Tsəfə da Dza Ɓantili
5
1 Təl Belshazzar tə batliya ladər nə njirawawa'a nyi gharukumnyi nə sa sə sasa kə'i nda. 2 Aku bəji nda Belshazzar ku sa sə sasa nyi, ngə cha sə nja shili na bəjingha ana azurfa inda ada nyi Nebukadnezzar tə fa'aya ku mbwalə vu Urushalima nda, aka tsa'aka təl, njirawawa'a nyi, mahi'i nyi ana kwatəra nyi nda sa sə sasa kwa. 3 Aka ənga, nja shili na bəjingha ana azurfa inda nja fa'aya ku mbwalə vu Urushalima nda, aka tsa'aka təl, njirawawa'a nyi, mahi'i nyi ana kwatəra nyi nda sa sə sasa kwa. 4 Nda sa ɓitir anap, ngə biyama hə səli nə katə i'i nə bəjingha, azurfa, ndza, lyang, wua ana hangu. 5 Ɗəɗəu tanyi kəl janə ku'ir ndə shili kwa tsəfə tə ɓantili nda nja hyəhədi, ləhə dzər chaka'i təkəsə ku patla təl. Təl kwa ndzam chi nda kwa tsəfə nda. 6 Kəl ngə huɗəma təl tə ndaltə dza ngə ləvər tə səya nyi, dza cha tə kuɗiya dza, undə cha kwa tsamtladəu. 7 Ngə cha nga na kurakə dzəgamdzəgam nja tsəmtə nyi njir hakəzə ana njir mər sə shinshin kə'i njir kuzəkəu. Ngə təl tə nar nyi njir zəndə nə Babila, "Ma dəhə ndə nda tə nau kəratsən tə tsəfə ngə ka dəkar ɗa ba'ada nyi, njo handzə nyi lukutu shunayya ya njo haulə nyi dzara lyang nda nja batlə na bəjingha tə wulya cha. 8 Kəl ngə dəhə njir zəndə tə tsəmtə dza, kəl ja, a da na nau kəratsən tə tsəfə nda ndara nda dəkar ba'ada nyi wa.