Sə inda Ndzəkwa tə Səwandi
2
1 Mbəɗiya ma Papam vu Sihiyona, hya mbəɗiya tələm kya tə dəgəl karti ɗa. Əngwa dəhə nji inda na ngya tə hə'i na, nda tsamətlaɗəu, aka pəchir Tlakə kwa shili, a ɗatə ləhə gagaɗa. 2 Pəchi ngə kwa ɗa pəchir kutlə ɗimiɗimi təɗumu, pəchir ləmbəkə kyakyar ana kutla. Wi ngə kutlər par kwa haɗiya mə i'i, wi ngə ləvaləva inda ɗang na dunama kwa shili, nda pa'a nji taa la'a ku zamin na, ndara zamin nda kwa shili. 3 Hu'u kwa gəɗə biyaman nda, a biyahin nda tsə'u kyara hu'u kwa bəbər nda. A biyaman nda hə'i nda gumaguma wi fa Adin, kəl ja, a biyahin nda wi dadil takə nda a sə da kwa nau ngya tə wa. 4 Pabiya taku nda, ya nda kwa hwi wi taku dla'a. 5 Kuraka hya nda ma ndo dləgəl kyo kəra məa, wi kuraka hya charkaina taku i'i, ətsəu wi kuraka hu'u nda kwa ngi təlam, wi ləvaləva inda tə təndadzə ka pah. 6 Nda nji tə la'a nda, kəl ləvər tə səya dəhə nji, huɗəma nda tə ndaltə dza. 7 Ndo pah wi njir pah, ndo ma'i kya tə kəra ɓangtili wi ləvaləva i'i. Ngə nda tiyadzə ga biyama na ma'i a da ndo tyati tsa laku kənda wa. 8 Ndo ma'i tandarəu, a da ndo mbəla kərnənda wa. Ndo gwa ku huɗa nji a sər katə nda da wa. 9 Ndo kusa gu ta mələm, ndo hwi kyatə kəra ɓangtili. Ndo go ki i'i, ndo gwa təwa kagapə i'i wi ndər həl. 10 Dunəya ana huɗamələm kwa dzədzi, pichi ana hya kwa go kutla, a tsə'u sasəlga da kwa mbəl wa, aka ɗangkura ndzəkwa inda. 11 Kuraka Tlakə wi dradlər par ma cho nəu na ləvaləva nyi. Ləvaləva nyi kwa nəu nya cha, ya ɗang nda gagaɗa nda a nji do nau jigabiya wa. Aka pəchir Tlakə sər ləvər cha gagaɗa, wa kwa nau səsə'uta?Nga ka Tubi
12 Ngə Tlakə tə na, <<Mada sakana,
ɓəl ma shili da ya na dəhə ɗufwa hi,
ana səmdzən ana tiwi ana sə'ingu.>>
13 Tətau ma ɗəfwa hi,
a da dzaki kəhi wa.
Ɓəl ma shili da Hyel Tlakəu, Hyel kəhi,
aka nacha ndər manəkəkur cha ya ndər tuhuɗəu,
huɗatla nyi a da kusuwa, ya nyida nyi bwaɓə tanyi,
cho nau katə təmachi tsa shili.
14 Wa zənda? Hyel kwa nau shandə jigadəma nyi, ba'a char hi təhuɗəu,
ba'a nəhi papa'akur nə sə zwazwa.
Ya hyo nau shili na nyi ga'a nə sə uhiuhi ana ɓitir anapəu.
15 Mbəɗiya ma papam vu Sihiyona,
bəziya ma səmdzən nda karti,
nga ma daɓədzə karti.
16 Tsəmtə nji,
ɓatliya nda ma ka tsəmdzə nda karti;
shili ma na dəhə nji halhala,
tsəmtə ma ngulisha'a;
inda kwa sa 'uwa.
Əngwa salgambəl ngyar fur nyi,
gambəl tsə'u cha zəbiya ku vi nyi.
17 Əngwa priest inda kwa mər tlər mar Tlakəu,
nda tiwi ku lakur hya'atə nya mənga gya dza dzəgana,
Nda na, <<Ngatə tuhuɗə nji ngha, Tlakəu.
Ngwa ka da ngyar nja həyatə sərfa'aki nghə wa,
Ngwa ka da ngya nda nda ɗa ka sər gwa'a gyaɗi
nə nji kəla zəndə Hyel wa,
tsa nda ba'a na,
Aman Hyel njir Israila ja?>>
Wum nda Tlakə tə Wuma
18 Aka Tlakə tə ɗəngha gagaɗə təkəra hə'i nyi,
ga ngatə təhuɗə nji nyi.
19 Tlakə kwa wum nə nda bəra,
<<Yo sətə hi sərsuma, taɗər ɓitir anap ana mal,
nda kwa nji ka nyandə hi gwaɓəu,
a tsə'u yo ngyar hyo ɗa,
ka sər gwa'a gyaɗi mar alənya jul nji wa.>>
20 <<Yo gədlənda ləvaləva inda təwa vwa naɗə tsa hi,
yo təra nanda kyatə dadil takəu,
yo gədlənda inda biyama gwa təwa zədərpəchi gwa tə Fa'a Wuna,
inda biyahi tsə'u təwa təɗərpəchi gwa tə fa'a Meditireniya.
Gundəɓər dza nda
kwa shi'uni bəməu.>>
Vəlvəl yo kuɗənda nda aka sə inda nda mərtə hi.
21 Cha mər sər məngəl, aka ənga,
mada hə'i kwa kina mər hirgyaɗi.
22 Sərshishi takəu, ngwa hya ləvər wa,
aka bəɗakə kwa ɓəla ɗəɗa səkəu.
Wu kwa yah,
kanda ana wur anap kwa yatəkər.
23 Mər ma hirgyaɗi, njir Sihiyona,
mər ma hirgyaɗi ku Tlakəu, Hyel kəhi,
aka cha nə hi
par tangərma ku bəji tsa'atsa'a.
Cha təɗə tsa'atsa'a wi ndo nji hi, fwatə tə ghəya nyi tsa'a nə batəbatə nyi wi nda haaɗa.
24 Lar kəhi kwa nyi na sə uhiuhi,
mbwar ɓəchi ɓitir anap kwa nyi na taɗər ɓitir anap ana mal zaitun.
25 <<Yo ɓəlandə hi sə inda ndzəkwa tə ɗənya ku fa inga tərabiya inga,
ndzəkwa tangərma inda, ndara
alenya ndzəkwa inda, ndara jigajiga ndara
alenyi ndzəkwa inda,
nanda ingə ləvaləva ɗa inda ya sətə hi.
26 Hyo uya sərsum nyaɓəu, hyo səm kəl hya nyi,
ya hyo fal tləmər Tlakəu, Hyel kəhi
nda tə mər sər məngəl tə lya hi,
a tsə'u nji ɗa da kwa sa kuzhi wa.
27 Aka ənga, hyo zəndə ənda ku Isra'ila ya,
aka naya ngə Tlakəu, Hyel kəhi,
ya a vanyi da wa,
a tsə'u nji da kwa sa kuzhi wa.
Pəchir Tlakəu
28 <<Ahir nga,
Yo pəkər Shanguɗə ɗa təkəra dəhə nji.
Nguli shili kəhi ana ku'i kəhi kwa takər,
nji halhal kəhi kwa shi'uni i'i,
nguli tlakala kəhi kwa la'a shi'uni puchi i'i.
29 Ku nda na ɓəji, yo pəkər Shanguɗə ɗa,
ma'a təkəra mavi'i ɗa, shili ka mahi'i.
30 Yo char hi sər muniya kya huɗamələm,
ana a tə dunəya,
mashi, ana hu'u ana ear.
31 Pəchi kwa sha ka kutla
ana hya kwa sha ka mashi
təvi pəchi dəgal ana pəchir ləvər nə Tlakə kwa shili.
32 Kala ndə nda kwa nga
tləmər Tlakəu, kwa uya mbəɗa;
aka a kyo kəra mə Sihiyona ana a vu Urshalima
njo uya dləuya,
wi nda Tlakə tə na,
a ku huɗa nji inda tə mbəɗa,
nji inda Tlakə tə nga.