Nəuma təkəra Hə'i
3
1 <<Bəji kwa shili,sakanda yo ɓəlandə nyi papa'akur Yahuda ana Urushalima,
2 Yo tsəmətə dəhə jul nji,
ba'a shili na nda ku dakə Jahoshafat.
Ku nda yo tlanda nda nəuma,
a təkəra sə inda nda mərtə nyi nə nji ɗa na nda ingə njir Isra'ila,
aka nda wiɗənda nji ɗa kyo huɗa alənya jul nji
ga tətəkəya hə'i ɗa.
3 Ngə nda ɓəlshiu təkəra nji ɗa,
ga dzədzanda nguli shili ka ku'imahi'i ka mavi'i,
ka ɗəl ɓitir anapəu
ana ka nda kinda zawar i'i.
4 <<Njir Taya ana Sidon, ana dəhə hə'i Filistiya, sakan ja ya, mi sə nda ya zandə hya? A sə da ya zandə pəlakər hyo kisəkur tə ya wa. Macha hyo kisəkur tə ya, yo sha yo kinda hi kuskusəu, məlməl na sə nda hya məra. 5 Aka hya fa'atə azurfa ɗa ka bəjingha ɗa, ga fa'abiya dəhə gəna ɗa ga təra nə yo mbwa'alə kəhi i'i. 6 Hya ɗəlnda njir Yahuda ana njir Urushalima nə njir Heleni, məlna ndo ɗa naɗə tsa hə'i kənda.
7 <<La'a, Yo fa'abiya nda zəbiya ku mbwa ingə hya ɗəlnda nda kyatə inga, ya yo mərtə hi wi nda hya mərtə nda. 8 Yo mərtə njo ɗəlnda nguli shili kəhi ka ku'i kəhi nə njir Yahuda, ya ndo ɗəlnda nda nə njir Sabin, jul nji inda naɗə gagaɗa. >> Sə nda Tlakə ngə tə na nga. 9 Janə sə nda hyo bəzə nə jul nji. Ɓatliya ma dzə ka pah! Tsəmətə ma njir pah! Dəhə njir pah tsaɗətədzə ləhə nda pah. 10 Dləbiya ma katsakər na gələ'u tla zwa kəhi, dləbiya ma tlaku a ka masə i'i. Ndə kəla dunama cha na, <<Ndər dunama ya!>> 11 Kusa ma shili, dəhə jul nji inda ɓandə Yahuda, tsəmtə ma dzə ku dakə nga. Səya na njir pah ja Tlakəu!
12 <<Əngwa jul nji ngya na mbadza, nda təra go dakə Jahoshafat, aka kunda yo yi ngya ka ya tlanda nyi nəuma nə dəhə jul nji inda tə ɓandə Yahuda. 13 Dlakəya ma tlaku aka sə zwazwa nəti. Anda ma, dərɓə ma yayar anapəu, aka mbwar ɓəchi ɓitir anap nyiti, ya mbwar tsəm ɓitir anapə nyi tə kwa pəa, aka ɗimikur kənda ɗatə 'ual'ual gagaɗa!>> 14 Dlama nji dubu dubu ku dakə tla nəuma nda! Aka pəchir Tlakə ɗatə ləhə ku dakə tla nəuma nda. 15 Aka pəchi ana hya kwa kutliyadza, ya tsə'u sasəlga da kwa mbəl wa. 16 Tlakə kwa ghərti hya'atə vu Sihiyona ana dradlə hya'atə vu Urushalima, dunəya ana huɗamələm kwa dzədzi. Kəl ja, Tlakə kwa ɗa ka mbwar mbu nə nji nyi, mbwar mbu nə njir Isra'ila.
Papa'akur ka Nji inda nə Hyel.
17 <<Ku bəji nga, hyo zəndə ənda naya ngəTlakəu, Hyel kəhi, nda na gya vu Sihiyona dəgəl ɗa nda karti. Urushalima kwa ɗa karti, a tsə'u mihiɓi da kwa kura nyi wa.
18 <<Tə pəchi nda, kəra mə kwa nyi na taɗər ɓitir anapəu, ya dəgəl tsə'u kwa hwi na 'uwa, dəhə dlələm Yahuda kwa hwi ɓiti. Məhuɓiti kwa hwi hya'atə ku ki Tlakə ya cho nə nyi ɓiti nə dakə hyachi. 19 Kəl ja, Masar kwa ɗa jwajwa'a, Edom tsə'u kwa ɗa ka dadil takəu, aka ɗimikur inda nda mər nə njir Yahuda, nji inda nda pənda mashi nji kəla bikə ku hə'i kənda. 20 Kəl ja, Yahuda kwa ɗa ka mbwar ngya nji ka ba'anawa ya əngə Urushalima tsə'u ku dəhə zamin i'i. 21 Bikər pənda mashi kənda inda pa'a ya far ni, yo far ni.>> Aka Tlakə ngə na ngya vu Sihiyona.