biyamar zamin. 35 Aka njir dunəya a da nda vanya səwa. Cho mər sə nda ɗa nə nyi na gyalkur huɗamələm ana njir dunəya. Vanya ndə da nji ka ɓəla ndə cha cha ndara ɓwanya nə nyi wa: <<Mi nə ka məra?>> 36 Atə bəji nda jigadəma ɗa tə shili dzə ɗa ti, kəl səli ana gyalkur nə səli təlkur ɗa tə ɓəl shili da ya səkəu. Njir dəkə dəma kə'i njirawawa'a ɗa tə gwa'a ɗa ga ɓəlau ɗa go təlkur ɗa səkəu, təlkur ɗa tə ɗa na gyalkur matsa nda ha'aɗa nda. 37 Sakana naya, Nebukadnezzar, fal ana hə səli nə təl huɗamələm, aka dəhə sə nda cha mər ana laku nyi tsa'atsa'a. Aka nji inda hə kəra kər nə nda ndo nau həya kər.